ჩოხატაურის საოლქო საარჩევნო კომისიაში კენჭისყრის დღეს, 31 ოქტომბერს 1 საჩივარი შევიდა. გუშინ კი ნაციონალური მოძრაობის წარმომადგენელმა კომისიას 17 საჩივარი წარუდგინა.
რა საჩივრები შევიდა ჩოხატაურის საოლქო კომისიაში_ ამ საკითხის შესახებ საოლქო კომისიის თავმჯდომარეს თეიმურაზ კუტუბიძეს ვესაუბრეთ.
მისი თქმით, 1 საჩივარი ზემო სურებიდან არის შესული. თუმცა, საოლქო კომისიამ მომხდარი ფაქტის შესახებ რამდენიმე საათის დაგვიანებით შეიტყო. შემთხვევა კი რის გამოც დამკვირვებელმა საჩივარი დაწერა დარღვევად არ შეიძლება ჩაითვალოს.
„კენჭისყრის დღეს შემოვიდა 1 საჩივარი ზემო სურებში მომხდარ ფაქტთან დაკავშირებით. „სამართლიანი არჩევნების“ დამკვირვებელი წერდა, რომ ერთ-ერთი ამომრჩეველი, მოხუცი ქალბატონი, როდესაც კაბინიდან გამოვიდა, გამოსვლის პროცესში დაკეცა ბიულეტენი. ე.ი. ნაწილობრივ დაკეცა კაბინაში, მაგრამ რომ გამოვიდა კიდევ კეცავდა ამ ბიულეტენს. მივეცი შენიშვნა და მხოლოდ ჩემი შენიშვნის შემდეგ უთხრა თავმჯდომარემ, რომ ეს ასე არ შეიძლება, იმიტომ, რომ შეიძლება დარღვეული იქნას ხმის მიცემის ფარულობა.
ცესკოს აქვს დადგენილი ბიულეტენის შევსების წესი. ყველა უბანში ვალდებული ვართ და კენჭისყრის დღეს მონიტორინგი ჩავატარეთ და ყველა უბანი შემოვიარეთ და ყველგან იყო გაკრული შევსების წესი. უბრალოდ მიდის ამომრჩეველი რეგისტრატორთან, იღებს ბიულეტენს, შედის კაბინაში, შემოხაზავს მისთვის სასურველ კანდიდატს შემდეგ ამ ბიულეტენს კეცავს ისე რომ არ ჩანდეს ვის მისცა ხმა და ამ კონვერტს მოათავსებს ყუთში. ეს არის გაფრთხილება ამომრჩევლისთვის რომ კაბინაში დაკეცოს ბიულეტენი და არა გზაში. თავმჯდომარე ვერანაირად ვერ მოახერხებს იმას და არც არის მიზანშეწონილი, რომ უყურებდეს ვის როგორი ბიულეტენი გამოაქვს და ვერც მოახერხებს იმის გაგებას ვინ როგორ დაკეცა ბიულეტენი. ეს ფაქტი იმას არ მიანიშნეს, რომ იმ შემთხვევაშიც კი რომ ფარულობა დაიღვა. ადგილზე დაწერილ საჩივარს თავმჯდომარემ უპასუხა, მაგრამ მან არ მიიღო ეს პასუხი, ხელი არ მოაწერა და ჩვენთან ოლქში მყოფ დამკვირვებელს გადმოსცა ეს ინფორმაცია და 13 საათზე მომხდარი ფაქტი ჩვენთან მოვიდა 17-18 საათამდე პერიოდში. ანალოგიური საჩივარი შემოიტანეს ჩვენთანაც და ამავე შინაარსის პასუხი გავეცით ჩვენც. მოთხოვნა იყო ამოფხვრილი იყოს დარღვევაო და 13 საათზე მომხდარ დარღვევას ოლქი 18 საათზე ვერაფრით ვერ ამოფხვრიდა. არავის დაუნახია და არ დაუფიქსირებია რომელი სუბიექტი ჰქონდა შემოხაზული. მეტი საჩივარი ჩვენთან არ შემოსულა და რაც შემოვიდა, იმაზე რა რეაგირება უნდა მოახდინოს თავმჯდომარემ? ბათილად ჩათვალოს? გაფუჭებულად ჩათვალოს? თუ რა ქნას? ხმის მიცემის უფლებას ხომ არ წაართმევს ადამიანს. ასე გამჭვირვალედ და სამართლიანად არჩევნები იშვიათად ხდება. 39 უბანი იყო და 1 საჩივარი დაიწერა. თუ მეტი დარღვევა ვერ ნახეს, მაშინ ძალიან ამაყი ვარ”,_ “,_ გვითხრა ჩოხატაურის საოლქო კომისიის თავმჯდომარემ.
რაც შეეხება ნაციონალური მოძრაობის წარმომადგენლის მიერ დაწერილ საჩივრებს, ის დროსა და ადგილშია რეალობას აცდენილი.
„არჩევნებიდან 2 დღის შემდეგ ნაცმოძრაობის წარმომადგენელმა ოლქში, ოთარ მამარდაშვილმა შემოიტანა 17 საჩივარი. ეს საჩივრები არის ერთი და იგივე შინაარსის. საჩივარში ნაციონალური მოძრაობა ამბობს, რომ ერკეთის საუბნო კომისიამ გააბათილა მათთვის მიცემული ხმები.
ამ საჩივრის დაწერის უფლება მაგათ ქონდათ იმ შემთხვევაში თუ ანალოგიური საჩივარი იქნებოდა უბანზე. კანონიდან გამომდინარე, კენჭისყრის დღეს პროცესის დროს თუ რამე დარღვევა მოხდა უნდა დაიწეროს 8 საათამდე, შემდეგ საჩივარი აღარ მიიღება, რაც შეეხება ხმის დათვლას, უნდა დაიწეროს საჩივარი უბანზე შემაჯამებელი ოქმის შედგენამდე. თუ უბანზე შევიდოდა საჩივარი და არ დააკმაყოფილებდა უფლება ჰქონდა 2 დღის განმავლობაში შემოეტანა ოლქში მათ წარმომადგენელს საჩივარი. ეს საჩივარი დარჩება განუხილველი რადგან დარღვეულია საჩივრის შეტანის დრო და ადგილი. ამას დღეს განიხილავს ოზურგეთი სხდომაზე და მიიღებს გადაწყვეტილებას. ჩემი აზრი ასეთია, რომ ალბათ კანონიდან გამომდინარე მიიღებენ მე რაც გითხარით ასეთ გადაწყვეტილებას. საჩივარში მოთხოვნილია რომ გავაბათილოთ სამგორის უბნები და მემგონი ხელი არ მიმიწვდება“,_ ამბობს თავმჯდომარე.
