დაახლოებით, ერთი თვეა, რაც 2018 წლის ქალთა საფეხბურთო ჩემპიონატი დასრულდა, რომელშიც ლანჩხუთის გოგონათა გუნდიც მონაწილეობდა. გათამაშების სატურნირო ცხრილის მიხედვით, პირველ ადგილზე თბილისური კლუბი „ნიკე“ გავიდა, ხოლო ლანჩხუთელი გოგონები მეორე ადგილს დასჯერდნენ. ირკვევა, რომ ქალთა საფეხბურთო კლუბ „ლანჩხუთის“ ხელმძღვანელობას, საბოლოო შედეგებთან დაკავშირებით პრეტენზიები აქვს ქალთა ფეხბურთის ფედერაციის ხელმძღვანელობის მისამართით, რაზეც მათ საგანგებოდ გამართულ პრესკონფერენციაზე ისაუბრეს.
კლუბის ხელმძღვანელის დურმიშხან ჩხაიძის თქმით, ნორმალურ გარემოში ეს ჩვეული სიტუაცია იქნებოდა და მეორეადგილოსანი ჩემპიონს წარმატებას მიულოცავდა.
„მაგრამ ასე არაა, ხაზგასმით აღვნიშნავთ, რომ ჩემპიონობა „ნიკემ“ არამარტო მოედანზე მიღწული სპორტული შედეგებით მოიპოვა, არამედ მოედნის გარედან აქტიური ხელშეწყობით, რაშიც ლომის წილი ქალთა ფეხბურთის ფედერაციას მიუძღვის. ასე რომ, ჩვენ არ ვეთანხმებით გამოქვეყნებულ შედეგებს.
ჩვენი სიტუაციით დავით მუჯირი დაინტერესდა, რომელსაც მივაწვდით ჩვენს ხელთ არსებულ ყველა ინფორმაციას კონკრეტული დარღვევების თაობაზე. დაველოდებით, რა რეაგირება მოჰყვება ყველაფერ ამას შემდგომში და მოვლენების შემდგომ განვითარებას, ცხადია, ავსახავთ შემდგომ განცხადებებში“, _ აღნიშნა დურმიშხან ჩხაიძემ, რომელმაც გარკვეულ დეტალებზე საუბარი ამ ეტაპზე არ ისურვა, მაგრამ მიანიშნა, რომ ქალთა ფედერაციის მესვეურთა მხრიდან ადგილი ჰქონდა გარკვეულ მაქინაციებს კლუბ „ნიკეს“ სასარგებლოდ.
„ამ ეტაპზე კონკრეტიკისგან თავს შევიკავებთ, უბრალოდ, გეტყვით, რომ ხელთ გვაქვს ყველა დოკუმენტაცია , რომელიც გარკვეულ დარღვევებზე მიანიშნებს და უფრო მეტიც, საქმე გვაქვს გაყალბებასთან, რომელიც გაცილებით უფრო დიდი დანაშაულია“, _ ამბობს ჩხაიძე.
რაც შეეხება უშუალოდ ჩემპიონატის ჩატარების სისტემას, ბატონი დურმიშხანი მიიჩნევს, რომ არასწორად არის აწყობილი და გარკვეულ კითხვის ნიშნებს ბადებს.
„წინა წლებთან შედარებით ჩემპიონატის ორგანიზება უკეთესია, მაგრამ გაუგებარია ის სისტემა, რომლითაც ჩატარდა ეს გათამაშება. სამ თვეში დასრულდა ყველაფერი და დანარჩენი 9 თვე რა უნდა აკეთონ ფეხბურთელებმა? რატომ არის ასე მოკლევადიანი ეს ყველაფერი, მაშინ, როცა დრო საკმარისზე მეტია. კიდევ ორი წრე რომ ყოფილიყო, ხომ უკეთესი იქნებოდა? გოგონები მონდომებულები არიან, ფორმაში თანდათან შედიან და როცა ეს ფორმა ოპტიმალურს აღწევს, ყველაფერი სრულდება. ვერ გეტყვით, რა ხდება. რა თქმა უნდა, გათამაშების გახანგრძლივება გარკვეულ ხარჯებს მოითხოვს, მაგრამ ეს არ არის კოლოსალური თანხები და თუ გვინდა, რომ ქალთა ფეხბურთი განვითარდეს, უფრო მეტი უნდა გაკეთდეს“, _ თქვა დურმიშხან ჩხაიძემ.
ჩხაიძის მხრიდან ქალთა ფეხბურთის ფედერაციის მისამართით გაჟღერებულ პრეტენზიებთან დაკავშირებით „გურია ნიუსი“ ფედერაციის ხელმძღვანელს ნინო სორდიას დაუკავშირდა.
„ლანჩხუთის კლუბის ხელმძღვანელობას თუ რამე პრეტენზიები და ბრალდებები გააჩნია ფედერაციის მისამართით, მისი დამტკიცება მოუწევთ. წინააღმდეგ შემთხვევაში, ჩვენი მხრიდან ამას სხვანაირი რეაგირება მოჰყვება. თავის დროზე, როცა ლანჩხუთურ კლუბს გარკვეული პრობლემები ჰქონდა მუნიციპალიტეტის ხელმძღვანელობასთან, ჩვენი ფედერაცია მას ყველანაირად გვერდში დაუდგა, რადგან აქ მართლაც კარგი გოგონები თამაშობენ, მაგრამ ჩვენ ვერავისგან მივიღებთ დაუმსახურებელ პრეტენზიებსა და ბრალდებებს„, _ გვითხრა სორდიამ.
