არასამთავრობო ორგანიზაცია “ეკოს“ დამფუძნებელი ირმა გორდელაძე სოციალურ ქსელში ავრცელებს ინფორმაციას, რომ ჩოხატაურის მუნიციპალიტეტის, სოფელ ზემო სურებში, სადაც ჰესის მშენებლობა იგეგმება, მშენებელმა კომპანიამ შაქარი დაარიგა მოსახლეობაში.
“რა ქვია ამ ფაქტს? ქველმოქმედება თუ მოსყიდვა? კომპანია, რომელსაც სურს “ბარამიძე ჰესის” აგება ზემო სურებში და წლებია, მოსახლეობის წინააღმდეგობას აწყდება, დღეს შაქარი დაარიგა და ვინც სახლში იყო, ხელიც მოაწერინა ცარიელ ქაღალდზე, ვინც არ იყო, იქვე დატოვა.
კომპანია “სუფსა ენერჯის” ჰესის პროექტმა სკოპინგი გაიარა და შენიშვნები ამ პროექტთან დაკავშირებით “მწვანე ალტერნატივამ” და “საიას” ოზურგეთის ოფისმა გააგზავნა სამინისტროში“, _ წერს სოციალურ ქსელში ირმა გორდელაძე.
“გურია ნიუსი“ “სუფსა ენერჯის“ პროექტების მენეჯერს ზაზა ბაკურაძეს დაუკავშირდა და ამ საკითხთან დაკავშირებით კომენტარი ჩაწერა.
“ჩვენ გვაქვს სოციალური პროექტი და ამის გასაჯაროებას არ ვაპირებთ. მოსახლეობას დავეხმარეთ“, _ გვითხრა ზაზა ბაკურაძემ.
მისივე თქმით, სოციალური პროექტების ფარგლებში ზემო სურებში მცხოვრებლებს ხშირად ეხმარებიან.
“შარშან, მაგალითად, სასუქი დავურიგეთ, ასევე, გადავეცით შესაწამლი საშუალებები. მანამდე კი პურისფქვილი დავურიგეთ. ახლა შაქარი იყო მათთვის პრიორიტეტული“, _ აღნიშნა ჩვენთან საუბრის დროს ზაზა ბაკურაძემ.
“გურია ნიუსის“ დაინტერესდა, როგორ ხდება ადამიანების შერჩევა, როდესაც “სუფსა ენერჯი“ სოციალური პროექტის ფარგლებში საჩუქრებს არიგებს?
_ ასეთი კრიტერიუმი არ გვაქვს. ვისაც სჭირდება დახმარება, ვეხმარებით. მნიშვნელობა არ აქვს ზემო სურებში გასახორციელებელ ჰესის მშენებლობას უჭერს მხარს თუ არა, _ ამბობს ზაზა ბაკურაძე.
[sexy_author_bio]
