რამდენიმე დღის წინ ყაზანის „რუბინის“ ხელმძღვანელობამ საქართველოს ეროვნული გუნდის თავდამსხმელი ხვიჩა კვარაცხელია რუსეთის პრემიერლიგის ოფიციალური განაცხადიდან ამოიღო _ მიზეზი ქართველის ტრავმა აღმოჩნდა.
ჯერჯერობით, უცნობია, რა სახის და სიმძიმის დაზიანება აქვს 20 წლის ფეხბურთელს. საქართველოს ნაკრებს მსოფლიოს 2020 წლის შესარჩევ ეტაპზე კოსოვოსთან და ესპანეთთან მატჩები (2-5 სექტემბერს) ელოდება, ხოლო 8 სექტემბერს, ბულგარეთთან ამხანაგური თამაში აქვს. ხვიჩამ დაზიანება 12 აგვისტოს „რაკოვთან“ მატჩში მიიღო, მაგრამ მას შემდეგ ითამაშა კიდეც.
რუსულ მედიაში იმასაც ეჭვობენ, რომ განაცხადიდან ამოღება შესაძლოა მის მომავალ ტრანსფერს უკავშირდებოდეს. მიმდინარე სეზონში ხვიჩა კვარაცხელიამ 6 შეხვედრაში 1 გოლი გაიტანა.
სანაკრებო შეხვედრების წინ, კვარაცხელიას ტრავმამ ქართველ ფეხბურთის მოყვარულებში არაერთგვაროვანი რეაქცია გამოიწვია.
„კრილია სოვეტოვთან“ მატჩის შემდეგ არანაირ ტრავმაზე საუბარი არ ყოფილა და უცებ განაცხადიდან ამოიღეს! თითქმის ნახევარი წელიწადია მისი ტრანსფერის გარშემო სპორტული საიტები არ გაჩერებულან, კლუბი არ დარჩა ევროპაში, ხვიჩა რომ არ გადაეყვანათ! საბოლოო ჯამში ეს 20 წლის ბიჭი მუდმივ სტრესშია“.
„ეს სიტუაცია აგენტის და კლუბის დირექტორის ჩვეულებრივი „ფანდი“ ხომ არ არის, რომ სანაკრებო თამაშებს ააცილონ კვარაცხელია?! ჰოლანდიასთან როგორც არ გამოუშვეს, იგივეს ხომ არ „აჩალიჩებენ“ ახლაც?“
„ძალიან სამარცხვინო საქციელი იქნება, თუ ნაკრებში თამაშისგან თავის არიდებისთვის აკეთებენ ამას“.
ალბათ, ჯობს, ამ მოსაზრებების კომენტარისაგან თავი დროებით შევიკავოთ. დარწმუნებული ვართ, უახლოეს დღეებში ყველაფერი გაირკვევა.
ამასობაში რამდენიმე ინგლისურმა და რუსულმა საიტმა კვარაცხელია შესაძლო ტრანსფერზე გაავრცელა ინფორმაცია. მათ შორის ყველაზე აქტიურად „ტოტენჰემის“ ვარიანტს მოიხსენიებენ, თუმცა, ეს მხოლოდ ვარაუდებია და მეტი არაფერი _ არავითარი კონკრეტული ინფორმაცია არ არსებობს არც მოლაპარაკებებზე და არც ტრავმაზე. ყველაფერი მკაცრად გასაიდუმლოებულია.
საქართველოს ეროვნული გუნდის მთავარმა მწვრთნელმა ვილი სანიოლმა მომავალი სანაკრებო შეხვედრებისათვის შემადგენლობა დაასახელა. საინტერესოა, რომ გამოძახებულთა შორის ხვიჩა კვარაცხელიაცაა.
სანიოლმა 26 ფეხბურთელი გამოიძახა. მათ შორის ხუთი დებიუტანტი, რომელთაგან ოთხი საქართველოს ეროვნულ პირველობას წარმოადგენს. ეროვნული ნაკრების დებიუტანტები: საბა ხვადაგიანი („დინამო“, თბილისი), ლუკა ლოჩოშვილი („ვოლფსბერგი“, ავსტრია), სანდრო ალთუნაშვილი („დინამო“, ბათუმი), ვლადიმერ მამუჩაშვილი („დინამო“, ბათუმი) და გიორგი ფანცულაია („დინამო“, ბათუმი).
ხვიჩა კვარაცხელიას რუსების მტკიცებით ტრავმა აწუხებს, აი, ლუკა გაგნიძეს კი კორონავირუსი შეეყარა. ეკატერინბურგის „ურალში“ კორონავირუსის აფეთქებაა და ინფიცირებულთა შორის ქართველი ნახევარმცველიც აღმოჩნდა.
„ურალმა“ ლუკა გაგნიძე მოსკოვის „დინამოდან“ ინათხოვრა და მიმდინარე სეზონში ორი მატჩიც ჩაატარა, მაგრამ ბოლო შეხვედრაში განაცხადში არ ყოფილა, რის მიზეზიც კორონავირუსი აღმოჩნდა.
ბელგიური სპორტული მედიის მტკიცებით, საქართველოს ნაკრების თავდამსხმელი გიორგი მიქაუტაძე „მეციდან“ ისევ „სერენში“ ბრუნდება _ გუნდში, რომლის ბელგიის უმაღლეს დივიზონში აღზევებაში გასულ სეზონში უდიდესი წვლილი (22 გოლი 23 მატჩში) შეიტანა.
მიქაუტაძე „მეცის” საკუთრებაა. გასული სეზონი მან იჯარით „სერენში” გაატარა, ფრანგულმა კლუბმა უკან დაიბრუნა, თუმცა, ჯერჯერობით არ უჩანს საიმისო პირი, რომ 20 წლის ფორვარდს „ლიგა 1“-ის კლუბში სასურველი სათამაშო პრაქტიკა ექნება.
„სერენში” კი მიქაუტაძე სჭირდებათ და ელოდებიან კიდეც. ქართველის ბელგიაში დაბრუნებას ოფიციალურად უახლოეს დღეებში გაახმოვანებენ.
გიორგი მამარდაშვილმა ესპანეთის პირველობაზე „ვალენსიას“ კარი მეორედ დაიცვა. მისი გუნდი სტუმრად „გრანადას“ დაუპირისპირდა. მატჩი ფრედ – 1:1 დასრულდა. ესპანურმა გამოცემამ „As“ მამარდაშვილს შემდეგი სიტყვები მიუძღვნა:
„ნაკლებად დამაჯერებელი იყო სადებიუტო მატჩთან შედარებით. ალბათ, იმიტომ, რომ საწყის 15 წუთში გოლი გაუშვა, რომლის დროსაც ბევრს ვერაფერს გააკეთებდა. გამოსვლებზე ყოყმანობდა და სტანდარტულის დროს ერთი დარტყმა არც ისე კარგად დაბლოკა, მაგრამ კარგი პოზიციის წყალობით დროულად რეაგირება მოახერხა“.
„ვალენსია“ შემდეგ ტურში „ალავესს“ უმასპინძლებს. იმედია, ქართველი კარის დარაჯი კვლავ გუნდის სასტარტო შემადგენლობაში იქნება.
[sexy_author_bio]
