დღეს, საქართველოს პრემიერ-მინისტრმა, გიორგი კვირიკაშვილმა მთავრობის საკადრო და სტრუქტურულ ცვლილებებზე ისაუბრა.
ცვლილებების პაკეტს, ჯერ მთავრობის უახლეს სხდომაზე განიხილავენ, შემდეგ კი განსახილველად და დასამტკიცებლად პარლამენტს წარედგინება.
„გურია ნიუსი“ დაინტერესდა, რას ფიქრობს საზოგადოება მმართველ გუნდში გახორციელებულ საკადრო ცვლილებებზე, ასევე სამინისტროების ოპტიმიზაციაზე, რის გასარკვევადაც თბილისის ქუჩებში შემთხვევითი შერჩევით მოქალაქეები გამოიკითხა.
როგორც ნარგიზ კაპანაძე ამბობს, მინისტრები, მთავრობის წევრები ერთმანეთს და ხალხს უნდა დაეხმარონ.
„ხალხს დაგვეხმარონ. ხალხის საკეთილდღეოდ რამე გააკეთონ, მარტო თავის ჯიბეზე ნუ იზრუნებენ. თუმცა ისინი ერთმანეთსაც უნდა დაეხმარნონ და დალაგებული ურთიერთობა ჰქონდეთ ერთმანეთთან. ხალხს, ალბათ, წინა მინისტრთა კაბინეტიც შეძლების ფარგლებში ეხმარებოდა და მარტო მაგათზეც არ არის დამოკიდებული. მართალია, მაგათ ჩვეულებრივ მოქალაქეებზე დიდი შემოსავალი აქვთ. კი, ბატონო, ღმერთმა ხელი მოუმართოს ყველას, მაგრამ ცოტა ჩვენც მოგვაქციონ ყურადღება“, _ ამბობს კაპანაძე.
ერთ-ერთი გამოკითხულის, ელგუჯას თქმით კი, ყველა მინისტრი მოსახსნელია.
„სუყველა მოსახსნელია. არავინ არაფერი იცის. ხელს ისე აწერენ დოკუმენტებს, რომ არც კი კითხულობენ“,_ გვითხრა რესპონდენტმა.
ლანა გიორგაძე მიჩნევს, რომ რადგან ცვლილებები ხორციელდება, ასეცაა საჭირო.
„მთავრობის უკმაყოფილო არ ვარ. რადგან ცვლილებები ხორციელდება, ალბათ, ასეცაა საჭირო. იმედია, ყველაფერი კიდევ უფრო მეტად შეიცვლება უკეთესობოსკენ“, _ ამბობს გიორგაძე
ირმა კეკელიძე მმართველ გუნდში განხორციელებულ ცვლილებებს დადებითად აფასებს.
„მმართველ გუნდში გახორციელებულ ცვლილებებს დადებითად ვაფასებ. მთავრობამ უკეთ იცის, რას და რატომ აკეთებს. არ ვარ კომპეტენტური ამ საკითხში, მაგრამ სამინისტროების ოპტიმიზაცია, ვფიქრობ, კარგია. ამდენი სამინისტრო ნამდვილად არ იყო საჭირო. თუნდაც სპორტის სამინისტროს კულტურის სამინისტროსთან შეერთება ლოგიკურია“, _ ამბობს კეკელიძე.
როგორც „გურია ნიუსმა“ გამოკითხვის შედეგად აღმოაჩინა მოქალაქეების ნაწილს სახელმწიფოში მიმდინარე საკადრო და სტრუქტურული ცვლილებების შესახებ ინფორმაცია არ აქვთ.
ერთ-ერთ მოქალაქის, ზვიადის თქმით, ის ტელევიზორს საერთოდ არ უყურებს.
„წარმოდგენა არ მაქვს რა ხდება საქართველოში. არც ტელევიზორს ვუყურებ, სამწუხაროდ. ქუჩაშიც იშვიათად გამოვდივარ“, _ ამბობს ის.
როგორც კიდევ ერთი გამოკითხული ნატალია ციციშვილი ამბობს, გახორციელებული ცვლილებების შესახებ არაფერი იცის.
„ჯერჯერობით არ მაქვს ინფორმაცია მმართველ გუნდში გახორციელებულ ცვლილებებზე. ზოგადად, ცვლილებები ყოველთვის სასურველია. რაც შეეხება სამინისტროების ოპტიმიზაციას, ალბათ, საჭირო იყო“, _ ამბობს ციციშვილი
