ოზურგეთის მუნიციპალიტეტის საკრებულოს წევრი და “ერთიანი ნაციონალური მოძრაობის“ ოზურგეთის რაიონული ორგანიზაციის თავმჯდომარე დავით მჟავანაძე სოციალურ ქსელში წერს, რომ 2019 წელს ოზურგეთის მუნიციპალიტეტის მერიამ 570 ლარად 8 ბოთლი ღვინო, 8 ცალი ჩურჩხელა და ტყლაპი, 10 კოლოფი ქართული ჩაი შეისყიდა.
“სანამ ოლიგარქის სასამართლო საქართველოს მესამე პრეზიდენტს, მიხეილ სააკაშვილს უკრაინის პრეზიდენტის დახვედრისთვის ასამართლებდა, ოზურგეთის მერიას 8 ბოთლ შავ ღვინოში, თხილის 8 ჩურჩხელაში და ტყლაპში 570 ლარი გადაუხდია.
თუ ეს ყველაფერი ქოცთათვის მოსულა, მიშას რაღას ედავებით ან კიდევ სახელმწიფო დაცვის სპეციალური სამსახურის ყოფილ უფროსს, თემურ ჯანაშიას დღემდე რაღატო ატარებთ სასამართლო სხდომებზე ლეხ და მარია კაჩინსკის საფლავების შესამკობად შეძენილი ვენოკებისთვის?“ _ წერს დავით მჟავანაძე.
“გურია ნიუსთან“ დავით მჟავანაძე ვერ აკონკრეტებს თუ ვის გაუმასპინძლდნენ ღვინით, ჩურჩხელით და ტყლაპით.
“დღეს სხდომაზე წარადგინეს ანგარიში _ 2019 წელს რა შესყიდვები განახორციელა მერიამ. იქ ამოვიკითხე ეს ინფორმაცია. მართლა მაინტერესებს 570 ლარად რა ჩურჩხელა ან ღვინო იყიდეს… ან ტყლაპი რა ღირს ასეთი?“ _ გვითხრა დავით მჟავანაძემ.
საკრებულოს სხდომაზე 2019 წლის შესყიდვების შესრულების ანგარიში ოზურგეთის მუნიციპალიტეტის მერიის შესყიდვების განყოფილების უფროსმა დავით გორდელაძემ წარმოადგინა. მან “გურია ნიუსის“ სატელეფონო ზარებს არ უპასუხა. “გურია ნიუსი“ მეორე მხარის კომენატრს ჩაწერისთანავე მოგაწვდით.
