ბრიტანულ მედიაში, კორონავირუსის ახალი და სწრაფი გავრცელების შტამის აღმოჩენის შესახებ, 14 დეკემბრიდან გავრცელდა ინფორმაცია. როგორც ბრიტანელი მეცნიერები აცხადებენ, კორონავირუსის ახალი შტამი 70% -ით უფრო სწრაფად და აგრესიულად ვრცელდება. ბრიტანეთმა ლონდონში და ინგლისის სხვადასხვა რაიონებში ახალი შეზღუდვები დააწესა კორონავირუსის ახალ შტამთან საბრძოლველად, რომელიც, როგორც ჩანს, მნიშვნელოვნად უფრო გადამდებია, ვიდრე პათოგენის ადრინდელი ვარიანტები.
“მეცნიერები ამბობენ, რომ ახალი ვარიანტი შეიძლება 70% -ით მეტად გადამდები იყოს, ვიდრე დადგენილი შტამები“, _ განაცხადა პრემიერ მინისტრმა ბორის ჯონსონმა შაბათს გამართულ პრესკონფერენციაზე. მიუხედავად იმისა, რომ იგი უფრო ადვილად გადადის ადამიანიდან ადამიანზე, არ არსებობს მტკიცებულება, რომ ეს შტამი უფრო სასიკვდილო ან რეზისტენტულია ვაქცინების მიმართ, _ თქვა მან.
THE WALL STREET JOURNAL -ი 19 დეკემბერს წერს: ახალი ჩაკეტვა ნიშნავს, რომ ბევრ ოჯახს არ ექნება საშობაოდ შეკრების უფლება. მისტერ ჯონსონმა, რომელმაც მხოლოდ რამდენიმე დღის წინ განაცხადა, რომ ”არაადამიანური” იქნებოდა შობის დღესასწაულზე “ბორდიურების განთავსება“, ახლა ამბობს: ”ძალიან გულდამძიმებულმა უნდა გითხრათ, რომ შობას ვერ ვიზეიმებთ ისე, როგორც დაგეგმეთ” (https://www.wsj.com/).
კოვიდ-19-ის ახალი შტამების შესახებ ინფორმაცია ადრეც გავრცელდა, მაგალითად, ჩინეთში; სპეციალისტები თვლიდნენ, რომ ეს უფრო “ჭკვიანი“ შტამი იყო სწრაფი გავრცელებით, მაგრამ ადგილობრივმა მთავრობამ ჩაკეტა ქალაქი, სადაც ეპიდაფეთქება მოხდა.
ახალი უცნობი შტამების “ჭკუის და სისწრაფის“ შესახებ ინფორმაციების გავრცელება, ისედაც დათრგუნულ და ჩაკეტილ საზოგადოებაში მღელვარებას და შიშს იწვევს.
მეტი ინფორმაციის მისაღებად, “გურია ნიუსი“ გთავაზობთ ინტერვიუს გაეროს გენერალური მდივნის მრჩეველთან სამედიცინო საკითხებში გიორგი ფხკაძესთან. იგი თვლის, რომ თუნდაც ბრიტანული ახალი შტამის თვისებების შესახებ დაბეჯითებით საუბარი ნაადრევია, რადგან მისი დაფიქსირებიდან ერთი კვირა გავიდა.
_ ჩვენ ბევრი რამ ჯერ კიდევ არ არ ვიცით კორონავირუსზე, მაგრამ მისი ახალი შტამები რომ გამოჩნდებოდა, სპეციალისტთა წრეებში ამას ყველა ელოდა. პირველი განგაში იყო ივნისში, ჩინეთში, სადაც გამოჩნდა ეგრეთწოდებული უფრო ,,ჭკვიანი“ კორონავირუსი, რომელიც უფრო აგრესიული იყო. სწორედ ამ დროს მთავრობამ ჩაკეტა ქალაქი, სადაც ეპიდაფეთქება მოხდა.
როცა ბრიტანეთში ერთი კვირის უკან გამოჩნდა ვირუსის ახალი შტამი, აღმოჩნდა, რომ უფრო აგრესიულად და სწრაფად ვრცელდება; ამას კი ევროპის ბევრი ქვეყნის საზღვრების ჩაკეტვა მოჰყვა. ჯერ ერთი კვირა გავიდა, ეს ძალიან ცოტა დროა რამის სათქმელად; ერთადერთი, რაც მეცნიერებს შეუძლიათ თქვან ისაა, რომ შტამი ელვისებური გავრცელებით გამოირჩევა.
_ შესაბამისად, ინფორმაცია, ჯერჯერობით, არც ახალი შტამის სიკვდილიანობის მაჩვენებელზე გვაქვს?
_ ჩვენ სიკვდილიანობის მაჩვენებელი არ ვიცით. სიკვდილიანობის მაჩვენებლის დადგენას, მინიმუმ, 2-3 კვირის მონაცემები სჭირდება; მხოლოდ ამ დროის გასვლის შემდეგ შეგვიძლია დავინახოთ, თუ რა კლინიკური მაჩვენებლები აქვს. დღევანდღელი მდგომარეობით მხოლოდ ის ვიცით, რომ ეპიდემილოგიური თვალსაზრისით ვირუსი ვრცელდება სწრაფად.
_ როგორ უნდა მოიქცეს საქართველოს მთავრობა, რომ ქვეყანაში ახალი შტამის გავრცელება არ მოხდეს?
_ ერთადერთი სწორი გზა დღევანდღელ დღეს, ამ წუთას, საზღვრების ჩაკეტვაა. ნებისმიერი ადამიანი, რომელიც შემოდის ევროპიდან, უნდა იყოს მინიმუმ 14-დღიან მკაცრ იზოლაციაში, იმიტომ, რომ ჩვენ არ ვიცით რასთან გვაქვს საქმე.
ეს ვირუსი, მისი შტამებით, ჯერ კიდევ უცნობია ჩვენთვის _ არაფერი ვიცით, თუ როგორ მუშაობს; შესაბამისად, რაც უფრო მეტი დრო გადის, უფრო მეტს ვიგებთ და ბრძოლის მეთოდებსაც ვიმუშავებთ. იგივე შეგვიძლია ვთქვათ ვაქცინების შესახებაც; ჩვენ ვიცით ზოგადი ინფორმაცია, დეტალებით კი, ყოველდღე გვაქვს სიახლეები. შესაბამისად, ამ ვირუსის საწინააღმდეგოდ ერთდერთი გამოსავალი და ერთადერთი წამალი, ჯერჯერობით, არის კარგი ხარისხის სამედიცინო პირბადე _ ამის გარდა, სხვა გამოსავალი არ არის. რაც არ უნდა ვიძახოთ, რაც არ უნდა ვილაპარაკოთ, ამ ვირუსის წამალი არის კარგი ხარისხის პირბადე და ორმეტრიანი დისტანცია! სხვა წამალი არ არსებობს! ვაქცინაციის დროსაც კი, რომლის პროცესი დაიწყო ბევრ ქვეყანაში, იმუნიტეტის გამომუშავება ხდება 28-ე დღეს… ამ, მოცემულ მომენტში, არც ის ვიცით, არის თუ არა ვაქცინაცია ბრიტანეთშიც გამოსავალი ამ ახალი შტამის წინააღმდეგ _ ეს სპეციალისტებმა უნდა დაადგინონ. ამდენად, ჩვენ ვართ ძალიან დიდი გამოწვევის წინაშე, რეალობას უნდა შევხედოთ თვალებში. რეალობა კი არის კარგი ხარისხის სამედიცინო პირბადე, რომელიც იქნება ყველასათვის ხელმისაწვდომი და მეორე _ რა თქმა უნდა, ორმეტრიანი დისტანცია. სხვა წამალი, ჯერჯერობით, არ არის, სამწუხაროდ.
_ რას იტყვით საქართველოში შემოღებულ შეზღუდვებზე, რამდენად საჭირო და საკმარისია?
_ საქართველომ ეგრეთწოდებული პიკი გაიარა, რაც სტატისტიკით ჩანს. თავიდან, ამას სკეპტიკურად ვიყურებდი, მაგრამ ფაქტია, რომ ინფიცირების დონე დავარდა; ეს კი იმიტომ მოხდა, რომ შეზღუდვებმა იმუშავა. მინდა იმ ადამიანებს ვუთხრა, ვინც ამბობს, რომ ეს არის სისულელე; ასე არ არის _ შეზღუდვები მუშაობს! გასაგებია, რომ შეზღუდვები ეკონომიკას აზარალებს, ამიტომ, ეპიდვითარების შესაბამისად, ეტაპობრივად, შეზღუდვები უნდა დავიყვანოთ მინიმუმადე და შემდგომ უნდა დავიწყოთ წერტილოვანი შეზღუდვები. წერტილოვანი შეზღუდვები სადაც საჭირო იქნება მთელი ქვეყნის მაშტაბით, რადგან თუ ჩვენ ქვეყანა სრულად გავხსენით, ისევ დაგვიბრუნდება სიკვდილიანობის შემზარავი რიცხვები.
რაც შეეხება სიკვდილიანობას; ჩვენ ვხედავთ, რომ სიკვდილიანობის მაჩვენებელი სამკვირიანი შეზღუდვების მიუხედავად, კვლავ მაღალია… სამწუხაროდ, საახალწლოდ კიდევ გაგრძელდება, გაიზრდება, შემდგომ კი ნელ-ნელა დაიკლებს…
შეზღუდვებით მოპოვებული კლებადი სტატისტიკა არის ძალიან ფაქიზი _ გახსნით შეიძლება ეს მონაპოვარი ერთ დღეში დაიკარგოს. ამიტომ, ძალიან ფრთხილები უნდა ვიყოთ. არ უნდა გვქონდეს ეიფორია, რომ ვირუსი აღარ არის.. ვირუსი არსად წასულა და საშუალება რომ მისცე, ისევ გავრცელების რამდენიმეათასიან მაჩვენებელს დაუბრუნდება. ღმერთმა დაგვიფაროს და ახლა, მოცემულ მომენტში საქართველოში რომ მოხვდეს ამ ვირუსის ბრიტანული შტამი, საერთოდ ვერ გაუძლებს ჩვენი ჯანდაცვის სისტემა.
აქედან გამომდინარე, ძალიან ფრთხილად უნდა ვიყოთ, არ უნდა ავყვეთ ილუზიას, რომ ყველაფერი კარგად არის. ქვეყანა არავითარ შემთხვევაში არ უნდა გაიხსნას. კიდევ გვინდა ცოტა დრო, რომ დავწიოთ ცუდი მაჩვენებლები ქვემოთ. მანამდე კი გვჭირდება ხელმისაწვდომი კარგი ხარისხის სამედიცინო პირბადეები დაბალ ფასში, გვჭირდება დიტანცირება ერთმანეთისგან, სხვა გამოსავალი არ გვაქვს!
