ევროპასთან უვიზო მიმოსვლის გაუქმების საფრთხე რეალური გახდა. რა ელოდება საქართველოს ევროპისგან დაშორებით და რას კარგავს ქართველი ხალხი? – ამ თემაზე „ბათუმელები“ პოლიტოლოგ გიორგი ბადრიძეს ესაუბრა.
- ბატონო გიორგი, დღეს უკვე დაიწყო მორიგი პროპაგანდა ირაკლი კობახიძემ ვიზალიბერალიზაციაზე და განაცხადა, რომ ევროკავშირი უვიზო მიმოსვლის საპირწონედ ითხოვს სუვერენიტეტის დათმობას და „ქართული ოცნება“ აირჩევს სტაბილურობასო. როგორ ფიქრობთ, ისევ იმუშავებს მსგავსი პროპაგანდა ხალხზე? და რას კარგავს ქვეყანა ვიზალიბერალიზაციის გაუქმებით?
_ მე კარგად მახსოვს, 2017 წელს, ზუსტად იგივე კობახიძე ამბობდა, რომ ეს იყო დიდი მიღწევა, როდესაც ევროკავშირმა მისცა საქართველოს უვიზოდ მიმოსვლის შესაძლებლობა. ის ამტკიცებდა, – სიტყვა-სიტყვით ვიმეორებ, რომ „ეს იყო დიდი პრივილეგია და ასევე პასუხისმგებლობა“.
ან მაშინ გვატყუებდა კობახიძე, ან ახლა ტყუის, რადგან ზუსტად ამის საპირისპიროს ამბობს.
ვიზალიბერალიზაცია და უვიზო მიმოსვლა ტექნიკური საკითხი არ არის, ეს არის ევროპასა და საქართველოს შორის ურთიერთობის ხარისხის საკითხი.
ევროკავშირს მხოლოდ იმ ქვეყნებთან აქვს უვიზო მიმოსვლა, რომლებსაც მიიჩნევს ახლობლად, მოკავშირედ და რომლის მოქალაქეებიც, სულ მცირე, არ წარმოადგენენ უკანონოდ, ვადაზე მეტხანს დარჩენის, სხვადასხვა დანაშაულის ჩადენის რისკს მის ტერიტორიაზე და ასე შემდეგ.
საქართველო მდიდარ ქვეყნებს შორის რომ არ იყო, ეს 2017 წელსაც იცოდნენ, მაგრამ მაინც მიიღეს ეს გადაწყვეტილება, მიუხედავად იმისა, რომ საქართველო რისკის ზონაში შედიოდა თავისი ეკონომიკური ვითარების გამო. ეს გადაწყვეტილება მიიღეს იმის წასახალისებლად, რასაც ქართველი ხალხისგან აღიქვამდნენ, რომ ხალხს ჰქონდა გამოხატული სურვილი გამხდარიყვნენ ევროპის ნაწილი.
და ასეც იყო.
ევროკავშირს აქვს თავისი კონკრეტული სტანდარტები, რომელიც ყოველთვის იყო ცნობილი. ეს არის დემოკრატიული ინსტიტუტები, ეს არის დემოკრატიული პროცესი, ეს არის ადამიანის უფლებები და ქვეყანა, რომელიც ამ პრინციპებს შეგნებულად, სისტემატურად არღვევს, ბუნებრივია, აღარ განიხილება ისეთივე მოკავშირედ, როგორადაც განიხილებოდა საქართველო მანამდე, სანამ ჰქონდა მას პრეტენზია, რომ სურდა ევროკავშირის წევრი გამხდარიყო.
შესაბამისად, შესაძლო გადაწყვეტილება უვიზო მიმოსვლის შეწყვეტის შესახებ, იქნება ევროკავშირის მიერ იმის აღიარება, რომ ივანიშვილის ხელისუფლება იმის საპირისპიროს აკეთებს, რასაც ევროკავშირი ელის კანდიდატი ქვეყნისგან.
დღეს სრულიად აშკარად გამოიხატა, რომ „ოცნების“ ხელისუფლება აკეთებს ყველაფერს იმის საპირისპიროდ, რაც არის მოთხოვნილი ევროკავშირის კანდიდატი ქვეყნისგან. მაშინ ევროკავშირის წევრი ქვეყნები თავიანთ მოქალაქეებს ვეღარ აუხსნიან, თუ რატომ არის უვიზო მიმოსვლა ღარიბ ქვეყანასთან, სადაც დემოკრატიის ნაცვლად ააშენეს რუსული პოლიტიკური სისტემა.
