ჩოხატაურის მუნიციპალიტეტის მერი დავით შარაშიძე დღეს მერის წარმომადგენლებს შეხვდა. შეხვედრაზე განხილული ერთ-ერთი საკითხი პრემიერის ინიცირებული სოციალური პროგრამის მუნიციპალიტეტში მიმდინარეობას შეეხებოდა.
“ყველგან აქტიურ რეჟიმში მიმდინარეობს სოციალურად დაუცველების დასაქმების პროგრამა. ამ პროგრამის ფარგლებში სუფთავდება სოფლების ცენტრები, სანიაღვრე არხები, სასაფლაოები, ადმინისტრაციული შენობები, ასევე, მემორიალური დაფების გაწმენდა-დასუფთავება ხდება. ნებისმიერი სამუშაო, რაც კი სოციალურად დაუცველებს შეუძლიათ შეასრულონ, მიმდინარეობს ამ პროგრამის ფარგლებში”,_ ამბობს ჩოხატაურის მერი “გურია ნიუსთან” საუბრისას.
როგორც ცნობილია, სოციალური პროგრამით დასაქმებული პირების ანაზღაურება ოფიციალურად 300 ლარით არის განსაზღვრული და როგორც პროგრამის ამოქმედებამდე ეკონომიკისა და მდგრადი განვითარების მინისტრმა განმარტა დასაქმებულებმა აღნიშნული თანხა დაუბეგრავად უნდა აიღონ, თუმცა, მერთან საუბრის შემდეგ ჩვენთვის ცნობილი სხვა დეტალი გახდა. კერძოდ, დავით შარაშიძე ამბობს, რომ მუნიციპალიტეტში პროგრამის ფარგლებში დასაქმებული ადამიანების მიერ შესრულებული სამუშაოს აღწერა ხდება და ისინიც ანაზღაურებას შესრულებული სამუშაოს მიხედვით აიღებენ.
“ამ ხალხის ანაზღაურების ჩარიცხვა მოხდება სოციალურ ბარათზე სოციალურ დახმარებასთან ერთად. აქვე მინდა აღვნიშნო, რომ ვინმეს ილუზია თუ შეექმნება იმის, რომ არ იმუშაოს და ხელფასი ჩაერიცხება, ასე არ იქნება. მერის წარმომადგენლები აკონტროლებენ ყოველდღიურად ამ ხალხს. არის ჟურნალი, ტაბელი ჰქვია და ამ ტაბელში აღინიშნება ყოველი პიროვნება ყოველდღე რა სამუშაოს შეასრულებს. ამის მიხედვით ხდება ხელფასის გაცემა. ვიღაცამ შეიძლება 10 დღე იმუშავა, ვიღაცამ 20, შესაბამისად, ვინც ნაკლები იმუშავა იმას ნაკლები ანაზღაურება ჩაერიცხება, ვინც მეტი იმუშავა, იმას მეტი”, _ აცხადებს შარაშიძე.
ავტორი
