უწყებათაშორის საკოორდინაციო საბჭოსთან არსებული ოპერაციული შტაბის უფროსმა, გიორგი ღიბრაძემ იმ ღონისძიებების შესახებ ისაუბრა, რაზეც საკოორდინაციო საბჭომ იმსჯელა.
ღიბრაძის განცხადებით, უწყებათაშორის საკოორდინაციო საბჭოს ახალი შეზღუდვების შესახებ გადაწყვეტილება არ მიუღია.
განსაკუთრებით დიდი მნიშვნელობა ისევ ენიჭება პრევენციული ღონისძიებების ზედმიწევნით დაცვას და მკაცრად აღსრულებას.
მისივე თქმით, მკაცრი შეზღუდვების თავიდან აცილებისა და ეპიდემიოლოგიური მდგომარეობის კიდევ უფრო დამძიმების თავიდან აცილების მიზნით, უწყებათაშორისი საკოორდინაციო საბჭოს გადაწყვეტილებით, ქვეყანაში კვლავ ნარჩუნდება შეზღუდვა გადაადგილებაზე 21:00-05:00 საათამდე პერიოდში.
„ასევე, ძალაში რჩება შაბათ-კვირას კვების ობიექტებთან დაკავშირებით მოქმედი შეზღუდვა, რაც ნიშნავს იმას, რომ ისინი მუშაობენ მხოლოდ გატანის სერვისზე; როგორც საჯარო, ასევე კერძო სექტორს კიდევ ერთხელ მოვუწოდებთ და მივმართავთ რეკომენდაციით, შეძლებისდაგვარად მაქსიმალურად გადავიდნენ მუშაობის დისტანციურ რეჟიმზე; ამასთან, მაქსიმალურად გამკაცრდება იზოლაციაში მყოფი პირების, მათი კონტაქტებისა და ქვეყანაში შემომსვლელთა თვითიზოლაციის კონტროლი; ასევე – საზღვარზე შემოსული პირების პისიარ-კვლევის ჩატარების მონიტორინგი 72 საათის გასვლის შემდეგ; საწარმოებში, სადაც გამოვლინდება შემთხვევები, მაქსიმალურად უნდა გამკაცრდეს ეპიდემიოლოგიური უსაფრთხოების ზომები და დამსაქმებელთა მაქსიმალური ჩართულობით, უზრუნველყოფილი უნდა იყოს აქტიური ტესტირება“, – განაცხადა ღიბრაძემ.
საბჭოს გადაწყვეტილებით, კიდევ უფრო მკაცრად გაკონტროლდება პირბადის სწორად მოხმარება და დისტანციის დაცვა, ასევე ხალხმრავალი შეკრებები, მათ შორის სოციალური ღონისძიებები, რომელთა გამართვა მთავრობის დადგენილებით აკრძალულია.
„საკოორდინაციო საბჭო კიდევ ერთხელ მოუწოდებს მოსახლეობას, მაქსიმალურად დაიცვან დადგენილი რეგულაციები, გამოიყენონ პირბადე, დაიცვან სოციალური დისტანცია და უარი თქვან ხალხმრავალი შეკრებების ორგანიზებასა თუ მათში მონაწილეობაზე“, – განაცხადა გიორგი ღიბრაძემ.
გარდა ამისა, ღიბრაძემ აღნიშნა, რომ ეპიდვითარების გაუარესების გათვალისწინებით, ხანდაზმულ პირებს საბჭო მიმართავს რეკომენდაციით, მაქსიმალურად დარჩნენ შინ.
ასევე, გიორგი ღიბრაძემ უპასუხა კითხვას, ხომ არ აიკრძალება საზოგადოებრივი ტრანსპორტის მოძრაობა უქმე დღეებში და ხომ არ შეიზღუდება სააღდგომო პერიოდში საქალაქთაშორისო ტრანსპორტი.
ღიბრაძის თქმით, დღეს არანაირი დამატებითი ღონისძიებების შემოღებაზე საუბარი არ ყოფილა, თუმცა ყოველდღიურ რეჟიმში ფასდება არსებული ეპიდემიოლოგიური ვითარება და შემდეგი გადაწყვეტილებები ამის შესაბამისად მიიღება.
„აღნიშნულ მომენტში არანაირი დამატებითი ღონისძიებების შემოღებაზე საუბარი არ ყოფილა, თუმცა არსებული ეპიდემიოლოგიური ვითარებიდან გამომდინარე, ყოველდღიურ რეჟიმში ხდება ამის განხილვა, მიღებულ იქნება გადაწყვეტილება დამატებით ზომებთან დაკავშირებით.
რაც შეეხება დასვენების დღეებს, მოგეხსენებათ, ქვეყანაში არსებობს ისეთი სამსახურები, რომელთა მუშაობაც აუცილებელია ქვეყნის გამართულად ფუნქციონირებისთვის. შესაბამისად, რეგულაციებით იქნება განსაზღვრული ის სამსახურები, რომლებსაც არ შეეხება დასვენების დღეები, დანარჩენი ყველა მოექცევა დასვენების რეგულაციებში“, – განაცხადა გიორგი ღიბრაძემ.
