“მთავარი არხის” გადაცემაში “დღის სტუმარი” საქართველოს მესამე პრეზიდენტი მიხეილ სააკაშვილი ამბობს, საქართველოში ახლა ბევრად უარესი რამ ხდება, ვიდრე კოვიდია და ეს არის გაყალბებული არჩევნები.
მიხეილ სააკაშვილი ამბობს, რომ ახლა არ დგას დღის წესრიგში რომელიმე პარტიის ყოფნა-არყოფნის საკითხი, საქმე საქართველოს ყოფნა-არყოფნას ეხება.
_ გაუნათლებელმა ტიპმა, რომელმაც მოპარა ხალხს არჩევანი, 20% მიიწერა თავხედურად, ამაზე მეტი ძარცვა ხალხისა არ არსებობს, და თამარ ჟვანია, რომელიც არასამთავრობოებში იყო მაშინ, როცა ნანა დევდარიანს ადანაშაულებდა არჩევნების გაყალბებაში, ახლა კი თვითონ არის მთავარი გამყალბებელი, თუმცა, არა ერთადერთი. მნიშვნელოვანია, რომ მხოლოდ ივანიშვილი კი არ უნდა ვახსენოთ, ამ ადამიანებს აქვთ კონკრეტული გვარ-სახელები და, რასაკვირველია, მათ უნდა აგონ პასუხი, – ამბობს საქართველოს მესამე პრეზიდენტი.
მიხეილ სააკაშვილის თქმით, იმ ძარცვასთან შედარებით, რაც ხელისუფლებამ ჩაიდინა, ბადრი ესებუას ორგანიზებული ძარცვა მცირე დეტალია:
_ ის ძარცვა ამასთან შედარებით მცირე დეტალია, რადგან ივანიშვილმა ხალხს მოჰპარა არამარტო მომდევნო ოთხი წელი, მოჰპარა ქვეყნის მომავალი, საქართველო საერთოდ გაქრება, თუ მათ ეს შერჩათ ხახვივით. გავიხედოთ მარჯვნივ და მარცხნივ – უამრავი მაგალითია იმისა, რომ ხალხმა მოპარული არჩევნები დაიბრუნა. ასე მოხდა ყირგიზეთში, ასე მოხდა უკრაინაში, ასე მოხდა სომხეთში, გადავხედოთ საკუთარ ისტრიას – ასე მოხდა ჩვენთანაც და რა, ჩვენ ყირგიზებზე, სომხებზე, უკრაინელებზე ნაკლები ვართ?
მიხეილ სააკაშვილმა გაყალბების მასშტაბებსაც გაუსვა ხაზი და განაცხადა, რომ “საქმე გვაქვს ძველი ზიმბაბვესთვის, ძველი ტიპის უზბეკეთისთვის დამახასიათებელ გადაწერასთან”.
მიხეილ სააკაშვილმა კიდევ ერთხელ გაუსვა ხაზი, რომ არ აინტერესებს არანაირი თანამდებობა საქართველოში და რომ ახლა მთავარია, კვირას რუსთაველზე მოქალაქეები მივიდნენ და გააპროტესტონ არჩევნების გაყალბება.
