ოზურგეთის მუნიციპალიტეტის სოფელ გომში (შემოქმედის თემი) ორი შეხვედრა გაიმართა, რომლის მთავარი თემა ბჟუჟის ხეობაში მცირე ჰესების მშენებლობა იყო.
პირველ შეხვედრაზე შპს “ენერგის” წარმომადგენლები სოფელ გომის და შემოქმედის მცხოვრებლებს შეხვდნენ.
შპს “ენერგის” დამფუძნებელმა ნიკა ჩაჩხიანმა შეხვედრის დროს თქვა, რომ ისინი მცირე ჰესის აშენებას აპირებენ:
“შეხვედრები, რომელიც დავიწყეთ სოფელში, ჩვენთვის არის მთავარი და მნიშვნელოვანი. თუ მოსახლეობის თანხმობა იქნება, დავიწყებთ მცირე ჰესის მშენებლობას”, _ თქვა შეხვედრაზე ნიკა ჩაჩხიანმა.
შეხვედრაზე მისული ადამიანების უმრავლესობა ჰესის მშენებლობის წინააღმდეგი იყო. სწორედ საუბრის დროს გახდა ცნობილი, რომ ბჟუჟის ხეობაში ორი ჰესის მშენებლობა დაიწყო.
“თუ ორი ჰესის მშენებლობაზე არ ხართ წინააღმდეგი, მაშინ კიდევ ერთი ჰესის მშენებლობის წინააღმდეგი რატომ ხართ?” _ დასვა კითხვა შეხვედრის ერთ-ერთმა მონაწილემ.
ეს ინფორმაცია შეხვედრის მონაწილეებისთვის ახალი აღმოჩნდა.
“თუ ეს სიმართლე აღმოჩნდა, მაშინ ჩვენს ხეობაში ჰესის მშენებლობის ნებას არავის არ მივცემთ”, _ ითქვა შეხვედრაზე.
“ენერგის” წარმომადგენლის თქმით, მათ ამ ეტაპზე ჰესის მშენებლობის არანაირი პროექტი არ აქვთ. პროექტზე მუშაობა მას შემდეგ დაიწყება, თუ მოსახლეობა მათ ჰესის მშენებლობის ნებას მისცემს.
მეორე შეხვედრაზე, რომელიც სოფელ გომში გაიმართა, ცნობილი გახდა, რომ მდინარე ბჟუჟის ხეობაში ორის ნაცვლად სამი მცირე ჰესის მშენებლობას შპს “პარვუს ჯგუფი” აპირებს.
“პარვუს ჯგუფის” დამფუძნებელი ზურაბ ბესელია: “ჩვენს კომპანიას ყველა ნებართვა აქვს აღებული და კანონის ფარგლებში დაგეგმილი გვაქვს სამი მცირე ჰესის მშენებლობა. ამ ეტაპზე მიმდინარეობს საპროექტო გზის მშენებლობა. კარგი იქნებოდა, უფრო ადრე შემდგარიყო ეს შეხვედრა, მაგრამ ახლაც არ არის გვიან. ჩვენ მზად ვართ, მსგავსი შეხვედრები კიდევ გავაკეთოთ. ასევე, ვაპირებთ მედიის და არასამთავრობო ორგანიზაციის წარმომადგენლებთან შეხვედრას”.
“ეკოს” დამფუძნებელმა ირმა გორდელაძემ შეხვედრის დროს აღნიშნა, რომ “2 მეგავატამდე სიმძლავრის ჰესებს არ სჭირდება გარემოს ზემოქმედების შეფასება, მაგრამ ისეთ ხეობაში იგეგმება ჰესების მშენებლობა, რომ აუცილებლად საჭიროებს გზშ და კვლევები:
თქვენ უკვე ყველაფერი გადაწყვეტილი გქონიათ და ახლა დაგეგმეთ ადგილობრივებთან შეხვედრა? ეს არის კომპანიისგან გადადგმული არასწორი ნაბიჯი. არც მოსახლეობა, მედია და გარემოს დამცველები ჩაგიყენებიათ საქმის კურსში, ჩუმად მიმდინარეობდა ურთულეს ხეობაში გზის შეყვანის სამუშაოები და მოჭრილი ხეები ფერდობებზე ყრია”, _ თქვა გორდელაძემ.
ირმა გორდელაძის ინფორმაციით, წლების წინ სწორედ მდინარე ბჟუჟის ხეობაში იგეგმებოდა 6 მეგავატამდე ჰესის მშენებლობა, მაგრამ პროექტი ჩავარდა.
“დარღვევები, ბუნდოვანება სახეზეა. შეხვედრებიც ახლა ჩაინიშნა, რადგან მედიამ, გარემოს დამცველებმა გავააქტიურეთ თემა და ასევე, უკმაყოფილოა ადგილობრივი მოსახლეობაც.
სოფელი გომი, შემოქმედი უნიკალური ტურისტული ზონაა და ბჟუჟს რომ გომის ტყეში 7 კმ-ზე მილში მოაქცევ, 8-ბალიან სეისმურ ზონაში, კვლევა არ უნდა ამას? წისქვილებს აშენებთ? რატომ არ გვინდა, დავამკვიდროთ გარემოსდაცვითი ევროპული სტანდარტები?” _ აღნიშნა ირმა გორდელაძემ.
ზურა ბესელიამ აღნიშნა, რომ გზის შეყვანის სამუშაოების დროს მწვანე ზოლს არ ეხებიან.
შეხვედრამდე რამდენიმე დღით ადრე ადგილობრივი მედიის წარმომადგენლების ერთი ნაწილი და არასამთავრობო ორგანიზაცია “ეკოს” წარმომადგენლები იმ ადგილას იმყოფებოდნენ, სადაც გზის გაყვანა მიმდინარეობს და არაერთი მოჭრილი ხე დააფიქსირეს. სოფელ გომის მკვიდრმა გია დუმბაძემ კი აღნიშნა, რომ მთა, სადაც ჰესის მშენებლობა იგეგმება, ვერ გაუძლებს დატვირთვას. ამიტომ ის არ ეთანხმება ჰესების მშენებლობას ბჟუჟის ხეობაში.
ჰესის აშენების წინააღმდეგი შეხვედრაზე არაერთი ადამიანი იყო. კომპანიის წარმომადგენლები კი საუბრობენ, რომ სამი მცირე ჰესის მშენებლობა არანაირ ზიანს არ მიაყენებს ხეობას და აღნიშნეს, რომ საინფორმაციო შეხვედრები კიდევ გაიმართება შემოქმედსა და გომში.
შეხვედრაზე, ასევე, ცნობილი გახდა, რომ მდინარე ბჟუჟის ხეობაში ჰესების მშენებლობასთან დაკავშირებით საქმის კურსში არიან ადგილობრივი ხელისუფლების წარმომადგენლები.
“გურია ნიუსი” ცდილობს ადგილობრივი ხელისუფლების წარმომადგენლებისგან კომენტარის მოპოვებას _ მათ პოზიციას აღნიშნულ თემასთან დაკავშირებით უახლოეს ხანში შემოგთავაზებთ.
ავტორი
