“გურია ნიუსის“ ინფორმაციით, ოზურგეთის მუნიციპალიტეტის სოფელ წითელმთაში, ყოფილი “ტირის“ ტერიტორიაზე ადგილობრივი ინდმეწარმე ზურაბ დარჩია საკალმახის გაკეთებას აპირებს. ადგილობრივი მოსახლეობის ერთი ნაწილი „გურია ნიუსთან“ საუბრის დროს ამბობს, რომ ეს ადამიანები მდინარე ბჟუჟის სანაპიროდან, სადაც საკალმახე უნდა აშენდეს, 35 ათასი კუბი ინერტული მასალის გატანას აპირებენ. ინფორმაციის სისწორეში ეჭვი ეპარებათ ადგილობრივების მეორე ნაწილს.
“მთელი დღე და ღამე მუშაობენ, რომ, რაც შეიძლება მეტი ინერტული მასალა გაიტანონ. საშინელება მოხდება და ყველას ვთხოვთ დახმარებას. ამ ახალგაკეთებულ გზას აფუჭებენ, საშიშროება არის, რომ მდინარეზე გადებულ ხიდს საძირკველი მოეშალოს და ხიდის გარეშე დავრჩეთ, ეკოლოგიაზე და ხალხზე რატომ არ ფიქრობს არავინ? ჭაში წყალი არ არის და როდესაც ამდენი ინერტული მასალა გავა, კაცმა არ იცის, რა მოხდება“, _ ამბობს ჩვენთან საუბრისას მოსახლეობა.
ჩვენ მიერ მოპოვებული ინფორმაციით, რამდენიმე დღის წინ ინერტული მანქანით დატვირთული მანქანები არ გაუშვეს ადგილობრივებმა და ახლა სხვა გზით ცდილობენ საქმის მიყვანას ბოლომდე.
“არ გავატარებთ, რადგან ამათ ხალხის არ ესმით“, _ აპროტესტებენ წითელმთიელები.
“გურია ნიუსმა“ ექსკლუზიურად მოიპოვა ინფორმაცია, რომ აღნიშნულ ტერიტორიაზე საკალმახეს აშენებს ზურაბ დარჩია ოზურგეთის მერის წარმომადგენელი სოფელ ბაილეთში.
“მე არ ვაშენებ, უბრალოდ, გაფორმებულია ჩემზე. ჩემი მეგობარი რევაზ ლომაძე აშენებს. არენდით გადავეცი მას და მე არანაირ შუაში ვარ. ყველაფერ საქმეს აწარმოებს რევაზ ლომაძე და არანაირი კავშირი საკალმახის მშენებლობასთან არ მაქვს“, _ გვითხრა ზურაბ დარჩიამ.
რევაზ ლომაძემ ჩვენთან სატელეფონო საუბრის დროს ამბობს, რომ ამ საქმესთან დაკავშირებით მოსახლეობას არაერთხელ შეხვდა და კიდევ აპირებს შაბათს შეხვედრას.
“არსად გაქცევას არ ვაპირებ და ყოველთვის საუბარი მირჩევნია ადამიანებთან. არანაირად არ ვაპირებ თავის არიდებას. მინდა ვთქვა, რომ ყველაფერს ვაკეთებ კანონიერად და შესაბამისი დოკუმენტები მაქვს. საკალმახის აშენების ლიცენზიას ვფლობ და ორი წელია ვწვალობ, რომ ეს საქმე გამართულად გავაკეთო და არავინ დავაზარალო. უკანონოდ არაფერს ვაკეთებ“, _ გვითხრა ლომაძე.
რევაზ ლომაძე ამბობს, რომ მას აქვს ხელმოწერები მოსახლეობიდან (140 ადამიანის), სადაც ისინი საკალმახის მშენებლობას ეთანხმებიან.
“გურია ნიუსის“ ინფორმაციით, მოსახლეობამ ხელმოწერით თანხმობა განაცხადა სოფელ წითელმთაში, ყოფილი ტირის ტერიტორიაზე სასტუმროს და რესტორნის აშენებაზე, მაგრამ ამ ინფორმაციას არ ადასტურებს რევაზ ლომაძე.
„რამდენიმე დღის წინ უკმაყოფილო მოსახლეობამ გზა გადაკეტა და მანქანები არ გაუშვა. მოსახლეობის უკმაყოფილება ბევრი ავტომანქანის გადაადგილებამ გამოიწვია.
მათ ეს ფაქტი გააპროტესტეს და ქვები დადეს გზაზე. ეს იყო გუშინ და არც დამყავს იმ გზიდან. გადავწყვიტე მიმემართა ოზურგეთის მუნიციპალიტეტის მერიისთვის, რადგან გამოეყოთ ალტერნატიული გზა, რომელიც რამდენიმე არსებობს. ახლა ველოდები დასტურს მერიისგან, რომ ხიდიდან არ გავიტანო ინერტული მასალა, _ თქვა რევაზ ლომაძემ.
“გურია ნიუსი” აგრძელებს თემაზე მუშაობას და ვრცელ მასალას “გურია ნიუსის” უახლოეს ნომერში შემოგთავაზებთ”.
