CNN-ის მიერ ამ დროისთვის გავრცელებული ინფორმაციით, ლონდონში გრენფელის თაუერის ხანძრის შედეგად საავადმყოფოში 74 ადამიანია გადაყვანილი, რომელთაგან 20 კრიტიკულ მდგომარეობაშია.
ადგილობრივი პოლიციის მეთაური, სტიუარტ კრანდი, აცხადებს, რომ მომხდარის ირგვლივ გამოძიება საფუძვლიანად ჩატარდება.
თვითმხილველები კი 24 სართულიან შენობაში ცეცხლის გაჩენის მომენტს იხსენებენ.
ხანძრის ერთ-ერთი თვითმხილველის, სამირა ლამრანის თქმით, ცეცხლის გავრცელების დროს ხალხი თაუერის ფანჯრებიდან ყვიროდა, ერთ-ერთმა ქალმა კი ფანჯრიდან ბავშვი გადმოაგდო.
„ქალი ქვემოთ შეკრებილებს ფანჯრიდან ანიშნებდა რომ ბავშვის გადმოგდებას აპირებდა და შეძლებდა თუ არა ვინმე მის დაჭერას“,_ამბობს თვითმხილველი.
მისივე თქმით, ბავშვის დაჭერა ქვემოთ მყოფმა ერთ-ერთმა მამაკაცმა შეძლო.
„ჩვენ, საზოგადოების წევრები, ერთმანეთს ვეკითხებოდით, თუ რისი გაკეთება შეგვეძლო, მაგრამ სახეზე აშკარად იყო სიკვდილი“,_ამბობს თვითმხილველი.
გრენფელი თაუერის ერთ-ერთ მაცხოვრებელი კი იხსენებს, რომ მან განგაშის სიგნალის ხმა მას შემდეგ გაიგო, რაც ბინა დატოვა.
ერთ-ერთი ადგილობრივი მაცხოვრებელის თქმით კი უყურებდა როგორ მირბოდნენ მეხანძრეები სპეციალური აღჭურვილობით თაუერისკენ, მაგრამ მაინც დაშავებულები უკან ბრუნდებოდნენ.
„მეხანძრეებსაც კი სჭირდებათ მკურნალობა“,_ამბობს ის.
პოლიციის მიერ გავრცელებული ცნობით, ხანძრის შედეგად 6 ადამიანი დაიღუპა, მაგრამ შესაძლოა, მსხვერპლის რაოდენობა გაიზარდოს.
მაუწყებლის ცნობით, ხანძრის შედეგად დაზარალებულებისთვის ფულადი სახის დახმარების გასაწევად რამდენიმე ვებ-გვერდი შეიქმნა.
