სოციალურ ქსელებში გავრცელდა ვიდეო, სადაც ასახულია, როგორ აწევინებს მამა 2-3 წლის ასაკის ბავშვს სიგარეტს. აღნიშნულმა ვიდეომ სოციალური ქსელების მომხმარებლების აღშფოთება გამოიწვია.
აღნიშნულ ფაქტს სახალხო დამცველი და სოციალური მომსახურების სააგენტო სწავლობს.
„გურია ნიუსთან“ საუბრისას კი „თამბაქოს კონტროლის ალიანსის“ თავმჯდომარე, გიორგი ბახტურიძე აცხადებს, რომ მსგავსი ქმედება სისხლის სამართლის დანაშაული უნდა იყოს.
„ბოლო პერიოდში გავრცელდა კადრები, როგორ აწევინებენ უპასუხისმგებლო მშობლები თავიანთ შვილებს სიგარეტს, 2-3 წლის ასაკის ბავშვებზეა საუბარი. მე ვიტყოდი, რომ ეს უნდა იყოს სისხლის სამართლის დანაშაული და ასეთ მშობლებს ბავშვები უნდა ჩამოერთვათ. პირველ შემთხვევაში, უნდა იყოს მკაცრი საჯარიმო სანქცია, ხოლო განმეორებით შემთხვევაში ეს ბავშვები უნდა განერიდონ ამ ოჯახებს და გადაეცეთ იმ ოჯახებს, რომლებიც, წლების განმავლობაში ნატრულობენ შვილს და ვერ მოახერხეს რომ ჰყოლოდათ. ვისაც აქვს ბავშვების მოვლის, ჯანმრთელობის შენარჩუნების და მათზე ზრუნვის საშუალება, მათ უნდა გადაეცეთ ეს ბავშვები“,_ ამბობს ბახტურიძე.
უნდა შეფასდეს თუ არა მსგავსი ქმედება სისხლის სამართლის დანაშაულად, რა შემთხვევებში უნდა მიიღოს სასამართლომ მშობლების უფლება-მოსილების შემაჩერებელი ან შემზღუდავი გადაწყვეტილება, იცავს თუ არა კანონი არასრულწლოვანს_ ამ საკითხზე სასაუბროდ „გურია ნიუსი“ „ახალგაზრდა ადვოკატების“ იურისტს, ია გოგნაძეს დაუკავშირდა.
იურისტის თქმით, აღნიშნული პრობლემა ოჯახში სპეციალისტების ჩარევით უნდა აღმოიფხვრას, ხოლო მშობლების სისხლის სამართლის პასუხისგებაში მიცემა ბავშვს დამატებით ფსიქოლოგიურ დარტყმას მიაყენებს.
„სოციალურ ქსელში გავრცელებული ვიდეო ჩანაწერები, რომლებიც ბავშვების მიმართ შეურაცხმყოფელი კადრებით გამოირჩეოდა, ჩვენთვის, ისევე როგორც საზოგადოების დიდი ნაწილისთვის, რასაკვირველია, მიუღებელია. ასეთი ფაქტის გამოვლენის შემთხვევაში სოციალური მომსახურების სააგენტო ვალდებულია მყისიერი რეაგირება მოახდინოს, რაც განახორციელა. ესტუმრა ოჯახს და გაესაუბრა მშობლებს. როგორც აღმოჩნდა, დედას ამ ფაქტთან დაკავშირებით ინფორმაცია საერთოდ არ გააჩნდა და სოციალური ქსელით გაიგო. თავადაც მომხდარით გაოგნებული იყო. ბავშვის ნორმალური განვითარებისთვის ჯანსაღი ოჯახური ურთიერთობები აუცილებელია, სახელმწიფომ მაქსიმალურად უნდა ეცადოს გამოავლინოს და აღმოფხვრას ბავშვთა მიმართ ძალადობა და მიმართოს შესაბამის ზომებს, თუმცა პირველივე ჯერზე რადიკალური ზომების გამოყენება დაუსაბუთებელი და მიუღებელია. პრობლემა უნდა აღმოიფხვრას სპეციალისტების ჩარევით და არა მშობლის სისხლის სამართლებრივ პასუხისგებაში მიცემით, რაც ბავშვს კიდევ ერთ დიდ ფსიქოლოგიურ დარტყმას მიაყენებს და გამოიწვევს არასასურველ შედეგებს. ასეთი ქმედება რა თქმა უნდა არ იქნება შედეგზე ორიენტირებული. მშობლის უფლების ჩამორთმევა და მშობლის სისხლის სამართლებრივ პასუხისგებაში მიცემა ან ბავშვის განრიდება ოჯახიდან უკანასკნელი ზომა უნდა იყოს, რასაც სახელმწიფო გამოიყენებს ბავშვთა მიმართ ძალადობის აღმოსაფხვრელად“,_ამბობს გოგნაძე.
მისივე თქმით, ბოლო დროს მომხდარი მოვლენების მიხედვით, საქართველოში ბავშვების მიმართ ძალადობა აქტუალური საკითხია. ძალადობის გახორციელება კი რამდენიმე გზითაა შესაძლებელი. ძალადობის მსხვერპლ ბავშვებს კი ფიზიკური და ფსიქიკური განვითარების დარღვევები აეღნიშნებათ.
„ბოლო დროს საქართველოში მომხდარი მოვლენების გათვალისწინებით, აქტუალური საკითხია, ზოგადად, ბავშვთა მიმართ ძალადობა ოჯახში. ბავშვზე ძალადობა რამდენიმე ფორმით შეიძლება გახორციელდეს. ესენია :_ ფიზიკური, ემოციური, სექსუალური ძალადობა ან ბავშვის უგულებელყოფა. ბავშვები, რომლებიც ძალადობას განიცდიან ფიზიკური და ფსიქიკური განვითარების დარღვევები ხშირ შემთხვევაში აღენიშნებათ. ის მოთხოვნები, რაც ბოლო დროს სოციალური ქსელით თუ მედია საშუალებით გვესმის, მიმაჩნია, რომ შედეგზე ორიენტირებული არ არის და რადიკალური ზომების გატარებას გულისხმობს“,_ამბონს გოგნაძე.
ია გოგნაძე აღნიშნავს, რომ სახელმწიფოს მიერ მიღებული არასრულწლოვანთა მართლმსაჯულების კოდექსი, მაქსიმალურად ორიენტირებულია არასრულწლოვანთა უფლებების დაცვაზე,
„ბავშვთა უფლებების დაცვის კუთხით, სახელმწიფოს მიერ გატარებული რეფორმები პოზიტიურ ცვლილებად უნდა მივიჩნიოთ. კერძოდ, ამოქმედდა არასრულწლოვანთა მართლმსაჯულების კოდექსი, რომელიც მაქსიმალურად ორიენტირებულია არასრულწლოვანთა უფლებების დაცვაზე. ბავშვთა მიმართ ძალადობის გამოსავლენად და მის აღმოსაფხვრელად აქტიურად მუშაობს სოციალური მომსახურების სააგენტოც. თუმცა, საზოგადოების დიდი ნაწილი მოძალადე მშობლების მიმართ რადიკალური ზომების გატარებას მოითხოვს, როგორიცაა მათი სისხლის სამართლის პასუხისგებაში მიცემა, მშობლის სტატუსის ჩამორთმევა ან შეზღუდვა. აღნიშნული ქმედებების გატარება უკანასკნელი ზომა არის, რის შესახებაც გადაწყვეტილება გამოაქვს სასამართლოს. მას უნდა მიმართოს მეურვეობისა და მზრუნველობის ორგანომ ან 14 წელს მიღწეული ასაკის ბავშვის ინიციატივით მოხდეს უფლება-მოსილების შეზღუდვა-ჩამორთმევა“,_ამბობს გოგნაძე.
როგორც „ახალგაზრდა ადვოკატების“ იურისტი ამბობს, საქართველოს კანონმდებლობის მიხედვით, მშობლის სტატუსი ჩამოერთმევა მშობელს, რომელიც სისტემატიურად თავს არიდებს მშობლის მოვალეობის შესრულებას ან მშობლის უფლებებს არასათანადოდ იყენებს.
„მშობელს, რომელიც სისტემატიურად თავს არიდებს მშობლის მოვალეობის შესრულებას და არაჯეროვნად იყენებს მშობლის უფლებებს, ბავშვს უხეშად ექცევა, მასზე უარყოფით გავლენას ახდენს ამორალური საქციელით, ქრონიკული ალკოჰოლიკი ან ნარკომანია, თუ ბავშვი ჩააბა ანტისაზოგადოებრივ ქმედებაში. ანტისაზოგადოებრივ ქმედებად იგულისხმება მათხოვრობა, მაწანწალობა_ მას ჩამოერთმევა საქართველოს კანონმდებლობის მიხედვით მშობლის ყველა უფლება და მოვალეობა“,_ამბობს გოგნაძე.
