მიუხედავად იმისა, რომ ჩვენს ქვეყანაში პოლიტიკური დღის წესრიგი საკმაოდ არეულია და საპარლამენტო არჩევნების მიმართ ოპოზიციიდან წამოსული პროტესტი ადგილობრივი თვითმმართველობის არჩევნების ჩატარების ლეგიტიმურობას დიდ საფრთხეს უქმნის, მმართველი ძალა დროს მაინც არ კარგავს _ რამდენიმე დღის წინ, საპარლამენტო უმრავლესობის წევრმა სოზარ სუბარმა განაცხადა, რომ თვითმმართველობის არჩევნებისთვის მზადება დაიწყო.
ბუნებრივია, მზადება ერთია და მეორეა, თუ რა პროცესები განვითარდება ქვეყანაში და რამდენად იქნება მზად ოპოზიციური სპექტრი, მონაწილეობა მიიღოს მომავალ არჩევნებში. ესეც რომ არა, კვლავაც ღიად რჩება ოპოზიციის მხრიდან პარლამენტში შესვლის და ხელისუფლების მხრიდან საარჩევნო რეფორმების საკითხიც.
ეს პროცესი და კომპრომისის მიღწევა რომ რთული გზის გავლას მოითხოვს, კარგად ჩანს და საერთაშორისო მედიატორთა ძალისხმევა რა შედეგს გამოიღებს, ამას ის მოლაპარაკებები გვიჩვენებს, რომლებიც ამ დღეებში დაიწყო ხელისუფლებასა და ოპოზიციას შორის.
თუმცა, სანამ რამე შედეგი დაიდება, სოზარ სუბარმა უკვე გააჟღერა “ქართული ოცნების” გეგმები და აღნიშნა, რომ დაიწყო კონსულტაციები მერობისა და მაჟორიტარობის კანდიდატებთან დაკავშირებით:
“ქართულმა ოცნებამ” მზადება დაიწყო თვითმმართველობის არჩევნებისთვის. ამავდროულად, დაიწყო კონსულტაციები კანდიდატებთან დაკავშირებით _ მერების კანდიდატები, მაჟორიტარობის კანდიდატები, თუ საარჩევნო სიები, ვინც იქნებიან თბილისშიც, რეგიონებშიც… როგორც იცით, ახალი თვითმმართველობის კოდექსში ძალიან სერიოზული ცვლილებები შედის და შესაბამისად, მომზადებას მეტი დრო სჭირდება”, _ განაცხადა სოზარ სუბარმა.
ბუნებრივია, ადგილობრივი თვითმმართველობის თემატიკა, თბილისის მსგავსად, რეგიონებშიც ძალიან აქტუალურია და კულუარებში გარკვეული შიდა დინებები და მითქმა-მოთქმა უკვე დაწყებულია. ამ მხრივ, გამონაკლისი არც ლანჩხუთის მუნიციპალიტეტია, სადაც მოსალოდნელ კანდიდატთა ვინაობებზე, სხვადასხვა ვერსიები ვრცელდება.
დავიწყოთ იმით, რომ მოქმედი მერის, ალექსანდრე სარიშვილის პოზიციები არც თუ ისეთი მყარია, როგორიც, თუნდაც, ორი წლის წინ იყო. ერთი შეხედვით, ეს ასე ჩანს და ზედიზედ მეორედ მერობის კანდიდატად მისი დასახელება, მთლად გადაწყვეტილი საქმე არ უნდა იყოს. მართალია, მისი მმართველობის პერიოდში “ქართულ ოცნებას” ლანჩხუთში არჩევნებზე საკმაოდ კარგი შედეგები ჰქონდა და ამ კუთხით, სარიშვილს ჯილდოც კი ეკუთვნის, მაგრამ ერთია ეს შედეგები და მეორეა ის რეალობა, რომელიც დღესდღეობით არსებობს.
შედის თუ არა ლანჩხუთის მოქმედი მერის პირად გეგმებში მეორე ვადით იყოს მუნიციპალიტეტის პირველი პირი და ხელმეორედ ჩაერთოს საარჩევნო მარათონში, ამასთან დაკავშირებით ინფორმაციის მიღება ალექსანდრე სარიშვილისგან გვსურდა. თუმცა, ბატონი მერი, როგორც ჩანს, ბოლო რამდენიმე თვეა, ჩვენ მიმართ მწყრალადაა და სატელეფონო ზარებზე არ გვპასუხობს.
ფაქტია, რომ ამ პოსტზე მმართველი ძალის კანდიდატობის მსურველი ადამიანების რიცხვი დიდი იქნება და გვარიანი ბრძოლაც წავა. ჩვენი ინფორმაციით, მერობის ამბიციები საკრებულოს მოქმედ თავმჯდომარეს, ბესიკ ტაბიძესაც აქვს _ მისი პერსონის ირგვლივ ადრეც იყო საუბარი და მას შემდეგ რაც, საპარლამენტო არჩევნებზე ლანჩხუთის საარჩევნო შტაბი მას ჩააბარეს, ერთი-ორად ამაღლდა შანსები, მით უმეტეს, რომ არჩევნების შედეგების კუთხით, არც მას დაეწუნება რამე და იმ ტერიტორიულ ერთეულში, სადაც იგი ცხოვრობს, შედეგები ყოველთვის შთამბეჭდავია.
თავად ბესიკ ტაბიძე “გურია ნიუსთან” სატელეფონო საუბარში გამოკვეთილად არ აფიქსირებს, რომ მერობის ამბიციები აქვს, თუმცა, არც გამორიცხავს მსგავს ფაქტს.
_ ბატონო ბესო, გვაქვს ინფორმაცია, რომ მომავალი თვითმმართველობის არჩევნებზე, ლანჩხუთში მერობის კანდიდატად თქვენც განიხილებით. როგორია თქვენი სურვილი?
_ ამასთან დაკავშირებით მე ჯერ ინფორმაცია არ მაქვს. ვმუშაობ იქ, სადაც ვმუშაობ და თუ რამე სიახლეები იქნება, აუცილებლად ჩაგაყენებთ საქმის კურსში, _ გვითხრა ტაბიძემ..
მას შემდეგ, რაც ქვეყნის პრემიერის პოსტზე ირაკლი ღარიბაშვილი დაბრუნდა, ლანჩხუთში ბევრს გაუჩნდა ლანჩხუთის ყოფილი პირველი პირის, ზაზა ურუშაძის პოლიტიკაში მეორედ მოსვლის მოლოდინი. საზოგადოების გარკვეულ ნაწილში გაჩნდა მოსაზრებები, რომ იმ ადამიანთა შორის, ვინც მმართველი ძალიდან მერობის კანდიდატობაზე ფიქრობს, ზაზა ურუშაძეცაა, რომელიც ახლა, ძირითადად, ბიზნესსაქმიანობითაა დაკავებული. თავად ურუშაძე კი ამბობს, რომ ამ ეტაპისთვის პოლიტიკაში დაბრუნებაზე არ უფიქრია, თუმცა, ამის შესაძლებლობასაც არ გამორიცხავს:
“სიმართლე გითხრათ, ამ თემაზე არ მიფიქრია _ უფრო ბიზნესში ვარ. არ ვიცი, რა იქნება, თვითმმართველობის არჩევნებამდე ჯერ კიდევ დროა”, _ ამბობს “გურია ნიუსთან” სატელეფონო კომენტარში ზაზა ურუშაძე.
“ქართულმა ოცნების” განცხადებასთან დაკავშირებით, რომ მზადება დაიწყო თვითმმართველობის არჩევნებისთვის, შეფასებების გაკეთება ადგილობრივი ოპოზიციური სპექტრის წარმომადგენლებსაც ვთხოვეთ.
“ერთიანი ნაციონალური მოძრაობის” ლანჩხუთელი ლიდერის კახა ასკურავას შეფასებით, იმ ფონზე, რა მდგომარეობაშიც ახლა მმართველი ძალაა, თვითმმართველობის არჩევნებზე საუბარი ღიმილის მომგვრელია:
“თუ ახლა ვინმე იმას დაიჯერებს, რომ “ქართულ ოცნებას” ადგილობრივი თვითმმართველობის არჩევნების კონსულტაციებისთვის სცალია და მართლა მაგიტომ შეიკრიბა, მართლა გამეღიმება. რა სისულელეა, რომელ თვითმმართველობის არჩევნებზეა ლაპარაკი, როცა არ იციან, ხელისუფლება როდის დაემხობათ თავზე?! სოზარ სუბარის ბოდვა იყო ეს, შეიკრიბნენ ფარული ჩანაწერებისა და ქვეყანაში არსებული პოლიტიკური, სოციალური, ეკონომიკური და ყველანაირ პრობლემაზე სასაუბროდ და მიზეზად ეს თქვეს საკუთარი ამომრჩევლის გასამაგრებლად”, _ ამბობს კახა ასკურავა.
რაც შეეხება “ევროპული საქართველოს” ადგილობრივი ორგანიზაციის თავმჯდომარის, ირაკლი მარშანიშვილის პოზიციას, მისი თქმით, “ოცნება” მერობის კანდიდატად მას დაასახელებს, ვისაც მაჟორიტარი დეპუტატი ვასილ ჩიგოგიძე გამოუცხადებს ნდობას:
“ქვეყანაში არსებული რთული პოლიტიკური დღის წესრიგიდან გამომდინარე, არარეალური ჩანს ის, რაც სოზარ სუბარმა თქვა თვითმმართველობის არჩევნების მზადებასთან დაკავშირებით. თუმცა, ისიც ფაქტია, რომ ბიძინა ივანიშვილი ხელისუფლების დათმობას არ აპირებს ასე მარტივად. რა და როგორ იქნება 16 მარტს გამოჩნდება. რაც შეეხება მერობის შესაძლო კანდიდატს “ოცნებიდან”, ის იქნება, ვისაც ნდობას დეპუტატი ჩიგოგიძე გამოუცხადებს”, _ ამბობს მარშანიშვილი.
