ოზურგეთის მუნიციპალიტეტის წლის მთავარი დოკუმენტის განხილვა საკრებულოს კომისიებში დაიწყო. 2026 წლის ბიუჯეტი 47 მილიონ 407 ათას ლარს შეადგენს.
ოზურგეთის მუნიციპალიტეტის მერიის პრესსამსახურის ხელმძღვანელის, ნინო ბახტაძის ინფორმაციით:
„ოზურგეთის მერიამ, საქართველოს საბიუჯეტო კანონმდებლობის შესაბამისად, „ოზურგეთის მუნიციპალიტეტის 2026 წლის ბიუჯეტი“ განსახილველად, საკრებულოს წარუდგინა. წლევანდელი პრიორიტეტები გახლავთ ინფრასტრუქტურის, განათლების, სპორტის, დასუფთავების, გარემოს დაცვის, სოციალურის, ჯანდაცვისა და ეკონომიკური განვითარების მიმართულებით. მომავალი წლის მთავარი საფინანსო დოკუმენტი 47 მილიონ 407 ათას ლარს შეადგენს, რომელიც აღნიშნულ პრიორიტეტებში გადანაწილდება.“
მისივე თქმით, ოზურგეთის მუნიციპალიტეტის 2026 წლის ბიუჯეტის“ საკრებულოში წარდგენამდე, ოზურგეთის მერმა პაატა კუნჭულიამ, მერის მოადგილეებმა – ბექა ჩხიკვიშვილმა, გურამ გოლიაძემ და სოფო რამიშვილმა, მერიის სამსახურებისა და განყოფილებების უფროსებთან ერთად დოკუმენტის პროგრამები განიხილეს და განსაზღვრეს დაფინანსების ოდენობა სხვადასხვა პრიორიტეტზე.
„უახლოეს პერიოდში კი იგეგმება ბიუჯეტის საჯარო განხილვა, სადაც ნებისმიერ დაინტერესებულ პირს შესაძლებლობა ექნება, დაესწროს და მოისმინოს ბიუჯეტის პრიორიტეტებისა და პროგრამების შესახებ ინფორმაცია, რომლის დაფინანსებაც იგეგმება მუნიციპალიტეტის ბიუჯეტიდან.“ – უთხრა „გურია ნიუსს“ ნინო ბახტაძემ.
რამდენად აქტიურად ჩაერთვება ადგილობრივი მოსახლეობა 2026 წლის ბიუჯეტის განხილვვის პროცესში, ამას დრო გვიჩვენებს.
ბოლო დროს მოსახლეობა ნაკლებად იყო ჩართული ბიუჯეტის განხილვაში.
