რუსეთის საოკუპაციო ძალები უკრაინის აღმოსავლეთ ნაწილს კვლავ აქტიურად უტევენ. გვიან ღამით იერიში ხარკოვზე მიტანეს. დაიბობმა კლუგინო-ბაშკიროვკის დასახლება. სამიზნეში ისევ დასახლებული კვარტალი და მრავალსართულიანი საცხოვრებელი კორპუსი მოექცა.
ამ დროისთვის ცნობილია ერთი დაშავებული ქალის შესახებ. რაც შეეხება ფრონტის სამხრეთ ფლანგს, უკრაინის გენშტაბში აცხადებენ, რომ რუსეთმა ზაპოროჟიეს ოლქიდან სამხედროების გაყვანა დაიწყო და ემზადება ზაპოროჟიეს ოლქის საოკუპაციო პერსონალის გასაყვანად. უკრაინის გენშტაბი ასევე იუწყება, რომ უკრაინელმა სამხედროებმა წარმატებას მიაღწიეს ზაპოროჟიეს ოლქში რამდენიმე მიმართულებით და მტრის დანაკარგი 230 ადამიანს შეადგენს. განადგურებულია 15 ერთეული სხვადასხვა ტიპის სამხედრო ტექნიკა და ტყვია-წამალი.
უკრაინა რუსეთს ისევ აკრძალული იარაღის გამოყენებაში ადანაშაულებს. სამხედრო უწყების ცნობით, ქვეყნის დასავლეთ ნაწილში, ლვოვისა და ხმელნიცკის რაიონებში რუსული ფრთოსანი რაკეტების აუფეთქებელი ქობინები ნახეს, რომელთა სამიზნე, დიდი ალბათობით, უკრაინული ჰაერსაწინააღმდეგო სისტემა იყო.
„ჩვენი დასკვნით ეს ფრაგმენტი არის „იქს 55“ ტიპის ფრთოსანი რაკეტის ნაწილი. ის საბჭოთა წარმოებისაა და მისი მიზანი სტრატეგიული ობიექტების განადგურებაა, რომელთა კოორდინატები წინასწარ დგინდება. ასეთი რაკეტების გამოყენების მიზანი ჰააერსაწინააღმდეგო სისტემის გააქტიურება და სხვა სამიზნეებიდან მისი ყურადღების მოდუნებაა. ამასთან ასეთი ქობინიანი რაკეტა სერიოზულ საფრთხეს წარმოადგენს. კვლევის დროს მის სიახლოვეს რადიაციული ფონიც შევნიშნეთ“, – განაცხადა უკრაინის შეიარაღებული ძალების წარმომადგენელმა, მიკოლა დანილიუკმა.
