| თუ სახლისთვის ახალი რადიატორის შეძენა გადაწყვიტეთ და სასურველი ვარიანტის ძიებაში ფართო არჩევანმა დაგაბნიათ, არ იღელვოთ. ჩვენი რეკომენდაციები თქვენზე მორგებული საუკეთესო ალტერნატივის აღმოჩენაში დაგეხმარებათ.
ჩამოთვლილი კრიტერიუმების გათვალისწინება შესაფერისი რადიატორის არჩევას გაგიიოლებთ. რადიატორების გავრცელებული ტიპები და მათი უპირატესობები ბაზარზე დღესდღეობით 3 ტიპის რადიატორს შეხვდებით:
ისინი ერთმანეთისგან მასალით, სითბოს გამოყოფით, ენერგოეფექტურობითა და ვიზუალით განსხვავდებიან. თითოეულ მათგანს თავისი უპირატესობა აქვს და მათ შორის არჩევანი თქვენს პრეფერენციებზეა დამოკიდებული. პანელური რადიატორები თუ ბიუჯეტში შეზღუდული ხართ, გირჩევთ პანელfური რადიატორის შეძენაზე დაფიქრდეთ. ამ ტიპის რადიატორების ფასი საშუალოდ 200-დან 300 ლარამდე მერყეობს. გაითვალისწინეთ, რომ ვიზუალური თვალსაზრისით ისინი მრავალფეროვნებით არ გამოირჩევა. პანელური რადიატორები მხოლოდ თეთრ ფერშია ხელმისაწვდომი, ერთიანი კონსტრუქციაა და გარკვეულწილად სასურველი სიგრძის არჩევის შესაძლებლობას იძლევა. ისინი ფოლადისგან მზადდება და მათი დამონტაჟებაც მარტივია. სექციური რადიატორები პანელურისგან განსხვავებით, ბაზარზე რადიატორების ეს ტიპი ფერთა ნაირსახეობითაა წარმოდგენილი და მეტ თავისუფლებას გაძლევთ. მათი აწყობა ცალკეული სექციებით ხდება. ჩვეულებრივ, ერთი სექციის სიგანე 8 სანტიმეტრი, სიღრმე კი 8.5 სანტიმეტრია. სექციური რადიატორების შემთხვევაში, შეგიძლიათ ოთახის პროპორციების მიხედვით თქვენთვის სასურველი ზომის რადიატორი დაამონტაჟოთ. ამ შემთხვევაში უნდა გაითვალისწინოთ, რომ რადიატორის სექციების რაოდენობის სწორ შერჩევას გადამწყვეტი მნიშვნელობა აქვს. არასწორად განაწილებული სისტემის პირობებში შესაძლოა სახლის გასათბობად გაღებული ხარჯები ფუჭი აღმოჩნდეს. სექციური რადიატორები ერთმანეთისგან დიზაინის გარდა მასალითაც განსხვავდება. მათ, როგორც წესი, ფოლადისგან, თუჯისგან, ალუმინისა და ბიმეტალისგან ამზადებენ. თუ სექციური რადიატორის შეძენას გადაწყვეტთ, გახსოვდეთ, რომ მისი ერთეულის ფასი 30-დან 200 ლარამდე შუალედშია. დეკორატიული რადიატორები თუკი თქვენი მთავარი პრიორიტეტი ვიზუალური მხარეა, მაშინ სწორედ დეკორატიული რადიატორი გესაჭიროებათ. დეკორატიულ რადიატორებს დანარჩენებისგან ვიზუალური მრავალფეროვნება, ზომები და დიზაინი გამოარჩევს. მათი შემადგენელი მასალა ალუმინი და თუჯია. დეკორატიული რადიატორების მონტაჟი შესაძლებელია, როგორც ვერტიკალურად, ასევე ჰორიზონტალური მიმართულებით, რაც მათ ბევრი მყიდველისთვის მიმზიდველ ალტერნატივად აქცევს. რადიატორების დიზაინის, ზომის, ხარისხის, მოდელისა და ფირმის მიხედვით, მათი ფასი ერთმანეთისგან საგრძნობლად განსხვავდება. ვიზუალური მხარისა და არჩევანის მრავალფეროვნების გათვალისწინებით, დღესდღეობით სულ უფრო მეტი პოპულარობით სარგებლობს დეკორატიული რადიატორები. თუმცა მომხმარებელთა უმრავლესობა კვლავ სტანდარტულ ტიპს ანიჭებს უპირატესობას, რის მიზეზადაც სითბოს გამოყოფის მაღალ მაჩვენებელს ასახელებენ. მაღალი ხარისხის პანელური და სექციური რადიატორები დეკორატიულ რადიატორებთან შედარებით 15-20%-ით მეტ სითბოს გამოიმუშავებენ. ამის მიუხედავად, ეს მონაცემები რადიატორის ბრენდსა და მოდელზეა დამოკიდებული. სწორად შერჩეული მოდელის შემთხვევაში ენერგოეფექტური დეკორატიული რადიატორის შეძენასაც შეძლებთ. რა ფაქტორები უნდა გაითვალისწინოთ რადიატორის ტიპის შერჩევისას თუკი თქვენთვის ნაჩქარევი გადაწყვეტილებები უცხოა და არჩევანის გაკეთებამდე წინასწარი მოკვლევა გადაწყვიტეთ, გირჩევთ რადიატორის შეძენამდე სპეციალისტს მიმართოთ, რომელიც სახლის პროექტს, სამშენებლო მასალას, ბინის თბოდანაკარგსა და ჭერის სიმაღლეს შეაფასებს. ამის შემდეგ მონაცემების შესწავლის საფუძველზე, თქვენი მრჩეველი სპეციალურად თქვენს საცხოვრებელზე მორგებული რადიატორის შერჩევაში დაგეხმარებათ. დამატებითი ხელსაწყოები, რომლებიც გათბობის სისტემის გამართვაში დაგეხმარებათ იმისთვის, რომ თქვენ მიერ შერჩეულმა რადიატორმა ეფექტიანად და ხანგრძლივად იფუნქციონიროს და სამომავლოდ პრობლემები თავიდან აირიდოთ, სასურველია მისი დამატებითი ხელსაწყოებით აღჭურვა. ასეთი ატრიბუტებია დამატებითი ონკანები და სარქვლები. სარქვლების დაყენება საუკეთესო გზაა მილებში წყლის ტემპერატურის კონტროლისა და ბატარეებში წყლის ინტენსივობის რეგულირებისთვის, რაც სისტემაში ენერგიის მოხმარებას უფრო ეფექტიანს ხდის. ეს უზრუნველყოფს გადაუდებელი შემთხვევების დროს გათბობის გარეშე დარჩენის რისკის თავიდან აცილებას. სარქვლების სწორი ნაკრების ასარჩევად მათი დანიშნულება უნდა გაითვალისწინოთ. სარქვლების ტიპები და მათი დანიშნულება სარქვლების ტიპებს შორის გამოიყოფა ჩამკეტი და დამაბალანსებელი სარქვლები. ჩამკეტი სარქვლები გათბობის სისტემის ქმედითუნარიანობას საგრძნობლად ახანგრძლივებს. რაც შეეხება დამაბალანსებელ სარქვლებს, მათი დანიშნულება მილებში წყლის ტემპერატურის რეგულირებაა. დამაბალანსებელი სარქვლები ასევე ცალკეულ ოთახებში ტემპერატურის დონის ინდივიდუალურად დარეგულირებაშიც დაგეხმარებათ. თუ ოთახი ზედმეტად ცხელდება, აუცილებელი ხდება მისი ვენტილაცია, რათა ჰაერის ტემპერატურამ მისაღებ ნიშნულს მიაღწიოს. თუმცა, სამწუხაროდ, ამ შემთხვევაში სითბო იკარგება. საწვავისა და თანხის დაზოგვის მიზნით, მიზანშეწონილია საკონტროლო სარქვლების, თერმოსტატის გამოყენება. თუკი ზემოთ ჩამოთვლილი გათბობის სისტემის დამატებითი მოწყობილობების შეძენას გადაწყვეტთ, შეამჩნევთ რომ ბაზარზე მათი დიდი არჩევანია. თუმცა გახსოვდეთ, რომ თითოეულ ბინას განსხვავებული ტიპის სისტემა აქვს, შესაბამისად სასურველი ხელსაწყო კონკრეტული მოდელის მიხედვით უნდა შეარჩიოთ. შეჯამება გათბობის რადიატორების ტიპის შერჩევისას მნიშვნელოვანია წინასწარ განსაზღვროთ მისი ზომა, სითბო, გამოყოფის ხარისხი, მასალა, სტილი. ასევე სასურველია მისთვის შესაბამისი აქსესუარების შერჩევა, რომელიც სისტემას დააზღვევს და სამომავლოდ პრობლემებს თავიდან აგარიდებთ. |
Developed By Web Features 2025 © All rights reserved