“ერთიანი ნაციონალურ მოძრაობის“ დეპუტატები რიგგარეშე სხდომის ჩატარებას 21 ივნისს ითხოვენ _ ამის შესახებ ოფიციალური წერილით უკვე მიმართეს ოზურგეთის მუნიციპალიტეტის საკრებულოს თავმჯდომარეს დავით დარჩიას.
“ბესიკ ქათამაძეზე დანაშაულებრივ თავდასხმაში უშუალოდ მონაწილეობდა საკრებულოს შემდეგი თანამდებობის პირები: გელა აროშიძე _ ფრაქცია ,,ქართული ოცნება – დემოკრატიული საქართველოს,, თავმჯდომარე; გენო ჩავლეშვილი _ ფრაქცია ,,ქართული ოცნება-მწვანეების,, თავმჯდომარე; დავით ჭაკნელიძე _ ,,ქართული ოცნება – კონსერვატორების,, თავმჯდომარე; გოჩა კილაძე ,,ოზურგეთის მუნიციპალიტეტის საკრებულოს აგრარულ საკითხთა, ქონების მართვისა და ბუნებრივი რესურსების საკითხების კომისიის,, თავმჯდომარე;
თავდასხმის ადგილზე იმყოფებოდნენ საფინანსო-საბიუჯეტო კომისიის თავმჯდომარე გია ჩაგანავა და ოზურგეთის მუნიციპალიტეტის საკრებულოს სამანდატო, საპროცედურო, იურიდიულ საკითხთა და ეთიკის კომისიის თავმჯდომარე ეროდი გორდელაძე, ასევე, მომხდარის შესახებ, ამავდროულად, ცნობილი გახდა საკრებულოს თავმჯდომარის დავით დარჩიასთვის.
ზემოხსენებული ყველა პირი წარმოადგენს პოლიტიკური თანამდებობის პირებს. თავი რომ დავანებოთ ბესიკ ქათამაძეზე თავდასხმას, მათი მოქმედება წარმოადგენს ეთიკის ნორმების, ქცევის ზოგადი წესების უგულებელყოფას, რომელიც მიმართულია მოხელისა და საჯარო დაწესებულების დისკრედიტაციისაკენ და ზიანს აყენებს, ზოგადად, მუნიციპალიტეტის საკრებულოს რეპუტაციას.
ვინაიდან მომხდარ თავდასხმას შეესწრო თავად ოზურგეთის მუნიციპალიტეტის საკრებულოს სამანდატო, საპროცედურო, იურიდიულ საკითხთა და ეთიკის კომისიის თავმჯდომარე ეროდი გორდელაძე, მისი სამსახურებრივი და პოლიტიკური პასუხისმგებლობიდან გამომდინარე, უნდა შეესწავლა მომხდარი ინციდენტი და განეხორციელებინა კანონით მათზე დაკისრებული ვალდებულება, ასევე ფაქტის შესახებ ცნობილია საკრებულოს თავმჯდომარე დავით დარჩიასათვის. ხსენებული თანამდებობის პირების მხრიდან უმოქმედობა ბესიკ ქათამაძეზე თავდასხმის ტოლფასი დანაშაულია და წახალისებაა მომავალი ძალადობისაკენ“, _ აღნიშნულია წერილში, რომელიც საკრებულოს აპარატში უკვე დარეგისტრირებულია.
ასევე, წერილში აღნიშნულია თუ რა საკითხების განხილვა უნდა მოხდეს საკრებულოს სხდომაზე.
“ისეთ პირობებში, როდესაც საკრებულო თავმჯდომარის და ეთიკის კომისიის თავმჯდომარის მხრიდან ხორციელდება მომხდარი ფაქტის სრული იგნორირება მოგმართავთ ფრაქცია “ერთიანი ნაციონალური მოძრაობის” სახელით და ვითხოვთ, უმოკლეს ვადაში დაინიშნოს ოზურგეთის მუნიციპალიტეტის საკრებულოს სხდომა (ოზურგეთის მუნიციპალიტეტის რეგლამენტის პირველი ნაწილის ,,დ,, პუნქტი).
რიგგარეშე სხდომის დღის წესრიგი: საფინანსო-საბიუჯეტო კომისიის თავმჯდომარე გია ჩაგანავას უფლებამოსილების შეწყვეტა და ახალი კომისიის თავმჯდომარის არჩევა;
ოზურგეთის მუნიციპალიტეტის საკრებულოს სამანდატო, საპროცედურო, იურიდიულ საკითხთა და ეთიკის კომისიის თავმჯდომარე ეროდი გორდელაძისათვის უფლებამისილების შეწყვეტა და ახალი კომისიის თავმჯდომარის არჩევა;
ოზურგეთის მუნიციპალიტეტის საკრებულოს აგრარულ საკითხთა, ქონების მართვისა და ბუნებრივი რესურსების საკითხების კომისიის,, თავმჯდომარის – გოჩა კილაძისათის უფლებამოსილების შეწყვეტა და კომისიის თავმჯდომარის არჩევა.“
ოზურგეთის მუნიციპალიტეტის საკრებულოს თავმჯდომარის მოადგილე, გიორგი ღურჯუმელიძე ამბობს, რომ წერილი 18 ივნისს, გვიან შემოვიდა საკრებულოს აპარატში და შესაბამისად, მოხდება მისი შესწავლა.
“ჩატარდება თუ არა რიგ გარეშე სხდომა, ეს კანონით არის გათვალისწინებული. “ნაცმოძრაობის“ დეპუტატებისგან, რაც არის მოთხოვნა შემოსული, რიგგარეშე სხდომის ჩატარების დასაბუთებულ აუცილებლობას უნდა შეიცავდეს წერილი. კანონის ფარგლებში, წერილს შვიდი დღის განმავლობაში უნდა გაეცეს პასუხი. შესაბამისად, მოხდა წერილის შესწავლა და ოფიციალურად მოხდება პასუხის გაცემა.“ – გვითხრა გიორგი ღურჯუმელიძემ.
