რა პრობლემებს შექმნის მართვის ახალი სისტემის ამოქმედება ჩოხატაურში

1 ივლისიდან  მართვის მოწმობის ქულათა სისტემა და უკონტაქტო პატრულირება ამოქმედდება. შესაბამისი ინფორმაცია უკვე დაეგზავნათ მძღოლებს.

შინაგან საქმეთა მინისტრის მოადგილის შალვა ხუციშვილის განმარტებით, შსს-ს ამ დროისთვის  1 200 000-მდე მძღოლის მონაცემები აქვს და იმ მოქალაქეებს, რომლებსაც ვიდეოჯარიმის შესახებ სმს-ით შეტყობინება არ მიუვათ, შეუძლიათ რეგისტრაცია გაიარონ.

_ ჩვენ გვექნება ინფორმაცია, რომ ამ ადამიანს გაეგზავნოს ჯარიმის შესახებ ინფორმაცია. პირველ ეტაპზე იქნება სმს, მერე შეიძლება სატელეფონო ზარიც იყოს შსს-დან, რათა შეღავათით სარგებლობა შეძლონ დაჯარიმებულებმა, თუ ისინი 10 დღის ვადაში გადაიხდიან ჯარიმას.

ყველა დარღვევა აღირიცხება. სანამ მოქალაქეები წესებს მიეჩვევიან, ჯარიმები გაიზრდება. ქულები უკავშირდება პიროვნების მართვის მოწმობას, ხოლო ჯარიმა ავტომობილების მფლობელებს. თუ ჯარიმა მოქალაქეს ხელზე არ ჩაბარდა, მაშინ აიტვირთება ვებგვერდზე და ატვირთვიდან 30 დღეში ჩაითვლება, რომ ჩაბარდა, – განაცხადა ხუციშვილმა.

მინისტრის მოადგილის თქმით, ე. წ. „ჭკვიანი კამერები“ ავტობანებსა და თბილისში ივლისის ბოლოდან დამონტაჟდება.

ცვლილებებთან დაკავშირებით სპეციალური განცხადება შინაგან საქმეთა სამინისტრომაც გაავრცელა _ უწყების ინფორმაციით, 1 ივლისიდან პოლიციას, საგზაო მოძრაობის უსაფრთხოების უზრუნველყოფის მიზნით, ეძლევა უფლება, თავის სარგებლობაში არსებულ ავტოსატრანსპორტო საშუალებაზე დაამონტაჟოს ფოტო/ვიდეოტექნიკა, აგრეთვე, არასტაციონარული სიჩქარის მზომი ხელსაწყოები.

უკონტაქტო პატრულირების გახორციელების არეალის შესახებ ინფორმაცია განთავსდება საგზაო მონაკვეთის შესასვლელსა და გამოსასვლელში; რაც შეეხება უკონტაქტო პატრულირებისას მოპოვებულ ინფორმაციას, ის მხოლოდ იმ შემთხვევაში ინახება, თუ საგზაო მოძრაობის წესების დარღვევის ან დანაშაულის შესახებ მონაცემებს შეიცავს.

უკონტაქტო პატრულირებისას დაფიქსირებულ სამართალდარღვევაზე ფულადი ჯარიმა იწერება.

რაც შეეხება ქულათა სისტემას _ შინაგან საქმეთა სამინისტროს განმარტებით, 2017 წლის 1 ივლისს მართვის მოწმობას მინიჭებული 100 ქულა ძალაში იქნება 2018 წლის 1 იანვრამდე;

2018 წლიდან, ყოველი კალენდარული წლის 1 იანვარს მართვის მოწმობას მიენიჭება 100 ქულა, რომელიც მთელი კალენდარული წლის განმავლობაში ძალაში იქნება. კალენდარული წლის განმავლობაში საქართველოს ტერიტორიაზე საგზაო მოძრაობის სფეროში ადმინისტრაციული სამართალდარღვევის ჩადენა იწვევს მართვის მოწმობაზე დარიცხული ქულების შემცირებას;

კალენდარული წლის განმავლობაში მართვის მოწმობაზე დარიცხული ქულების რაოდენობის 0-მდე შემცირება იწვევს მართვის მოწმობის მფლობელი პირისათვის მართვის უფლების შეჩერებას 1 წლის ვადით;

მართვის უფლების ვადამდე აღდგენა შესაძლებელია, თუ პირი წარმატებით ჩააბარებს მართვის უფლების მისაღებ გამოცდას. მართვის უფლების ვადამდე აღდგენის მიზნით მართვის უფლების მისაღებ გამოცდაზე კალენდარული წლის განმავლობაში პირი დაიშვება მხოლოდ ერთხელ;

საქართველოს შინაგან საქმეთა სამინისტროს უფლებამოსილი ორგანო ელექტრონული ფოსტის ან/და მოკლე ტექსტური შეტყობინების გზით მართვის უფლების გაუქმების რისკის შესახებ გააფრთხილებს იმ პირს, რომლის მართვის მოწმობაზე დარიცხული ქულების რაოდენობა 50 ქულამდე, შემდეგში კი – 20 ქულამდე შემცირდება, თუ იგი ფლობს ამ პირის შესახებ შესაბამის საკონტაქტო ინფორმაციას;

„დააკვირდით ჯარიმის ქვითარს, სადაც, ფულადი ჯარიმის ოდენობასთან ერთად, მითითებული იქნება სამართალდარღვევისათვის განსაზღვრული ქულა და მართვის მოწმობაზე დარჩენილი ქულების ოდენობა.

მძღოლს, სამართალდარღვევისთვის გათვალისწინებული ფულადი ჯარიმის დარიცხვასთან ერთად, მინიჭებული 100 ქულიდან სამართალდარღვევის შესაბამისად დააკლდება ქულა,” _ აღნიშნულია სამინისტროს განცხადებაში, სადაც, ასევე, განმარტებულია, რომ ფოტო ან ვიდეოფირზე დაფიქსირებულ ჯარიმებზე, ასევე, ჯარიმის გადაუხდელობის გამო დაკისრებულ საურავზე ქულათა კლების სისტემა არ ვრცელდება.

აღსანიშნავია, რომ ახალი სისტემის ამოქმედებას პროტესტით შეხვდნენ მძღოლები ჩოხატაურში, სადაც ქუჩები არასწორადაა დახაზული და თითქმის ვერსად იპოვით საგზაო ნიშანს.

ამ საკითხის მოწესრიგების აუცილებლობის საკითხი საკრებულოს სხდომებზე ბევრჯერ დასვა დეპუტატმა ოთარ სოროზანიშვილმა.

გასულ წელს შესაბამისი თანხაც ჩაისვა, თუმცა უშედეგოდ, რაც მძღოლების სამართლიანი უკმაყოფილების მიზეზიც გახდა.

მათი თქმით, არასწორად დახაზული ქუჩების გამო ჯარიმების რაოდენობა ჩოხატაურში გაზრდილია. ისინი ეჭვობენ, რომ ეს მიზანმიმართულად ხდება, რადგან ჯარიმები ჩოხატაურის ბიუჯეტში შედის.

_ მესიჯები მივიღეთ ახალი სისტემა ამოქმედდებაო.  ბარემ ისიც მოეწერათ, ჯიბიდან ფული ამოიღეთ და ბიუჯეტი შეგვივსეთო. ყველაფერს ხომ აქვს საზღვარი? ყველამ იცის, რომ ჩოხატაურში ქუჩები არასწორადაა დახაზული და პატრულიც უსამართლოდ გვაჯარიმებს, მაგრამ ამას ყურადღებას არავინ აქცევს. პატრულს რომ შეეკამათები ნახაზებისკენ მიგითითებს. ისინიც გვეუბნებიან, რომ არასწორია, მაგრამ მაინც გვაჯარიმებენ.

ადგილობრივი ხელისუფლებაც ყველანაირად უწყობს ხელს. 2014 წელს, არჩევნების წინ გვპირდებოდნენ ამის მოგვარებას, მაგრამ მეორე არჩევნები მოდის და ისევ მოუწესრიგებელია. თუმცა, რატომ მოაწესრიგებენ _ ამით ბიუჯეტში შედის ფული და ხელფასებს და პრემიებს ირიგებენ. აბა, ჩვეულებრივი ხალხის ბედი მაგათ როდის ადარდებდათ, _ აღნიშნავენ მძღოლები „გურია ნიუსთან“ საუბრისას, რომელთა თქმით, უსამართლოდ დაწერილ ჯარიმებს 1 ივლისიდან მართვის მოწმობის ჩამორთმევის შანსებიც დაემატება.

ჩოხატაურის მუნიციპალიტეტის გამგეობაში ამბობენ, რომ საგზაო ნიშნების მოწესრიგებისთვის საჭირო 25 ათასი ლარი უკვე გამოყოფილია. რამდენიმე დღეში ტენდერიც გამოცხადდება და სავარაუდოდ, აგვისტოდან ეს პრობლემა მოგვარებული იქნება.