“გურია ნიუსის” მიერ მოპოვებული ექსკლუზიური ინფორმაციით, ჩოხატაურის მუნიციპალიტეტის საკრებულოს ინფრასტრუქტურის კომისიის თავმჯდომარე ზვიად მამალაძე სამართალდამცავებისგან იმის გარკვევას ითხოვს, ვინ დაუტოვა კაბინეტში ფარულად ანონიმური წერილი, რომელშიც აღნიშნულია, რომ მისი პოლიტიკური წამზომი ჩართულია.
ჩვენი წყაროს თქმით, წერილი მამალაძეს რამდენიმე დღის წინ აღმოაჩინა კაბინეტში:
_ მასში წერია, რომ იგი არის თანამდებობის პირი, რომელსაც აქვს ვალდებულებები მოსახლეობის წინაშე, ის ამ პრობლემების მოგვარებით უნდა იყოს დაკავებული და არა პირადი კეთილდღეობის მოწყობით. ამავე წერილში აღნიშნულია, რომ თუკი ამას არ იზამს, მისი პოლიტიკური წამზომი ჩაირთვება, _ გვითხრა წყარომ.
კიდევ ერთი წყაროს თქმით, მამალაძე მიიჩნევს, რომ მას აშანტაჟებენ და ამაზე ყურადღება პოლიციისთვის გაკეთებულ მიმართვაშიც აქვს გამახვილებული.
ზვიად მამალაძე წერილის არსებობას ადასტურებს, თუმცა, ამ თემაზე კომენტარის გაკეთება არ სურს.
მან არც ის გვითხრა, აქვს თუ არა ვინმეზე ეჭვი და რატომ ფიქრობს, რომ მის მიმართ შანტაჟს აქვს ადგილი.
მართალია, მამალაძემ დეტალებზე საუბარი არ ისურვა, თუმცა, ჩვენ გავარკვიეთ, რომ წერილის პოვნისას, მასთან ერთად საკრებულოს წევრი გოჩა ჯიქია იმყოფებოდა.
“გურია ნიუსთან” საუბრისას ჯიქია ამბობს, რომ ამ თემაზე პოლიციას უკვე მისცა ჩვენება:
_ მე და ზვიადი ერთად შევედით ოთახში და მაშინ ნახა წერილი. დაზუსტებით არ ვიცი, რა ეწერა, რადგან პირადად არ წამიკითხავს. ზვიადი კითხულობდა და მე ვუსმენდი. როგორც მახსოვს წერილში საუბარი იყო მის საქმიანობაზე, ვალებზე, მუნიციპალიტეტის საკუთრებაში არსებულ ცხენებზე, რომლის პატრონაჟიც მას აქვს აღებული საკუთარ თავზე. იყო გაფრთხილებაც, _ გვითხრა ჯიქიამ.
ჯიქიას თქმით, რომ წერილში მოყვანილი ფაქტების არ სჯერა და არ გამორიცხავს, რომ შანტაჟს ჰქონდეს ადგილი:
_ არ შემიძლია დეტალებზე საუბარი და ვერც იმას გეტყვით, ეს წერილი პირადული იყო თუ პოლიტიკური. რაც მე მოვისმინე, იმის არ მჯერა _ ზვიადი არ არის მასეთი. რაც შეეხება შეფასებას, პირდაპირ ვერ ვიტყვი, რომ შანტაჟია, თუმცა, ამის ნიშნებს შეიცავს, _ აღნიშნა ჩვენთან საუბრისას ჯიქიამ.
შინაგან საქმეთა სამინისტროს პრესსამსახურის ინფორმაციით, მამალაძის მიერ შეტანილი განცხადების საფუძველზე ჩოხატაურის პოლიციაში წინასაგამოძიებო მოქმედებები მიმდინარეობს.
