რას გეგმავს ხელისუფლება 29 აპრილს

მაშინ, როცა დედაქალაქის ცენტრში მოქალაქეები “უცხოური ძალის გავლენის შესახებ” კანონპროექტის მიღების პროცესს ყოველდღიურად აპროტესტებენ, “ქართულმა ოცნებამ” 29 აპრილისთვის ამ  კანონპროექტის მხარდასაჭერი აქცია დააანონსა.

“ყველას დავანახებთ, სად დგას ქართველი ხალხის უდიდესი უმრავლესობა, რომლისთვისაც ძვირფასია სიმართლე და ჭეშმარიტი ევროპული ფასეულობები, რომლისთვისაც ძვირფასია ჩვენი ტრადიციული ეროვნული ღირებულებები _ მამული, ენა და სარწმუნოება”, _ წერია “ოცნების” მიერ გავრცელებულ განცხადებაში.

“მართლა ათასობით ადამიანი, პირად მიმოწერაში გვწერს, რომ, ხალხო, ჩაატარეთ აქცია და ვაჩვენოთ რამდენი ვართ ჩვენ, რა შეგვიძლია, ამას გვეხვეწებიან ამ კვირეების განმავლობაში”, _ ამბობს საპარლამენტო უმრავლესობის ლიდერი მამუკა  მდინარაძე რუსული კანონის მხარდამჭერი აქციის თაობაზე.

29 აპრილს გასამართ აქციას ეხმიანება “ქართული ოცნების” პარლამენტარი  ნინო წილოსანიც: “ორშაბათს, 29 აპრილს, პარლამენტის წინ  ვიკრიბებით საერთო ღირებულებების გარშემო გაერთიანებული ჩვენი ქვეყნის ერთგული მოქალაქეები:

ვისაც საქართველო უყვარს;

ვინც  საკუთარი ქვეყნის სუვერენიტეტს სცემს პატივს;

ვისაც მტკიცედ სწამს ევროპულ ოჯახში გაერთიანების;

ვისაც გამჭვირვალობის არ ეშინია;

ვინც რუსეთს არ ეფარება და საკუთარ თანამოქალაქეებს არ აშანტაჟებს;

ვინც ბავშვებს და ახალგაზრდებს არ იყენებს ფარად, თავისი მავნებლური მიზნებისთვის;

ვინც საკუთარი ქვეყნისთვის სანქციებს არ ითხოვს;

ვინც საკუთარ ქვეყანაში ბომბების ჩამოყრას არ ითხოვს;

ვინც სიცრუის ტირაჟირებით არ ცდილობს სიმართლის გადაფარვას;

ვინც  ჩვენს ქვეყანას პარტნიორი ქვეყნების თანასწორად თვლის;

ვინც რადიკალიზმს არ კვებავს განსხვავებული აზრის დევნით;

ვინც ძალადობას არ ახალისებს;

ვისაც არ გვსურს ნაცების ნაცისტური რეჟიმის უკან დაბრუნება.

მამული, ენა, სარწმუნოება!”

წილოსანის ამ პოსტს საზოგადოების ნაწილის მხრიდან უარყოფითი შეფასებები მოჰყვა:  “უგულო, უსულო და ქვეყნის გამყიდველის დაწერილი სტატუსია. არც ერთი სიტყვა, რაც გიწერია, არ გაქვს მიტანილი გულთან, გააზრებაზე ხომ ლაპარაკი ზედმეტია. შენ, უბრალოდ, არ გიყვარს შენი ქვეყანა. ერთადერთი სიყვარული ბიძინას ხელიდან შენს ჯიბეში ჩადებული ფულია.

მთავრობა ხალხის წინააღმდეგ მართავს აქციას. სამარცხვინოა;

მარტო ამათ მოსდით აზრად საკუთარ ერს გაუმართონ მიტინგები, ჩამოდენიან ახლა საწყალ ხალხს;

მთავრობა, რომელიც აქციას აწყობს, ის მთავრობა კარგად ვერ არის. ყველა სისულელეში პირველები როგორ უნდა იყოთ;

ამათ აუარება ქონება აღერიცხებათ და ეგ ადარდებთ. ხელისუფლება უწყობს კონტრაქციას ხალხს, სასწაულია;

არ გამიგია, რომ მთავრობა აქციას უწყობდეს ხალხს. სასაცილოა, სატირალი რომ არ იყოს. საქართველო ვის ხელში ხარ;

არც ნაცების მობრუნება მინდა, არც ბომბები საკუთარ ქვეყანაში, მაგრამ არც ის მომწონს, ყოველდღიურად რომ მიაქვს რუსს ქართული მიწა და არც იმჩნევს ხელისუფლება. არც ის კანონი მომწონს, ქართულად რომ გვასაღებთ და რუსულის ანალოგია, უარესიც თუ არა. არც ერთ დილას რუსეთში გაღვიძება და ერთი კაცის მონობა მინდა. მინდა ცივილურ, ევროპულ საქართველოში ცხოვრება, სადაც ადამიანის უფლება დაცულია, არ ეშინია ცუდად გახდომის, შიმშილის, განსხვავებული აზრის გამო ჩაგვრის, უსამართლობის და ა. შ.”

ამასთან, “ქართული ოცნებას” მოქალაქეები დაფიქრებისკენ მოუწოდებენ: “კარგად დაფიქრდით აქციის მოწყობამდე. არ შეიძლება ახალგაზრდების დაპირისპირება. ისტორიიდან გამოიტანეთ დასკვნები!”

ოცნების” მიერ დაანონსებულ აქციას ოპოზიციაც ეხმიანება. მათი შეფასებით, “ოცნება” ეცდება პარტიული და ადმინისტრაციული რესურსი დააორგანიზოს.

კახა ასკურავა, ლანჩხუთის საკრებულოს წევრი ენმ-დან: “ის, რაზეც ახლა აპირებენ წასვლას, პირდაპირ კონფლიქტსა და პროვოკაციაზე წასვლას ნიშნავს საკუთარ ხალხთან. თან ვისთან, სკოლის მოსწავლეებთანაც კი, რადგან იქ მოსწავლეებიც გამოდიან.

29-ში დაგეგმილი აქციით “ქართულმა ოცნებამ” საკუთარ პროდასავლურ ამომრჩევლებს ღიად უთხრა, რომ ის აღარ არის პროდასავლური პარტია და წინასაარჩევნო კამპანია _ “კი რუსულ კანონს და არა ევროპულ მომავალს” _ ამაზე იქნება აგებული, რაც ერთის მხრივ, კარგიცაა, რადგან ის ამომრჩევლები, ვინც 41-ს  ირჩევდა და თან ამ ქვეყნის ევროპულ მომავალსაც უჭერდა მხარს, მინიმუმ, დაფიქრდებიან, რას ნიშნავს ივანიშვილის პარტიის ეს გადაწყვეტილება: გარეთ თავად იდგნენ ყარაულებად და შიგნით (პარლამენტში) რუსულ კანონს განიხილავდეს მათივე პარტიის უმრავლესობა”.

ნინო კვიტაიშვილი, პარტია “ახალი”: “ვინ გამოვა შვილების წინააღმდეგ დაანონსებულ აქციაზე?! რომელი დირექტორი და მასწავლებელი დადგება საკუთარი მოსწავლეების პირისპირ კონტრაქციაზე?! გაზრდიან წნეხს? ალბათ, ეცდებიან. უპასუხეთ პროტესტით!!! ჩვენს პატრიოტ, ლაღ, თავისუფალ, ჭკვიან ახალგაზრდობას გაუმარჯოს!”

გოჩა ჯანაშია, პარტია “ლელოს” წარმომადგენელი ლანჩხუთის საკრებულოში: “ძალიან არ მინდა საჯარო მოხელეებზე რამე ცუდი ვთქვა, მაგრამ გასული წლის დეკემბერში, ევროკავშირის სტატუსის მიღების გამო რომ წაასხეს თბილისში და აზეიმეს, იგივე ხალხს რომ 29 აპრილს რუსული კანონის მხარდაჭერის გამო ისევ იქ წაასხამენ, ასეთ ხალხს რა ჰქვია?! ან როგორ უნდა წაიყვანო დედები და მამები, რომლებსაც შვილები იქვე ახლო კონტრაქციაზე ეგულებათ და წარმოიდგინეთ, რა დღეში იქნება ეს ხალხი. იმასაც არ გამოვრიცხავ, 30-ში ჩაინიშნოს მესამე მოსმენა და ეს აქტივი გამოიყენონ ერთგვარ ფარად. ეს კი მართლა კატასტროფის ტოლფასი იქნება და ზრდის ქართველთა დაპირისპირებას, რაც, უდაოდ, მმართველი ძალის სინდისზე იქნება. ღმერთმა დაიფაროს, რამე მოხდეს, თორემ ივანიშვილზე ცოდვა ამ დუნიაზე კაცი არ იქნება”.

ცნობისთვის, 17 აპრილს 83-მა დეპუტატმა, მათ შორის, 73-მა “ქართული ოცნებიდან”, ცხრამ _ “ხალხის ძალიდან” და ერთმა _ “ევროპელი სოციალისტებიდან”, პირველი მოსმენით მიიღო მედიისა და სამოქალაქო საზოგადოების შემზღუდავი კანონპროექტი, რომლის მსგავსის მიღებამ რუსეთში სრულად გააქრო დამოუკიდებელი სამოქალაქო ორგანიზაციები და მედია. დასავლელი პარტნიორები საქართველოს ხელისუფლებას მუდმივად აფრთხილებენ, რომ კანონპროექტის მიღება ხელს შეუშლის საქართველოს ინტეგრაციას ევროკავშირში.