მართვის მოწმობის 100-ქულიანი სისტემა უკვე დამტკიცებულია _ საკანონმდებლო ცვლილებას, რომელიც ძალაში მიმდინარე წლის ივლისიდან შევა, პარლამენტმა მესამე მოსმენით მხარი დაუჭირა.
ამ ცვლილების თანახმად, მძღოლს 100 ქულა მიენიჭება, რომლის კლებას ჯარიმების შესაბამისად მოხდება. თუკი ქულები წლის ბოლომდე განულდება, მძღოლს მართვის მოწმობა ჩამოერთმევა.
ქულები ასეა განაწილებული: სატრანსპორტო საშუალების სამართავად გადაცემა წინასწარი შეცნობით ალკოჰოლური სიმთვრალის მდგომარეობაში მყოფი პირისთვის _ 30 ქულა, აღნიშნული სამართალდარღვევის განმეორებით ჩადენა 1 წლის განმავლობაში _ 40 ქულა;
სატრანსპორტო საშუალების სამართავად გადაცემა წინასწარი შეცნობით ნარკოტიკული ან ფსიქოტროპული სიმთვრალის მდგომარეობაში მყოფი პირისათვის _ 40 ქულა;
თუ წინა სავარძელზე მჯდარი მგზავრი ღვედს არ გაიკეთებს 5 ქულა დაგაკლდებათ;
ავტომობილის მართვისას ტელეფონზე საუბარი 15 ქულად არის შეფასებული; მოპედით/მოტოციკლით მგზავრობისას თუ ჩაფხუტს არ გაიკეთებთ, 5 ქულას დაკარგავთ; გაუმართავი სამუხრუჭე სისტემის/გაუმართავი საჭის/გაუმართავი მაშუქების მქონე ავტომობილის ტარებისთვის, ასევე, 5 ქულა დაგაკლდებათ; ავტომობილის ტარება, რომელიც დასაშვებ ზღვარზე მეტად აბინძურებს გარემოს, 10 ქულად არის შეფასებული; თვითნებურად გადაკეთებული ავტომობილის ტარების გამო 10 ქულით დაჯარიმდებით; არასწორი ქვეკატეგორიის მართვის მოწმობით ავტომობილის ტარებისთვის 15 ქულა ჩამოგაკლდებათ; დაბურული მინების მქონე ავტომობილის ტარება 5 ქულაა; იგივე ქმედება, ჩადენილი განმეორებით _ 10 ქულა; მესამედ _ 15 ქულა; წესების დარღვევით მოძრაობა, რასაც მოჰყვა ავტომობილის, ინფრასტრუქტურის ან ადამიანის სხეულის მცირე დაზიანება _ 20 ქულა; ავტომობილზე ციმციმა სიგნალის ან/და ხმოვანი სიგნალის ან/და სპეციალური ხმამაღლამოლაპარაკე ხელსაწყოს დაყენება ან/და ოპერატიული ან სპეციალური სამსახურის სატრანსპორტო საშუალებებისათვის განსაზღვრული შეფერილობის გამოყენება საქართველოს შინაგან საქმეთა მინისტრის მიერ განსაზღვრული წესის დარღვევით _ 15 ქულა; იგივე, განმეორებული წლის მანძილზე _ 20 ქულა.
ესკორტის ავტომობილის შეფერხების შეთხვევაში მძღოლს 10 ქულა ჩამოაკლდება; სასწრაფო/სამაშველო/სახანძრო სამსახურების ავტომობილის შეფერხებისთვის _ 20 ქულა; იგივე ქმედება, რასაც მოჰყვა ავტომობილის, ინფრასტრუქტურის, ან ადამიანის სხეულის მცირე დაზიანება, 40 ქულად არის შეფასებული.
ავტომობილის გადაცემა არასრულწლოვნისთვის (გარდა იმ პირისა, რომელსაც მინიჭებული აქვს სატრანსპორტო საშუალების მართვის უფლება) ან იმ პირისთვის, რომელსაც არ აქვს სატრანსპორტო საშუალების მართვის უფლება ან ეს უფლება შეჩერებული აქვს სხვა დარღვევისთვის _ 15 ქულაა; იგივე ქმედება, რასაც მოჰყვა ავტომობილის, ინფრასტრუქტურის, ან ადამიანის სხეულის მცირე დაზიანება _ 25 ქულა; იგივე ქმედება განმეორებული წლის მანძილზე _ 30 ქულა; წინასწარი შეცნობით, სანომრე ნიშნის გარეშე მოძრაობა ან სანომრე ნიშნის შეცვლა/გადაკეთება _ 10 ქულა; სატრანსპორტო საშუალების მართვა წინასწარი შეცნობით სხვისი ან შენიღბული სახელმწიფო სანომრე ნიშნით _ 30 ქულა; საგზაო შემთხვევის მონაწილე მძღოლის მიერ შემთხვევის ადგილის მიტოვება ან საგზაო შემთხვევის მონაწილე სატრანსპორტო საშუალების შემთხვევის ადგილიდან გადაადგილება_ 15 ქულა; ავტომობილის გაჩერების შესახებ იმ პოლიციელის მოთხოვნის შეუსრულებლობა, რომელიც უზრუნველყოფს საგზაო მოძრაობის მონაწილეთა უსაფრთხოებას და ზედამხედველობს საგზაო მოძრაობის წესების დაცვას _ 20 ქულა; აღნიშნული სამართალდარღვევები, რომლებსაც მოჰყვა საავარიო ვითარების შექმნა ან საგზაო მოძრაობის შეფერხება _ 35 ქულა; ავტომობილის მიერ მოძრაობის დადგენილი სიჩქარის გადაჭარბება 15 კმ/სთ-ზე მეტი სიჩქარით _ 10 ქულა; აღნიშნული სამართალდარღვევის ჩადენა იმ პირის მიერ, რომელიც ახორციელებს ადგილობრივ საქალაქო, საქალაქთაშორისო ან საქართველოს საერთაშორისო ხელშეკრულებებითა და შეთანხმებებით დადგენილ საერთაშორისო რეგულარულ სამგზავრო გადაყვანას _ 25 ქულა; სატრანსპორტო საშუალების მძღოლის მიერ მოძრაობის დადგენილი სიჩქარის გადაჭარბება 15 კმ/სთ-ზე მეტი სიჩქარით, რომელსაც მოჰყვა საავარიო ვითარების შექმნა ან მოძრაობის შეფერხება _ 30 ქულა; აღნიშნული სამართალდარღვევა, რომელსაც მოჰყვა სატრანსპორტო საშუალების, ტვირთის, გზის, საგზაო თუ სხვა ნაგებობის, სხვა ქონების ან ადამიანის სხეულის მსუბუქი დაზიანება _40 ქულა.
ქვეითებთან მიმართებით საგზაო მოძრაობის წესების დარღვევისთვის 5 ქულა დაგაკლდებათ, ხოლო იგივე მოქმედებას თუ ერთი წლის მანძილზე კიდევ გაიმეორებთ _ 10 ქულა.
თუ ქვეითებთან მიმართებით მძღოლი საგზაო წესებს დაარღვევს, რითაც საავარიო სიტუაციას შექმნის, 20 ქულა დააკლდება; ხოლო ქვეითად მოსიარულე ადამიანების მიმართებით წესების დარღვევას თუ ქონების ან ადამიანის სხეულის მსუბუქი დაზიანება მოჰყვება _ 30 ქულა;
მძღოლის მიერ საგზაო ნიშნის ან საგზაო მონიშვნის, ბუქსირების, გარე სანათი ხელსაწყოთი, ხმოვანი სიგნალით ან საავარიო შუქსიგნალიზაციით სარგებლობის, სასწავლო სვლის, საცხოვრებელ ზონაში ან გზაზე მოძრაობის წესების, სამარშრუტო სატრანსპორტო საშუალების მოძრაობის პრიორიტეტის ან/და საჭაპანო ტრანსპორტის მართვის წესების დარღვევა, ან მოტოციკლით ან სხვა სატრანსპორტო საშუალებით ჯგუფურ მოძრაობაში მონაწილეობა, რაც აფერხებს საგზაო მოძრაობას ან საშიშროებას უქმნის მოძრაობის უსაფრთხოებას, 5 ქულად არის შეფასებული; სატრანსპორტო საშუალებებით ორგანიზებულად გზის გადაკეტვა ან ჯგუფურ მოძრაობაში მონაწილეობა ქალაქში ან სხვა დასახლებულ პუნქტში, რა დროსაც სრულად არის დაკავებული გზის სავალი ნაწილი _ 10 ქულად; გზის სავალ ნაწილზე სატრანსპორტო საშუალებათა განლაგების, მოძრაობის დაწყების ან/და მანევრირების წესების დარღვევა _ 10 ქულად.
სატრანსპორტო საშუალებაზე საცნობი ნიშნის დამაგრების წესის დარღვევით მოძრაობა 5 ქულას დაგაკარგვინებთ; ღერძულა ხაზის გადაკვეთა _ 10 ქულას. იგივე მოქმედებას თუ ერთი წლის მანძილზე კიდევ გაიმეორებთ, 20 ქულა ჩამოგეჭრებათ; ღერძულა ხაზის გადაკვეთა და მოძრაობის საპირისპირო მიმართულებით მოძრაობა კი 30 ქულა დაგიჯდებათ; აღნიშნულ სამართალდარღვევებს, რომლებსაც მოჰყვა საავარიო ვითარების შექმნა ან მოძრაობის ისეთი შეფერხება, რომელმაც გამოიწვია საცობის შექმნა, 20 ქულის ჩამოკლება მოჰყვება; 25 ქულა აკლდება საგზაო მოძრაობის წესების დარღვევას, რომლებსაც მოჰყვა სატრანსპორტო საშუალების, ტვირთის, გზის, საგზაო თუ სხვა ნაგებობის, აგრეთვე სხვა ქონების ან ადამიანის სხეულის მსუბუქი დაზიანება.
საგზაო მოძრაობის მონაწილის (გარდა მექანიკური სატრანსპორტო საშუალების მძღოლისა) მიერ კანონით გათვალისწინებული მოთხოვნების დარღვევა ან/და საგზაო მოძრაობის მარეგულირებელი სიგნალისადმი დაუმორჩილებლობა, აგრეთვე საგზაო ნიშნის ან საგზაო მონიშვნის მოთხოვნათა უგულებელყოფა 10 ქულად არის შეფასებული; აღნიშნული ქმედების განმეორებით ჩადენა ერთი წლის განმავლობაში _ 15 ქულად; გზაზე იმ სატრანსპორტო საშუალებით მოძრაობა, რომლის თითოეულ წამყვან ან არაწამყვან ღერძზე მაქსიმალური დატვირთვა აღემატება 10 ტონას (გარდა ერთწამყვანღერძიანი ავტოსატრანსპორტო საშუალებისა, რომლის წამყვან ღერძზე მაქსიმალური დატვირთვა არ უნდა აღემატებოდეს 11,5 ტონას) ან/და ფაქტობრივი მასა აღემატება 44 ტონას ან/და ფაქტობრივი მასა აღემატება ნებადართულ მაქსიმალურ მასას _15 ქულად..
დარიცხული ქულები ძალაშია მთელი კალენდარული წლის განმავლობაში.
მომდევნო კალენდარული წლის 1 იანვარს მართვის მოწმობაზე დარიცხული ქულები უქმდება და მართვის მოწმობას ხელახლა ენიჭება 100 ქულა.
„თუ ჩადენილი ადმინისტრაციული სამართალდარღვევების შესაბამისად, კალენდარული წლის განმავლობაში მართვის მოწმობაზე დარიცხული ქულები ისე შემცირდება, რომ მართვის მოწმობისთვის მინიჭებული ქულების რაოდენობა ნულს ან ნულზე ნაკლებ რიცხვს გაუტოლდება, მართვის მოწმობისთვის მინიჭებული ქულები ამოწურულად ჩაითვლება.
მართვის მოწმობაზე მინიჭებული ქულების ამოწურვა იწვევს ამ მართვის მოწმობის მფლობელი პირისთვის მინიჭებული ყველა კატეგორიის (ქვეკატეგორიის) მართვის უფლების შეჩერებას 1 წლის ვადით,“ _ აღნიშნულია კანონში.
ამასთანავე, საქართველოს შინაგან საქმეთა სამინისტროს უფლებამოსილი ორგანო ვალდებულია ელექტრონული ფოსტის ან მოკლე ტექსტური შეტყობინების გზით, მართვის უფლების გაუქმების რისკის შესახებ გააფრთხილოს ის პირი, რომლის მართვის მოწმობაზე დარიცხული ქულების რაოდენობა 50 ქულამდე და შემდეგში 20ნქულამდე შემცირდება, თუ იგი ფლობს ამ პირის შესახებ შესაბამის საკონტაქტო ინფორმაციას.
კანონის თანახმად, სხვა ქვეყანაში გაცემულ მართვის მოწმობას საქართველოს ტერიტორიაზე ერთჯერადად ენიჭება 100 ქულა:
„სხვა ქვეყანაში გაცემულ მართვის მოწმობაზე დარიცხული ქულების ამოწურვის შემთხვევაში, აღნიშნული მართვის მოწმობის მფლობელს ეკრძალება საქართველოში მექანიკური სატრანსპორტო საშუალების მართვა.
ამ შემთხვევაში, საქართველოს ტერიტორიაზე მართვის უფლების აღდგენა ხდება საქართველოს შინაგან საქმეთა მინისტრის ბრძანებით განსაზღვრული წესით.“
აღსანიშნავია, რომ ვიდეოფირზე ან/და ფოტოფირზე დაფიქსირებულ ადმინისტრაციულ სამართალდარღვევებზე არ ვრცელდება მართვის მოწმობისთვის მინიჭებული ქულათა შემცირების წესი.
