დღეიდან, გრიპის საწინააღმდეგო ვაქცინაცია დაიწყო.
როგორც “გურია ნიუსს” ლანჩხუთის საზოგადოებრივი ჯანდაცვის ცენტრის დირექტორმა, ნატო მენაღარიშვილმა განუცხადა, ლანჩხუთში გრიპის საწინააღმდეგო ვაქცინები პარასკევს უკვე ჩატანილი იყო და ახლა კლინიკებსა და საექიმო ამბულატორიებში გატანა მიმდინარეობს.
“გრიპის საწინააღმდეგო ვაქცინაცია დაწყებულია. მიმდინარეობს ვაქცინის კლინიკებში და საექიმო ამბულატორიებში გატანა. 2000 დოზა ვაქცინა გვაქვს ამ დროისთვის და თუ საჭირო იქნება, დამატებით დოზებს შემოვიტანთ.
ახლა მიმდინარეობს რისკჯგუფების აცრა, რომლებიც სპეციფიკურად პრიორიტეტული ჯგუფებია”,_ გვითხრა მენაღარიშვილმა.
ჩვენს კითხვაზე, თუ როგორ უნდა გრძნობდეს ადამიანის თავს, სანამ ვაქცინის გასაკეთებლად სამედიცინო დაწესებულებაში მივა, მენაღარიშვილი გვპასუხობს:
“ვაქცინაცია გრძელდება რამდენიმე თვე და თუ ახლა ადამიანი გაციებულია ან შეუძლოდ გრძნობს თავს, შეუძლია რომ გამოჯანმრთელების შემდეგ აიცრას. სასურველია და აუცილებელი, რომ ადამიანი იყოს ჯანმრთელი”,_ გვითხრა მენაღარიშვილმა.
გრიპის საწინააღმდეგო ვაქცინაციის პროცესი დაწყებულია ჩოხატაურის მუნიციპალიტეტშიც. თუმცა, ჩოხატაურის საზოგადოებრივი ჯანდაცვის ცენტრის დირექტორი, ნატო ჯიბუტი კითხვაზე, თუ რამდენი ვაქცინა მიიღეს მუნიციპალიტეტში, რაოდენობას არ აკონკრეტებს.
“დღეს დაიწყო ვაქცინაცია ჩოხატაურის ორივე კლინიკაში”,_ გვითხრა ჯიბუტმა.
კითხვაზე, თუ გრიპის საწინააღმდეგო რამდენი ვაქცინაა მუნიციპალიტეტში შეტანილი, ჯიბუტი გვპასუხობს:
“რა მნიშვნელობა აქვს თქვენთვის რაოდენობას? საკმარისია ჩვენი მოსახლეობისთვის, იმ რისკჯგუფებისთვის, ვისაც ეკუთვნის უფასო ვაქცინაცია”.
რაც შეეხება ოზურგეთის მუნიციპალიტეტს, საზოგადოებრივი ჯანდაცვის ცენტრის დირექტორის, მაია ქუტიძის თქმით, ვაქცინაციის პროცესი დაწყებულია.
“გრიპის საწინააღმდეგო ვაქცინაცია დაიწყო ყველა კლინიკაში და საექიმო ამბულატორიაში. სულ შემოსულია 2800 დოზა ვაქცინა”,_ გვითხრა ქუტიძემ.
ინფორმაციისთვის, გრიპის ვირუსის საწინააღმდეგო ვაქცინაცია რისკ ჯგუფებს, ვისაც დაავადების გართულების მომატებული რისკი აქვთ, სახელმწიფო პროგრამის ფარგლებში, უფასოდ უტარდებათ.
იმუნიზაციის სახელმწიფო პროგრამის ფარგლებში, ჯანდაცვის სამინისტრომ, 200 000 დოზა, Abbott Biologicals B.V.-ის წარმოების, ოთხ-კომპონენტიანი ვაქცინა შეიძინა,რომელიც ერთ-ერთია ჯანმოს მიერ რეკომენდებულ ვაქცინებს შორის და მორგებულია იმ შტამებზე, რომლთა ცირკულაცია მოსალოდნელია გრიპის სეზონზე.
რისკის ჯგუფის მოქალაქეების ვაქცინაცია იმუნიზაციის სერვისის მიმწოდებელ დაწესებულებებში იქნება შესაძლებელი.
უფასო ვაქცინაცია გათვალისწინებულია შემდეგი ჯგუფებისთვის:
- დიაბეტის მქონე პირები;
- დიალიზზე მყოფი პირები;
- C ჰეპატიტის მქონე პირები (მხოლოდ მკურნალობაზე მყოფნი);
- აივ ინფექცია/შიდსის მქონე პირები;
- ორგანოგადანერგილი და მუკოვისციდოზის დაავადების მქონე პირები;
- 60 წლის და უფროსი ასაკის ხანდაზმული პირები;
- ორსულები;
- ზოგადსაგანმანათლებლო დაწესებულების (სკოლები) პედაგოგები;
- ბავშვთა (მ.შ. მცირე საოჯახო ტიპის) და მოხუცთა თავშესაფრების ბენეფიციარები და მათი მომვლელი პერსონალი;
- სავალდებულო ვაქცინაციას დაქვემდებარებული მედპერსონალი და სხვა.
ავტორი
