წინა წლების მსგავსად, ლანჩხუთის მუნიციპალიტეტის 2020 წლის მთავარ საფინანსო დოკუმენტში ერთ-ერთ მთავარ პრიორიტეტად კვლავ სოციალური პროგრამების დაფინანსებაა ასახული. სოციალურ პაკეტს წინა წელთან შედარებით ერთი ახალი პროგრამა დაემატა და ჯამში, 17 პროგრამა მოემსახურება ადგილობრივ მოსახლეობას, რისთვისაც ბიუჯეტიდან წელს 576 ათასი ლარის გახარჯვაა გათვალისწინებული.
სოციალური პაკეტის თანახმად, შარშანდელის მსგავსად, 90 000 ლარი დაიხარჯება უკიდურესად შეჭირვებული ხანდაზმულებისა და შეზღუდული შესაძლებლობების მქონე პირთა უფასო კვებაში, მაგრამ თუ გასულ წელს კვირაში ორჯერ ოჯახში საკვების მიწოდებით 98-მა ბენეფიციარმა ისარგებლა, წელს დაგეგმილია ამ კატეგორიის 105-მდე ადამიანის მომსახურება.
შედარებით გაზრდილია მრავალშვილიანი ოჯახების დახმარების პროგრამის დაფინანსება, რომელიც მიზნად ისახავს ასეთი ოჯახებისთვის ყოველთვიურად ფინანსური დახმარების გაწევას. თუ 2019 წელს პროგრამის დასაფინანსებლად 34,5 ათასი ლარი გაიხარჯა, წელს ბიუჯეტი 36 ათას ლარს გაიღებს. ამ პროგრამის მიხედვით, ლანჩხუთის მუნიციპალიტეტში რეგისტრირებული მრავალშვილიანი ოჯახები, რომელთაც ჰყავთ ოთხი და მეტი 18 წლამდე ასაკის შვილი, ყოველთვიურად თითოეულ ბავშვზე მიიღებენ 35 ლარს.
პროგრამით ისარგებლებენ ის ოჯახები, რომლებიც არ არიან სოციალური შემწეობის მიმღებნი, ხოლო პროგრამის მიზანია მრავალშვილიანი ოჯახების ფინანსური ხელშეწყობა. ირკვევა, რომ ლანჩხუთში წელს ამ პროგრამით 23 მრავალშვილიანი ოჯახი ისარგებლებს.
2018 წელთან შედარებით შარშან შემცირებული იყო მძიმე საცხოვრებელ პირობებში მყოფი ოჯახებისთვის დროებითი თავშესაფრით უზრუნველყოფის პროგრამის დაფინანსება. თუ 2018 წელს ბიუჯეტმა ამ კუთხით 190 ათასი ლარი გაიღო, შარშანდელ ბიუჯეტში საამისოდ 67 ათასი ლარი იყო გათვალისწინებული და წელსაც იგივე თანხა დარჩა. პროგრამა გათვლილია 60 ბენეფიციარზე.
წლევანდელ ბიუჯეტში მუნიციპალიტეტმა თანხები უპატრონო მიცვალებულთა სარიტუალო მომსახურებისთვისაც გაითვალისწინა და ის შარშანდელის მსგავსად 2500 ლარითაა განსაზღვრული.
ომებსა და კონფლიქტებში მონაწილე ვეტერანთა დასახმარებლად შესაბამისი პროგრამის მიხედვით, თუ შარშან წლის გეგმა 53 ათასი ლარით განისაზღვრა, წელს ბიუჯეტი ამ პროგრამის დასაფინანსებლად 56.6 ათას ლარს გაიღებს.
მცირედით გაზრდილია სოფლებიდან მოსწავლეთა ტრანსპორტირების პროგრამის დაფინანსება. თუ 2019 წელს 7100 ლარით დაფინანსდა ეს პროგრამა, ამ მხრივ წლევანდელ ბიუჯეტში 7600 ლარია ჩადებული.
ცენტრ “იავნანას” თანადაფინანსებისთვის, რომლის მიზანია სოციალურად დაუცველი ბავშვების ფსიქო-სოციალური რეაბილიტაციის ხელშეწყობა, სოციალური პროგრამიდან წელს 13 ათასი ლარი გაიხარჯება, რაც ათასი ლარით მეტია შარშანდელთან შედარებით.
სამაგიეროდ, ამავე თანხით შემცირებულია ბიკარბონატული ჰემოდიალიზით ანუ თირკმლის ქრონიკული უკმარისობით დაავადებულთა სამედიცინო დაწესებულებაში ტრანსპორტირების პროგრამის დასაფინანსებელი თანხა, რომელიც წლევანდელ ბიუჯეტში 38 800 ლარია. ამის მიზეზი კი ის გახლავთ, რომ პროგრამით ისარგებლებს ერთით ნაკლები (სულ 23) ბენეფიციარი.
წინა წლებისგან განსხვავებით, გაზრდილია იძულებით გადაადგილებულ პირთა დახმარების პროგრამის დაფინანსება და 12,2 ათასი ლარის ნაცვლად, წელს 15,3 ათასი ლარია გამოყოფილი. ეს თანხა მუნიციპალიტეტში რეგისტრირებულ დევნილ ოჯახებს საშეშე მერქნის შესაძენად გადაეცემათ ერთჯერადად 250 ლარის ოდენობით (მუნიციპალიტეტში ასეთი 59 ოჯახია რეგისტრირებული. ავტ).
სამკურნალო და საოპერაციო ხარჯებით დახმარების პროგრამისთვის თუ გასული წელს ლანჩხუთის ბიუჯეტს 70 ათასი ლარის გაღება მოუწია, წელს სოლიდური მატებაა და 92 ათასი ლარის დახარჯვაა ამ მხრივ გათვალისწინებული. საგულისხმოა, რომ იმ ბენეფიციარებს, რომლებსაც ესაჭიროებათ ოპერაციული ჩარევა, ქიმიოთერაპია, კორონალური სტენტირება და ა.შ. (რაც სადაზღვევო კომპანიისგან არ უფინანსდებათ), ასეთ შემთხვევაში, მათ შესაბამის სამედიცინო დაწესებულებაში ჩაერიცხებათ საჭირო თანხის ნახევარი (არა უმეტეს, 1000 ლარისა).
პროგრამით კი ისარგებლებენ ის ადამიანები, რომელთა სარეიტინგო ქულა 0-დან 150 ათასია. ამავდროულად, შესაძლებელია მაგნიტო-რეზონანსული და კომპიუტერული ტომოგრაფიების თანადაფინანსება, ისევ 50 პროცენტით, ოღონდ 130 ათას ქულამდე მქონეებისთვის.
კვლავაც მზარდია “გამარჯვებულ ქალთა კლუბის” სარეაბილიტაციო პროგრამის დაფინანსება _ თუ გასული წლის გეგმა 36 ათასი ლარი იყო, წლევანდელი სოციალური პროგრამის პროექტის მიხედვით, დაფინანსება 1200 ლარით გაიზარდა.
ამ პროგრამის მიზანია ნაადრევ ეტაპზე კიბოს დიაგნოზით ნაოპერაციები ქალების მხარდაჭერა მათი შემდგომი რეაბილიტაციის მიზნით. პროგრამა ითვალისწინებს სამედიცინო კვლევებს, სარეაბილიტაციო ვარჯიშების ტრენინგებს, ფსიქოლოგიურ ტრენინგებს, მონაწილეობას სხვადასხვა კულტურულ ღონისძიებებში და ა. შ.
ხანდაზმულთათვის ერთჯერადი დახმარების გაწევის მიზნით სოციალური პროგრამის პროექტის შესაბამისად, ლანჩხუთის ბიუჯეტი 2020 წელს 1500 ლარის დახარჯვას გეგმავს.
მძიმე საცხოვრებელ პირობებში, უბედური შემთხვევისა და სტიქიური მოვლენების შედეგად დაზარალებული ოჯახებისთვის ერთჯერადი ფულადი დახმარების გაწევის მიზნით მუნიციპალიტეტი წლის განმავლობაში შარშანდელთან შედარებით 10 ათასი ლარით მეტს გაიღებს და სულ 50 ათასი ლარის დახარჯვას გეგმავს, რომელიც, სავარაუდოდ, 40 ბენეფიციარზეა გათვლილი და მიზნად ისახავს დაზიანებული საცხოვრებელი სახლის შეკეთებას.
რაც შეეხება შშმ პირის სტატუსის მქონე ბენეფიციართა სარეაბილიტაციო კურსის დაფინანსებას, ამ კუთხით წლევანდელ ბიუჯეტში 9 800 ლარია გათვალისწინებული.
პროგრამა ერთჯერადი ფულადი დახმარების გაწევასაც ითვალისწინებს _ ამ მხრივ, წლევანდელ ბიუჯეტში 19,5 ათასი ლარია ჩადებული, რაც შარშანდელთან შედარებით, 6 ათასი ლარით მეტია.
სამაგიეროდ, წლის მთავარი საფინანსო დოკუმენტის მიხედვით, სოციალური პროგრამა ბენეფიციარებისთვის მედიკამენტების შესაძენად მკვეთრად შემცირებულია და 60 ათასი ლარის ნაცვლად ეს თანხა 15 ათასით განისაზღვრა. პროგრამის მიხედვით, წლის განმავლობაში ერთჯერადად მედიკამენტების შესაძენად, 150 ლარის ფარგლებში, დახმარებას ის ადამიანები მიიღებენ, რომელთა ოჯახების სარეიტინგო ქულა 65 001-დან 150 000-მდეა, ასევე, შშმ პირები და მეორე მსოფლიო ომის ვეტერანები. რაც შეეხება ონკოდაავადებულებსა და ლეიკემიით დაავადებულებს, მათთვის პროგრამა მედიკამენტების შესაძენად ერთჯერად დახმარებას სამასი ლარის ფარგლებში ითვალისწინებს, ხოლო მძიმე კარდიოლოგიური, რევმატიული და ნევროლოგიური დაავადებების მქონეთათვის _150 ლარის გაცემაა დაგეგმილი.
რაც შეეხება სოციალური პაკეტის ახალი პროგრამისთვის, რომელიც ბავშვთა ადრეული განვითარების ხელშეწყობის, ბავშვთა რეაბილიტაცია-აბილიტაციის ქვეპროგრამით მოსარგებლე შშმ ბავშვებისა და მათი თანმხლები პირების ტრანსპორტირებას უზრუნველყოფს, 25 ათასი ლარის დახარჯვაა დაგეგმილი.
