ადგილობრივი ბიუჯეტების დიდი ნაწილი სოციალურ პროგრამებზე იხარჯება. თუმცა, ინფორმაცია, როგორ და რაზე იხარჯება საბიუჯეტო სახსრები ამ მიმართულებით, წლიდან წლამდე, გაუმჭვირვალე და საზოგადოებისთვის გაუგებარი ხდება.
ჩვენ ოფიციალურად მოვთხოვეთ ოზურგეთის, ჩოხატაურის და ლანჩხუთის მუნიციპალიტეტის მერიებს მოეწოდებინათ დეტალური ინფორმაცია, თუ კონკრეტულად რომელ პროგრამებს დააფინანსებენ ბიუჯეტიდან. უფრო კონკრეტულად კი, 2026 წლის 3 თებერვალს საჯარო ინფორმაციის გამოთხოვის მიზნით გაგზავნილ წერილში ვწერდით: „მოგვაწოდეთ ინფორმაცია, 2026 წლის ბიუჯეტით, რამდენი ლარია გამოყოფილი ადგილობრივ სოციალურ მუნიციპალურ პროგრამებზე; რა პროგრამებია გათვალისწინებული; ვისზე გაიცემა და ვის ეხება ეს პროგრამები; ასევე, მოგვწერეთ, ვინ იღებს გადაწყვეტილებებს, თუ ვისზე უნდა გაიცეს პროგრამული დახმარებები, რა კრიტერიუმების მიხედვით; მოგვაწოდეთ ინფორმაცია რამდენი სოციალურად დაუცველია თქვენს მუნიციპალიტეტში საერთოდ და მათგან რამდენია მუნიციპალური პროგრამების ბენეფიციარი. ასევე, მიგვითითეთ, ვინ, რომელი სამსახურია პასუხისმგებელი სოციალური მუნიციპალური პროგრამების გახორციელების მონიტორინგზე (შესაბამისი სამსახურის პასუხისმგებელი პირის ვინაობის და საკონტაქტო მონაცემების მითითებით)“.
სწორედ ამ კითხვებზე გვინდოდა პასუხების მიღება, რომ საზოგადოებისთვის სრულყოფილი ინფორმაცია მიგვეწოდებინა,
ამ ეტაპზე, პასუხი მხოლოდ ჩოხატაურის მუნიციპალიტეტის მერიიდან მივიღეთ. სამწუხაროდ, მათი პასუხი არასრული და მინიმალური ინფორმაციის შემცველია. გთავაზობთ ჩოხატაურის მერიიდან მიღებულ პასუხს:
„ თქვენი წერილის (No CA00412601862131) პასუხად გაცნობებთ, რომ ჩოხატაურის მუნიციპალიტეტი, 2025 წლის 26 დეკემბრის No23 დადგენილებით დამტკიცებული „ჩოხატაურის მუნიციპალიტეტის 2026 წლის ბიუჯეტიდან სოციალური დახმარების გაცემის წესის“ შესაბამისად, ახორციელებს 29 მიზნობრივ პროგრამას.
2025 წლის განმავლობაში: სამედიცინო მომსახურებისა და მედიკამენტების შეძენაზე დახმარებით ისარგებლა 2 869 ბენეფიციარმა. აღნიშნული პროგრამა აერთიანებს სხვადასხვა კატეგორიის ბენეფიციარებს, მათ შორის: ონკოლოგიურ პაციენტებს, შშმ პირებს, ბავშვებს, ომის ვეტერანებს და სხვა მიზნობრივ ჯგუფებს.
ფინანსური დახმარება (როგორც ერთჯერადი, ისე ყოველთვიური პროგრამების ფარგლებში) გაეწია 664 ბენეფიციარს.
რაც შეეხება პროგრამების განხორციელების მონიტორინგს, აღნიშნულ პროცესს კოორდინაციას უწევს მუნიციპალიტეტის მერიის სოციალური და ჯანდაცვის სამსახური.
დამატებით გაცნობებთ, რომ სოციალურად დაუცველთა საერთო მონაცემების შესახებ ინფორმაციის დამუშავება და ადმინისტრირება წარმოადგენს სსიპ “სოციალური მართვის სააგენტოს” უფლებამოსილებას. მუნიციპალიტეტის გაფორმებული მემორანდუმის ფარგლებში, სარგებლობს აღნიშნული მონაცემთა ბაზით მხოლოდ ოპერაციულ დონეზე — კონკრეტული მუნიციპალური პროგრამების ადმინისტრირების მიზნით. შესაბამისად, ინფორმაციას სოციალურად დაუცველთა რაოდენობის შესახებ გასცემს შესაბამისი უწყება“, _ აღნიშნულია ჩოხატაურის მუნიციპალიტეტის მერიის მიერ გამოგზავნილ წერილში.
ათ მილიონიანი რეაბილიტაცია, რომლის დასრულების ვადა კომპანიას სამჯერ გაუგრძელდა
საჯავახო–ჩოხატაური–ოზურგეთის დამაკავშირებელი გზის მშენებლობა, რომელიც 2024 წელს დაიწყო და 2025 წლის მაისში უნდა დასრულებულიყო, ჯერაც დაუსრულებელია. ჩვენ მიერ გადამოწმებული ინფორმაციით, ნებისმიერი ტრასპორტი საჯავახო-ჩოხატაურის გზაზე ისევ სოფელ ტოლების შემოვლითი გზით გადაადგილდება.
საჯავახო-ჩოხატაურის დამაკავშირებელი გზა სასიცოცხლოდ მნიშვნელოვანია მოსახლეობისთვის და ყველა ელოდება, თუ როდის დასრულდება დროში გაწელილი რეაბილიტაციის პროცესი, რომელიც მოქალაეებს ბიუჯეტიდან გახარჯულ ათ მილიონ ლარამდე უჯდება.
„როდის დაიწყო საჯავახო-ჩოხატაური-ოზურგეთის დამაკავშირებელი გზის მშენებლობა/რეაბილიტაცია;
_ თქვენ მიერ გამოცხადებულ ტენდერში რამდენი კომპანია მონაწილეობდა და რომელმა კომპანიამ მოიგო ტენდერი;
_ ამჟამად რომელი კომპანია აგრძელებს სამუშაოებს პროექტის დასასრულებლად;
_ ასევე, მოგვწერეთ რამდენი მილიონი ლარი იყო გამოყოფილი პროექტის გასახორციელებლად. მოგვწერეთ რა იყო მიზეზი, რის გამო გამარჯვებულმა კომპანიამ ვერ შეასრულა ნაკისრი ვალდებულებები“, _ ამ კითხვებით საქართველოს საავტომობილო გზების დეპარმენტს 20 იანვარს მივმართეთ. დეპარტამენტის მიერ მოწერილ პასუხში აღნიშნულია, რომ “შიდასახელმწიფოებრივი მნიშვნელობის საჯავახო – ჩოხატაური – ოზურგეთი – ქობულეთის საავტომობილო გზის კმ 0+000-კმ7+200 მონაკვეთის სარეაბილიტაციო სამუშაოებზე გამოცხადებულ ტენდერში მონაწილეობა მიიღო ორმა კომპანიამ, რომელთაგანაც გამარჯვებული გახდა უცხოური საწარმოს ფილიალი, „ჯეო კონსტრაქშენ ენდ სისტემს ინკ საქართველოს ფილიალი“ (ს/ნ 400359660) (შემდგომში – კომპანია). დეპარტამენტსა და კომპანიას შორის 2024 წლის 6 აგვისტოს გაფორმდა სახელმწიფო შესყიდვის შესახებ ე.ტ. № 77-24 ხელშეკრულება (NAT240010488) და კომპანიამ სამუშაოების წარმოება დაიწყო 2024 წლის 20 აგვისტოს. დღეის მდგომარეობით ისევ კომპანია აგრძელებს სამუშაოებს, რომლის ღირებულება შეადგენს 7 903 223.41 ლარს, დღგ-ს ჩათვლით.
კომპანიას სამჯერ გაუგრძელდა სამუშაოების დასრულების ვადა, რადგან საჭირო გახდა შესაბამისი საპროექტო ცვლილებების განხორციელება, რასაც თავისთავად დასჭირდა გარკვეული დრო. შიდასახელმწიფოებრივი მნიშვნელობის (შ-2) საჯავახო – ჩოხატაური – ოზურგეთი – ქობულეთის საავტომობილო გზის კმ 32(31+541)-ზე, მდ. ნადინებზე არსებული დაზიანებული სახიდე გადასასვლელის სარეაბილიტაციო სამუშაოებზე გამოცხადებულ ტენდერში მონაწილეობა მიიღო ორმა კომპანიამ, რომელთაგანაც გამარჯვებული გახდა შპს „ჯი ვი თი ჯგუფი“ (შემდგომში – კონტრაქტორი). დეპარტამენტსა და კონტრაქტორს შორის 2024 წლის 1 მარტს გაფორმდა სახელმწიფო შესყიდვის შესახებ ე.ტ.#30-24 ხელშეკრულება (NAT230026989) და სახელშეკრულებო ღირებულება არის 1 777 526.96 ლარი. დღეის მდგომარეობით სამუშაოები დასრულებულია. ზემოაღნიშნული ხელშეკრულებები და მათ ფარგლებში შესრულებულ სამუშაოებთან დაკავშირებით სხვა დამატებითი ინფორმაცია, შეგიძლიათ იხილოთ სახელმწიფო შესყიდვების სააგენტოს ვებ-გვერდზე: https://procurement.gov.ge“, – აღნიშნულია მათ მიერ მოწოდებულ ინფორმაციაში.
კლუბი თუ გზა _ მოსახლეობის დიდი ნაწილი უგზოობის პრობლემის მოგვარებას ითხოვს
ოზურგეთის მუნიციპალიტეტში სოფლის კრებები 17 თებერვალს დაიწყო და დაახლოებით ერთ თვეს გაგრძელდება. პირველი კრება დაბა ლაითურში გაიმართა.
სოფლის კრებები ყველა სოფელში უნდა ჩატარდეს, თუმცა, მოსახლეობა ხშირად წუხს, რომ ამ კრებებს მხოლოდ ფორმალური სახე აქვს და მოსაგვარებელი პრობლემები წინასწარაა განსაზღვრული. “გურია ნიუსი“ არაერთხელ წერდა, რომ გასულ წლებში ყველა სოფელში “ერთნაირი მოთხოვნა“ ჰქონდათ – ბეტონის გზაების დაგება, მაშინაც კი, როცა სოფელს სასმელი წყალი არ ჰქონდა.
ხშირია, როცა სოფლის მოსახლეობის აზრი იყოფა პრობლემის პრიორიტეტულობა დაპირისპირების საფუძველი ხდება. ეს საკითხები იყო იმ მოქალაქეების საწუხარი, რომლებიც ოზურგეთის მუნიციპალიტეტის მერიაში სოფელ მშვიდობაურიდან მივიდნენ. სოფელ მშვიდობაურის მოსახლეობა გზების მოწესრიგებას ითხოვს. მათი მოთხოვნაა, რომ კონკრეტულად სოფელ მშვიდობაურშიც ჩატარდეს სოფლის კრების ჩატარება (სოფელი მშვიდობაური ბახვის თემში შედის).
„სოფლის მცხოვრებლების ერთ ნაწილს კლუბის გაკეთება უნდა. კლუბიც საჭიროა სოფელში, მაგრამ თუ უგზოობის პრობლემა არ გადაიჭრა, არაფერი გამოვა“, _ აღნიშნეს მშვიდობაურში მცხოვრებლებმა ოზურგეთის მუნიციპალიტეტის მერ პაატა კუნჭულიასთან მერიის ეზოში შეხვედრისას.
„შეხვედრაზე როდესაც მოვალ, ხალხი რა საჭიროებს დააყენებს, მეც იმაში დაგიჭერთ მხარს“, – შეპირდა პაატა კუნჭულია მოქალაქეებს.
ავტორი
