გუშინ საბოლოოდ ბეჭედი დაერტყა რუსული სპორტული სამყაროს დანარჩენი მსოფლიოსაგან იზოლირებას. თითქმის ყველა საერთაშორისო ფედერაციამ თავის სპორტის სახეობებში რუსების განკვეთის გადაწყვეტილება მიიღო. რამდენი ხანი გაგრძელდება ეს პროცესი? ეს თავად პუტინისა და რუსების ხელშია. გააგრძელებენ უკრაინის ოკუპაციას, სანქციები უვადოდ გაგრძელდება.
ბოლოსა და ბოლოს უეფა და ფიფა ერთობლივ გადაწყვეტილებამდე მივიდნენ და საერთაშორისო სარბიელიდან რუსულ კლუბებსა და ამ ქვეყნის ეროვნულ გუნდს ასპარეზობა აუკრძალეს. მომავალი მსოფლიოს ჩემპიონატი რუსეთის ნაკრების გარეშე ჩაივლის.
ამ ქვეყანაში არაერთი ქართველი ფეხბურთელი თამაშობს. საინტერესოა მიღებული სანქციების შემდეგ როგორ წარიმართება მათი შემდგომი კარიერა. უპირველეს რიგში ალბათ ყაზანის „რუბინის“ თავდამსხმელი ხვიჩა კვარაცხელიას ბედი გვაწუხებს.
გუშინ რუსეთში მოასპარეზე მოთამაშეებისათვის სპეციალური ინფორმაცია გავრცელდა:
პროფესიონალ ფეხბურთელთა ასოციაციის საერთაშორისო ფედერაციამ ფიფას წინადადებით მიმართა, რომ რუსეთის ჩემპიონატში მოთამაშე ყველა ლეგიონერს მიეცეს უფლება შეწყვიტონ არსებული კონტრაქტები რუსულ კლუბებთან ყოველგვარი ჯარიმების გადახდის გარეშე.
„მოვუწოდებთ ფიფას ამის გაკეთებას. ეს, რაც შეიძლება მალე უნდა განხორციელდეს. მზარდი კონფლიქტი გვეჩვენება იმის მიზეზად, რომ ფეხბურთელებს მიეცეთ საშუალება კლუბებთან კომპენსაციის გარეშე გააუქმონ კონტრაქტი. ამჟამად, ფიფასთან ამ საკითხს განვიხილავთ. ორი წლის წინ ფიფამ დროებით შეცვალა ტრანსფერის წესები კორონავირუსის გამო. ფიფას ხელმძღვანელებს შეუძლიათ საგანგებო სიტუაციებში წესების კორექტირება, რაც მაშინაც დადასტურდა. უკიდურესად შემაშფოთებელი სიტუაციის გათვალისწინებით, გვჯერა, რომ ფეხბურთელებს უნდა მიეცეთ ქვეყნის დატოვების თავისუფლება“. – განაცხადა პროფესიონალ ფეხბურთელთა ასოციაციის საერთაშორისო ფედერაციის საბჭოს წევრმა ლუის ევერარდმა.
დღეისათვის რუსეთში ხვიჩა კვარაცხელიას გარდა შემდეგი ფეხბურთელები ასპარეზობენ: ჯიმი ტაბიძე („უფა“), ზურიკო დავითაშვილი („არსენალი“), გია გრიგალავა („ხიმკი“), ლუკა წულუკიძე („ურალი“), ლუკა გაგნიძე („ურალი“), ილია ბერიაშვილი („როტორი“), ბექა ქავთარაძე („როტორი“).
რას აპირებს ხვიჩა კვარაცხელია? ამ საკითხზე და არა მარტო კვარაცხელიას შესახებ კომენტარი „რუბინის“ მთავარმა მწვრთნელმა ლეონიდ სლუცკიმ გააკეთა.
„პირველ დღეს გუნდი შევიკრიბეთ და გადავწყვიტეთ, რომ ყველა ერთად ვართ იქამდე, სანამ სიტუაცია ამის საშუალებას მოგვცემს. ამ თემას მეტჯერ არ დავბრუნებივართ. ისეთი დრო დადგა, თამაშის ჩატარების საშუალება რომ გვეძლევა, მიხარია. ჩვენი ღირსებაც და ნაკლიც საფეხბურთო მოედანზე უნდა ვაჩვენოთ.“
რამდენიმე დღის წინ ხვიჩა კვარაცხელია უკრაინაში რუსეთის აგრესიას სოციალურ ქსელში შემდეგნაირად გამოეხმაურა. – „Stop the war! Peace!“. – დაწერა 21 წლის ქართველმა „ინსტაგრამის“ საკუთარ გვერდზე.
რუსული ფეხბურთის საერთაშორისო ასპარეზიდან მოკვეთას წარსულში ცნობილი ფეხბურთელი ანზორ კავაზაშვილი გამოეხმაურა, ყოფილი კარის დარაჯი წლებია რუსეთში ცხოვრობს და ამ ქვეყნის მოქალაქეობაც მიღებული აქვს. 81 წლის კავაზაშვილი გაცოფებულია იმ სანქციებით, რაც რუსულ ფეხბურთს დაედო უკრაინაში შეჭრის გამო:
„რა სისულელეა. ასეთი წესები არასდროს ყოფილა, ახლა ყველაზე იოლია რუსეთი აგრესორად მონათლო. მთელი მსოფლიო ამას ამბობს, გაერომ ბრძანება გასცა, ახლა ეკონომიკური და სპორტული სანქციები შემოიღეს. ეს, რა სიბრიყვეა?! სად იგონებენ ასეთ რამეს, რას სჩადის უეფა. ეს რუსეთის დისკრიმინაციაა. ჩვენ ხო ძლევამოსილი ქვეყანა ვართ. როგორ გვიბედავენ ისინი ამას?“
ტაეკვონდოს საერთაშორისო ფედერაციამ რუსეთის პრეზიდენტ ვლადიმირ პუტინს ამ ორგანიზაციის მიერ მინიჭებული მე-9 დანის შავი ქამარი ჩამოართვა. ეს საპატიო წოდება პუტინს ორგანიზაციამ ვლადიმირ პუტინს 2013 წელს მიანიჭა.
ფედერაციის გადაწყვეტილებით, რუს სპორტსმენებს საერთაშორისო ტურნირებში რუსეთის სახელით გამოსვლა აეკრძალათ. არც რუსეთის დროშებს გამოიყენებენ და არც ჰიმნს.
შეგახსენებთ რომ ორი დღის წინ ძიუდოს საერთაშორისო ფედერაციამ ოფიციალური განცხადება გამოაქვეყნა, რომელიც ვლადიმერ პუტინის მიმართ სტატუსის შეჩერებას გულისხმობდა:
„ძიუდოს საერთაშორისო ფედერაცია აცხადებს, რომ ბატონ ვლადიმერ პუტინს ფედერაციის საპატიო პრეზიდენტისა და ელჩის სტატუსი შეუჩერდა.“
[sexy_author_bio]
