ოზურგეთის მუნიციპალიტეტის მერია შეზღუდული შესაძლებლობების მქონე პირთა საკითხების შემსწავლელი სათათბირო საბჭოს ქმნის. მანამდე კი რამდენიმე შეხვედრა გაიმართა დებულების შექმნასთან დაკავშირებით.
მშობელთა კავშირი ~ჩვენი შვილები~ დებულების შექმნასთან დაკავშირებით აქტიურად იყო ჩართული. ორგანიზაციის წარმომადგენლის, ვეკო წულაძის თქმით, მერიას უნდა გაეზიარებინათ დაკორექტირებული დებულება და აგვისტოს ბოლოს საკრებულოს სხდომაზე უნდა მომხდარიყო დამტკიცება.
„ამის შემდეგ მოხდებოდა განსაზღვრული წესის მიხედვით საბჭოს წევრების შერჩევა და დამტკიცება. თუმცა, დებულება არ არის დამტკიცებული და მერიამ 22 აგვისტოს გამოაცხადა საბჭოს წევრობის მსურველების აპლიკაციების მიღება.
2018 წლის 31 ივლისს ჩატარდა სამუშაო შეხვედრა, რომელიც ეხებოდა შშმ პირთა საკითხებზე მომუშავე საბჭოს დებულების დახვეწას. შეხვედრას ესწრებოდა სახალხო დამცველის წარმომადგენელი ქალბატონო ირინე ობოლაძე, ასევე, ორგანიზაცია ოჯახების დისკრიმინაციის წინააღმდეგ თავმჯდომარე მარინე კორკოტაძე. აღნიშნული შეხვედრის დროს მოხდა საბჭოს არსებული მთელ რიგ ჩანაწერებზე რეკომენდაციების გაცემა მისი გაუმჯობესების კუთხით. ასევე, შეხვედრის შემდგომ მოხდა რეკომენდაციების გაზიარება წერილობითი კუთხით მოწვეული სტუმრების მხრიდან, _ ამბობს ვეკო წულაძე.
ოზურგეთის მერიის იურიდიული სამსახურის უფროსის, ლაშა თავაძის თქმით, საბჭოს წევრების მიღება საჯარო იყო და ყველა დაინტერესებულ პირს შეეძლო შეეტანა მერიაში განაცხადი.
“ჯერ არანაირი დებულება დამტკიცებული არ არის და არც საბჭო არის შექმნილი. მუშა პროცესი მიდის და შესაძლებელია, ჯერ კიდევ მოხდეს ცვლილებები დებულებაში. ასევე, მინდა გითხრათ, რომ ოზურგეთის მუნიციპალიტეტის საკრებულო აქ არაფერ შუაშია, შშმ პირთა საკითხებზე მომუშავე საბჭოს ოზურგეთის მუნიციპალიტეტი ქმნის.
რაც შეეხება დებულების ნიმუშს, ჩვენი გავუგზვანეთ სახალხო დამცველის აპარატს, რომლის შემდეგ რეკომენდაციები მოგვწერეს. ვიდრე საბჭო შეიქმნება, მანამდე მოხდება წევრების შერჩევა, რომლის შესახებ ინფორმაცია გავრცელდა ოზურგეთის მუნიციპალიტეტის მერიის ვებგვერდზე და ოზურგეთის მუნიციპალიტეტის მერიის ფეისბუქ გვერდზე, მსურველებს cv უნდა წარმოედგინათ, მივიღეთ განაცხადებები, ახლა შეიქმნება სამუშაო ჯგუფი და ისინი განიხილავს შემოსულ განცხადებებს, ამის შემდეგ დამტკიცდება საბჭოს შემადგენლობა, რის შემდეგ დამტკიცდება დებულება”, _ გვითხრა ლაშა თავაძემ.
“გურია ნიუსის“ კითხვაზე _ რამდენად იყო შესაძლებელი საბჭოს წევრობის კონკურსზე პირადად გაეგზავნათ ინფორმაციები იმ ორგანიზაციებისთვის, ვინც მუშაობს წლების განმავლობაში შშმ პირების უფლებებზე? _ თავაძე ამბობს:
_სახალხო დამცველის წარმოდგენილი რეკომენდაციები გათვალისწინებულია, ~ჩვენი შვილების~ წარმომადგენლები სახალხო დამცველის მიერ წარმოდგენილ რეკომენდაციებს მხარს უჭერდა. კიდევ ერთხელ ვამბობ, რომ ჯერ არაფერია დამტკიცებული და კიდევ ჩატარდება შეხვედრა, სადაც ყველას ექნება თავისი პოზიციის დაფიქსირების საშუალება. ასევე, მინდა გითხრათ, რომ ინფორმაცია კონკურსთან დაკავშირებით გავრცელებული იყო და დამალულად არაფერი მომხდარა. ასევე, ამ დღეებში დებულება გადაეგზავნა ~ჩვენი შვილების~ წევრებს“, _ თქვა ლაშა თავაძემ ჩვენთან საუბრის დროს.
