მიმდინარე წლის იანვარი-სექტემბერში, გურიაში მეხანძრე-მაშველებმა ჯამში 3 998 სამაშველო ოპერაცია განახორციელეს.
უწყებიდან “გურია ნიუსისთვის” მოწოდებული სტატისტიკური მონაცემების თანახმად, ყველაზე მეტი სამაშველო ოპერაცია აღნიშნულ პერიოდში ოზურგეთის მუნიციპალიტეტში ჩატარდა.
“გთხოვთ, კანონით დადგენილ ვადებში მომაწოდოთ ინფორმაცია, რამდენი სახანძრო-სამაშველო ოპერაცია ჩატარდა 2025 წლის იანვრიდან სექტემბრის ჩათვლით პერიოდში გურიის რეგიონში.
აქედან, რამდენი სახანძრო-სამაშველო ოპერაცია ჩატარდა ჩოხატაურის მუნიციპალიტეტში და რა სახის ?
რამდენი სახანაძრო-სამაშველო ოპერაცია ჩატარდა ოზურგეთის მუნიციპალიტეტში და რა ტიპის?
რამდენი ადამიანი გადაარჩინეს წელს ურეკში ზღვაზე მაშველებმა?
რამდენი სახანძრო-სამაშველო ოპერაცია ჩატარდა ლანჩხუთის მუნიციპალიტეტში და რა სახის?”_ ამ კითხვებით “გურია ნიუსმა” საგანგებო სიტუაციების მართვის სამსახურს მიმდინარე წლის 30 სექტემბერს მიმართა.
უწყებიდან პასუხი 13 ოქტომბერს მივიღეთ, თუმცა, მასში არ არის მითითებული ის, თუ კონკრეტულად რა სახის სამაშველო ოპერაციები ჩაატარეს მეხანძრე-მაშველებმა აღნიშნულ პერიოდში, მაგრამ ირკვევა, რომ წელს ურეკში მაშველებმა 150 ადამიანის სიცოცხლე იხსნეს.
როგორც საგანგებო სიტუაციების მართვის სამსახურიდან გამოგზავნილ პასუხში წერია:
“საქართველოს შინაგან საქმეთა სამინისტროს მმართველობის სფეროში შემავალი სახელმწიფო საქვეუწყებო დაწესებულება − საგანგებო სიტუაციების მართვის სამსახურმა განიხილა თქვენი 2025 წლის No3199647 განცხადება, რომლითაც მოთხოვნილია ინფორმაცია 2025 წლის იანვრიდან სექტემბრის ჩათვლით გურიის რეგიონში განხორციელებული სახანძრო-სამაშველო ღონისძიების რაოდენობის შესახებ. აღნიშნულთან დაკავშირებით,
საგანგებო სიტუაციების მართვის სამსახურის საინფორმაციო ბაზაში აღრიცხულ მონაცემებზე დაყრდნობით, წარმოგიდგენთ სტატისტიკურ ინფორმაციას სახანძრო-სამაშველო ღონისძიებების რაოდენობის შესახებ:
ოზურგეთი _ 2 128;
ლანჩხუთი _ 962;
ჩოხატაური _ 758;
ურეკში ზღვაზე გადარჩენილთა რაოდენობა – 150″.
ინფორმაციისთვის: შინაგან საქმეთა სამინისტროს საგანგებო სიტუაციების მართვის სამსახური მრავალფეროვან სამაშველო ოპერაციებსა და რეაგირების სამუშაოებს ახორციელებს ქვეყნის მასშტაბით. ძირითადი ტიპები მოიცავს:
_ სახანძრო-სამაშველო ოპერაციები: ეს არის სამსახურის ერთ-ერთი უმთავრესი ფუნქცია, რომელიც მოიცავს ხანძრების ქრობასა და თანმხლებ საავარიო-სამაშველო სამუშაოებს (მაგალითად, ადამიანების ევაკუაცია და გადარჩენა ცეცხლმოკიდებული ან დაზიანებული შენობებიდან);
_ წყალზე სამაშველო ოპერაციები: სამსახური აღჭურვილია წყალზე სამაშველო ტექნიკით (მცურავი საშუალებები, გასაბერი ნავები) და ატარებს სწავლებებს ამ მიმართულებით. ეს მოიცავს როგორც ზღვის სანაპირო ზოლზე, ასევე მდინარეებსა და ტბებზე სამაშველო მოქმედებებს;
_ ავარიულ-სამაშველო სამუშაოები: სხვადასხვა ტიპის საგანგებო სიტუაციებზე რეაგირება, გარდა ხანძრისა, მაგალითად, სატრანსპორტო ავარიების, ნგრევების, ან სხვა ინციდენტების დროს.
სხვა მნიშვნელოვანი მიმართულებები:
_ ქიმიური, ბიოლოგიური, რადიაციული და ბირთვული (ქბრბ) ინციდენტები: სამსახური უზრუნველყოფს ქვეყანაში ამ ტიპის უსაფრთხოებას და შესაბამის რეაგირების სწავლებებს ატარებს;
_ ურბანული და ტყის ხანძრები: სპეციალიზებული რეაგირება ქალაქებსა და ტყის მასივებში გაჩენილ ხანძრებზე.
საგანგებო სიტუაციების მართვის სამსახური არის მთავარი მორეაგირე უწყება საგანგებო სიტუაციების დროს და კოორდინაციას უწევს სხვა სახელმწიფო უწყებების საქმიანობასაც.
