ახალი სასწავლო წლის დაწყებამდე ერთ თვეზე ნაკლები დრო რჩება.
მიუხედავად იმისა, რომ 15 სექტემბერი პარასკევია, მოსწავლეებს სკოლებში მისვლა სწორედ ამ დღეს მოუწევთ.
რა სიახლეებით ხვდებიან 2023-2024 სასწავლო წელს ჩოხატაურის სკოლებში – ამის გასარკვევად “გურია ნიუსი” ჩოხატაურის საგანმანათლებლო რესურსცენტრის ხელმძღვანელს, შორენა სიხარულიძეს ესაუბრა.
შორენა სიხარულიძის თქმით, სასწავლო წლის დასაწყებად მზადება მთელი ზაფხულის განმავლობაში მიმდინარეობდა.
“2023-2024 სასწავლო წლისათვის მზადება მთელი ზაფხულის განმავლობაში მიმდინარეობდა. ჩოხატაურის #1 საჯარო და სამრევლო სკოლა ჩვეულ რიტმში დაიწყებს სასწავლო პროცესს.
ყველა სასკოლო სახელმძღვანელო უკვე სკოლებშია განაწილებული. პირველ, მეორე და მეთერთმეტე კლასში ახალი გრიფირებული სახელმძღვანელოები გვაქვს, რომელიც უკვე შემოსულია და არის უკვე სკოლებში. მთელი ზაფხულის განმავლობაში აქტიურად მიმდინარეობდა მასწავლებლების გადამზადება. მათ უტარდებოდათ სემინარები, ქოუჩინგი, ასევე ტრენინგი.
წელს 180 პირველკასელი შეაღებს სკოლის კარებს. მათ იქ დახვდებათ მოწესრიგებული გარემო, ახალი გრიფირებული სახელმძღვანელოები და ბუკები. ასევე კვალიფიციური პედაგოგები, რომელთა შეჩევა ზოგ სკოლაში ახლაც მიმდინარეობს. მასწავლებელთა პროფესიული განვითარების ეროვნული ცენტრის ვებგვერდზე სკოლების მიერ უკვე გამოქვეყნებულია ვაკანსიები.
სკოლები აქტიურად გადიოდნენ ავტორიზაციის პროცესს, რვა საჯარო სკოლაში მიმდინარეობდა ეს პროცესები, შესაბამისი გადამზადება ჩაუტარდათ სკოლის პერსონალს, სანამ ექსპერტები შევიდოდნენ და დაიწყებოდა ავტორიზაციის პროცესი. ამ ზაფხულში 4 საჯარო სკოლაში იყვნენ უკვე ექსპერტები და დანარჩენ სკოლებში ექსპერტების შესვლა ეტაპობრივად მოხდება”,_ გვითხრა სიხარულიძემ.
საგანმანათლებლო რესურსცენტრის ხელმძღვანელმა აღნიშნა, რომ ბუკისციხის, სამებისა და ვან-ზომლეთის საჯარო სკოლებში რეაბილიტაციის პროცესის დასრულებას ელოდებიან, ხოლო მასშტაბური რეაბილიტაციის პროცესი რამდენიმე სკოლაში უნდა დაიწყოს.
“აქტიურად მიმდინარეობს ახლაც ბუკისციხის, სამებისა და ვან-ზომლეთის სკოლებში სარეაბილიტაციო სამუშაოები და დასრულებას უახლოეს მომავალში ველოდებით. ასევე მალე დაიწყება რამდენიმე სკოლის სრული რეაბილიტაცია და მასშტაბური სამუშაოები არის დაგეგმილი”,_ გვითხრა სიხარულიძემ.
კითხვაზე თუ რომელი სკოლების რეაბილიტაცია იგეგმება, შორენა სიხარულიძე განმარტავს:_ სულ იგეგმება ხუთი საჯარო სკოლის რეაბილიტაცია – ნიკო მარის სახელობის პირველი საჯარო სკოლა, გორაბერეჟოულის საჯარო სკოლა, ბუკნარის საჯარო სკოლა, კოხნარი საჯარო სკოლა და დაბლაციხის საჯარო სკოლა.
რაც შეეხება აღნიშნულ საჯარო სკოლებში რეაბილიტაციის დაწყების შემდეგ სასწავლო პროცესის მიმდინარეობას, სიხარულიძის თქმით, ალტერნატიული ფართები მოძიებულია სკოლის შენობების სიახლოვეს და სწორედ იქ გაგრძელდება სწავლაც.
“ალტერნატიული ფართები მოძიებული გვაქვს. შესაბამისმა უწყებამ შეამოწმა და დასაშვებად ცნო შიგნით სასწავლო პროცესის ჩატარება. რამდენიმე სკოლა ახლომდებარე ფართში გადავა მეორე ცვლაში. მოსწავლეთა ინტერესები და მასწავლებელთა მოთხოვნები გათვალისწინებული გვაქვს”,_ ამბობს სიხარულიძე და აღნიშნავს, რომ ჯერჯერობით ამ სკოლებში სარემონტო სამუშაოების დაწყება არ იგეგმება და მოსწავლეებიც და მასწავლებლებიც 15 სექტემბერს სკოლებში უნდა მივიდნენ.
ავტორი
