თბილისის ყოფილი მერი დავით ნარმანია, გუშინ რიგგარეშე სესიის პლენარულ სხდომაზე, საქართველოს პარლამენტის წევრებმა ,,სემეკის“ თანამშრომლად დაამტკიცეს. ნარმანია ,,სემეკის“ წევრის თანამდებობას 6 წლის განმავლობაში დაიკავებს. თბილისის ყოფილი მერის მიერ ახალი პოსტის დაკავებას, პოლიტოლოგი რამაზ საყვარელიძე ,,გურია ნიუსთან“ გამოხმაურა. როგორც საყვარელიძემ ჩვენთან საუბრისას აღნიშნა, ,,სემეკში“ თანამშრომლებს კომფორტის შექმნის საშუალება აქვთ. პოლიტოლოგის თქმით, მას თავად შურს ნარმანიასი, რადგან, ,,სემეკში“ ყველა თანამშრომელს მაღალი ხელფასი აქვს.
,,სემეკში ყველა თანამშრომელს მაღალი ხელფასი აქვს, ამიტომ მშურს ნარმანიასი. ვფიქრობ, ნარმანია წარუმატებელი მერი არ იყო, უბრალოდ, მან ყველა დაპირების შესრულება ვერ შეძლო. გარდა ამისა, ეფექტური არ იყო პიარის თვალსაზრისით. ის, რომ პოლიტიკოსი ,,სემეკში“ ინაცვლებს და აქ აგრძელებს მუშაობას ახალი არ არის. თუ გავიხსენებთ, ,,ნაციონალურ მოძრაობაობის„ გუნდმა თავისი წევრი დანიშნა ,,სემეკში“, იმის გამო, რომ ეს ადამიანი ხალხს ნერვებს უშლიდა. ალბათ, სემეკი ადვილად მოსაყუჩებელი ადგილია კომფორტის შესაქმნელად. ,,ქართულ ოცნებას“ ნარმანია ქუჩაში უნდა დეტოვებინა ან თანამდეობაზე დაესვა. ქუჩაში დატოვების მიზეზი კი არ არსებობდა, იმიტომ, რომ არაფერი გაუფუჭებია“, _ განაცხადა რამაზ საყვარელიძემ.
შეგახსენებთ, რომ საქართველოს ენერგეტიკისა და წყალმომარაგების მარეგულირებელი ეროვნული კომისიაში სულ 4 წევრი შედის – თავმჯდომარე და კომისიის 3 წევრი, რომელთა ანაზღაურება თვიურად, დაახლოებით, 13 000 ლარია.
აღსანიშნავია, რომ ,,სემეკის“ კომისიის ხელმძღვანელს ირინა მილორავას 2016 წელს ხელფასის სახით 147 550 ლარი აქვს აღებული, რაც თვიურად, დაახლოებით, 12 300 ლარს უდრის. გარდა ამისა, სემეკის კომისიის წევრმა გოჩა შონიამ 146 550 ლარი მიიღო, რაც თვეში, დაახლოებით, 12 200 ლარია. კომისიის მეორე წევრის გიორგი ფანგანის წლიურმა შემოსავალმა 160 700 ლარი შეადგინა, რაც თვეში, დაახლოებით, 13 400 ლარია.
გეტყვით, რომ მონაცემების გათვალისწინებით, საქართველოს ენერგეტიკისა და წყალმომარაგების მარეგულირებელი ეროვნული კომისიაში თბილისის ყოფილი მერის ხელფაისი, დაახლოებით, 13 000 ლარი იქნება. დავით ნარმანიას ხელფასი თბილისის მერის პოსტზე ყოფნის დროს, დაახლოებით, 3 200 ლარი იყო.
