როგორც ლანჩხუთის საკრებულოს ბოლო სხდომაზე გახდა ცნობილი, მიმდინარე წელს რეგიონული განვითარების ფონდით გასახორციელებელი პროექტების დასაფინანსებლად სახელმწიფო ბიუჯეტი 830 717 ლარს გაიღებს.
მერიის ინფრასტრუქტურის სამსახურის უფროსის მოვალეობის შემსრულებლის, ალეკო კირვალიძის განმარტებით, ზემოთ ნახსენები ფონდის დაფინანსებით, ქალაქში სამი ქუჩის რეაბილიტაციაა დაგეგმილი. კერძოდ, საუბარია ნუგზარ ურუშაძის, წერეთელისა და ნინოშვილის შესახვევის ქუჩების რეაბილიტაციაზე, რისთვისაც 570 ათასი ლარის გახარჯვა იგეგმება.
რეგფონდის მიერ გამოყოფილი თანხიდან 120 ათასი ლარი კი ქალაქში, მერიის მიმდებარედ ახალაშენებულ პროფესიულ-საგანმანათლებლო დაწესებულებასთან მისასვლელი გზის მოწყობისთვის მიიმართება.
საგულისხმოა, რომ რეგფონდით გასახორციელებელი პროექტების ნუსხაში მოხვდა ასევე ქალაქის ცენტრში, ჟორდანიას 114-ში მდებარე მრავალბინიანი საცხოვრებელი სახლიც. საქმე ისაა, რომ აღნიშნული სახლი წლებია ავარიულ მდგომარეობაშია და მისი საყრდენი ბოძები რეაბილიტაციას საჭიროებს. აღნიშნულზე ადგილობრივთა თხოვნით, არაერთხელ წერდა “გურია ნიუსი” და ადგილობრივი ხელისუფლების მხრიდანაც არაერთხელ იყო დაპირება, რომ პრობლემა მოგვარდებოდა. ჰოდა, ნათქვამია, სჯობს გვიან, ვიდრე არასდროსო და ნახსენები პრობლემის მოსაგვარებლად, ბიუჯეტი 140 717 ლარს გაიღებს.
როგორც მუნიციპალიტეტის მერმა, ალექსანდრე სარიშვილმა აღნიშნა, აღნიშნულ პროექტებს ივლისის შუა რიცხვებიდან დაემატება ქალაქის იმ რვა ქუჩის ასფალტირების თანხები, რომელთა რეაბილიტაცია დაანონსებული იყო ჯერ კიდევ წლის დასაწყისიდან და ამ შემთხვევაშიც დაფინანსების წყარო რეგიონული განვითარების ფონდი იქნება.
დეპუტატმა, გია გოგუაძემ თავისუფლების ქუჩის აუცილებელ რეაბილიტაციაზე ჩამოაგდო საუბარი. მისი თქმით, ეს ქუჩა საკმაოდ ცუდ მდგომარეობაშია, დატვირთვაც ძალიან დიდი აქვს და ძლიერი ქარების შემდგომ მოთხრილმა ხეებმაც, ამ ქუჩის სანიაღვრე არხები იმდენად დააზიანა, წვიმის დროს იქ გავლა პრობლემური არისო. თუმცა მერმა დამაიმედებელი პროგნოზი ამ ქუჩის მიმართებაში არ გააკეთა, რამეთუ ამ მისი ასფალტირება დღის წესრიგში არ გვაქვსო. გოგუაძემ აღნიშნული კი გააპროტესტა, მაგრამ პასუხად მიიღო ის, რომ ლანჩხუთში სხვა ქუჩებიც არის, სადაც გაცილებით ცუდი მდგომარეობაა და კომუნისტების შემდეგ, ასფალტის საფარი იქ მცხოვრებთ არც ღირსებიათო.
საკრებულოს თავმჯდომარის პირველმა მოადგილემ, ემზარ თევდორაძემ ადმინისტრაციულ ერთეულებში გასაკეთებელ პროექტებზე გაამახვილა ყურადღება, თუმცა მერმა მასაც შეახსენა, რომ მიმდინარე წლის ლიმიტი მოწონებული და დაგეგმილი პროექტებისა, ამოწურულია და სოფლებში ამ კუთხით არაფერი სიახლე ამ ეტაპზე არ იგეგმებაო.
“თუმცა, სამომავლოდ მოხდება ამ თემებზე საუბრები ფინანსთა და რეგიონული განვითარების სამინისტროებში, სადაც გაირკვევა მიმდინარე წლის დამატებითი ლიმიტები და ახალი პროექტების ბედიც მაშინ გადაწყდებაო”, _ დასძინა სარიშვილმა.
აქ საუბარია რეგფონდიდან გათვალისწინებულ პროექტებზე, მაგრამ როგორც ირკვევა, სტიქიის თანხებით სოფლებში დაგეგმილია ნაპირსამაგრი სამუშაოების გახორციელება, რომელიც მილიონ 700 ათასი ლარითაა განსაზღვრული და ამ პროექტზე ტენდერი უკვე გამოცხადებულიც ყოფილა.
ავტორი
