„ამერიკელი კანონმდებლები საქართველოს მთავრობის რუსეთთან კავშირების გამოძიებას ითხოვენ“, – ამ სათაურით სტატიას Eurasianet აქვეყნებს.
როგორც სტატიაშია ნათქვამი, „ბრალდებები, რომელთაც, საქართველოს ოპოზიციის გარდა, სერიოზულობით არავინ აღიქვამს, კვლავ აქტუალური მას შემდეგ გახდა, რაც თბილისმა შეწყვიტა კონტრაქტი ერთ-ერთ ამერიკულ ენერგეტიკულ კომპანიასთან.“
„მას შემდეგ, რაც საქართველოს მთავრობამ გაიმარჯვა საერთაშორისო საარბიტრაჟო საქმეში, ამერიკული ნავთობკომპანიის წინააღმდეგ, კონგრესში კომპანიის მხარდამჭერებმა თბილიში მმართველი პარტია დაადანაშაულეს რუსეთის სასარგებლოდ მოქმედებაში…
კონგრესის ოთხმა წევრმა, მათ შორის სენატორმა ტედ კრუზმა, 15 მაისს დაწერა წერილი, რომელშიც სახელმწიფო მდივანს მაიკ პომპეოს და ხაზინას მდივანს სტივენ მნუჩინს სთხოვდნენ გამოიძიონ ”ქართული კავშირები ამერიკის მტრულ მეტოქეებსა და მტრებთან.”
წერილის თანახმად, [საქართველოს] მთავრობას ბრალი ედება ამერიკის შეერთებული შტატების მიერ ირანის წინააღმდეგ დაწესებული სანქციების არასათანადო სიმკაცრით გატარებაში, ხოლო „ქართული ოცნების“ მმართველი პარტიის თავმჯდომარეს, ბიძინა ივანიშვილს – რუსეთის ხელისუფლებასთან კავშირებში“.
საქართველოს მთავრობის ოპონენტებს სჯერავთ ბრალდებების ივანიშვილზე რუსეთის გავლენის შესახებ, მიუხედავად იმისა, რომ ისინი არ იქნა დასაბუთებული.
„ქართული ოცნების“ მთავრობა, რომელმაც 2012 წელს მოიპოვა ხელისუფლება, არ იყო ისეთი დემონსტრაციულად ანტირუსული, როგორც მისი წინამორბედი, ერთიანი ნაციონალური მოძრაობა. ამის მიუხედავად, გაძლიერდა საქართველოს კავშირები ამერიკასთან – გაფართოვდა სამხედრო სფეროში თანამშრომლობა, ხოლო ქვეყნის კონსტიტუციაში ოფიციალურად აისახა საქართველოს მისწრაფებები ნატო-სა და ევროკავშირთან დაკავშირებით. მიუხედავად ამისა, რუსეთის მარიონეტობის შეთქმულების თეორიებმა კვლავ წამოყო თავი ვაშინგტონში მას შემდეგ, რაც თბილისმა გადაწყვიტა, სარჩელი შეეტანა ენერგეტიკული კომპანიის Frontera Resources წინააღმდეგ, რომელიც საქართველოში 90-იანი წლებიდან ფუნქციონირებს.
დეკემბერში გაირკვა, რომ საქართველოს მთავრობამ საერთაშორისო არბიტრაჟში სარჩელი შეიტანა „ფრონტერას“ წინააღმდეგ, ამ უკანასკნელის მხრიდან ხელშეკრულების ვალდებულებების შეუსრულებლობის გამო.
აპრილში მთავრობამ განაცხადა, რომ არბიტრაჟით დავა მის სასარგებლოდ გადაწყდა და გაწყვიტა კონტრაქტი „ფრონტერასთან“. „ფრონტერამ“ გაასაჩივრა არბიტრაჟის გადაწყვეტილების მთავრობისეული ინტერპრეტაცია. ამ პერიოდის განმავლობაში „ფრონტერა“ თვეობით თავის თანამშრომლებს ხელფასს არ უხდიდა. ფრონტერას მხარდამჭერმა კონგრესმენებმა დაადანაშაულეს თბილისი კომპანიის წინააღმდეგ მოქმედებაში უბრალოდ იმიტომ, რომ „ფრონტერა“ ამერიკული ფირმაა.
იანვარში პიტ ოლსონმა, წარმომადგენელთა პალატის რესპუბლიკელმა წევრმა ტეხასის შტატიდან, ივანიშვილს „რუსეთის მარიონეტი“ უწოდა და ცნობილი სატელევიზიო სერიალის (Sesame Street) ერთ-ერთ პერსონაჟს (Oscar the Grouch) შეადარა, რადგან „ორივე მარიონეტია და ორივე ნაგავს ახვავებს საკუთარ სახლში“. „ფრონტერამ“ გულუხვად დააფინანსა ოლსონის კამპანია, რის გამოც, საინფორმაციო ვებგვერდმა Texas Monthly ოლსონი იმავე სერიალის კიდევ ერთ პერსონაჟს (Big Bird) შეადარა, რადგან „ორივემ იცის, ვის უნდა უკმიოს გუნდრუკი“. ხსენებული წერილის ოთხი ავტორიდან სამმა ასევე მიიღო კამპანიის დაფინანსება „ფრონტერასგან“.
კონგრესმენების წერილი, რომელშიც ასახულია უპრეცედენტო სიმძიმის გეოპოლიტიკური ბრალდებები „ქართული ოცნების“ წინააღმდეგ, წონას მატებს მის ხელმომწერთა შორის 2016 წლის არჩევნებში პრეზიდენტობის კანდიდატის, ტედ კრუზის ყოფნა, ასევე ამ პროცესში პომპეოს და მნუჩინის ჩართვის მცდელობა.
წერილის ავტორები ცდილობენ, ერთმანეთს დაუკავშირონ საქართველოში მიმდინარე სხვა მოვლენებიც – მაგალითად, შარშან გაუქმებული ხელშეკრულება ანაკლიის მასშტაბური შავიზღვისპირა პორტის მშენებლობასთან დაკავშირებით. სავარძლის გეოპოლიტიკოსები შეეცადნენ ეს ეპიზოდი დაეკავშირებინათ რუსეთის გავლენასთან, ასევე – პორტთან, რომელიც თუ განხორციელდებოდა, შეეძლო შექმნა აღმოსავლეთ-დასავლეთის სატრანზიტო მარშრუტების რუსეთის გვერდის ავლით – მაგრამ ხელშეკრულების გაუქმება საქართველოს შიდა მეტოქეობასთან უფრო კავშირშია, ვიდრე ნებისმიერ გეოპოლიტიკურ მაქინაციასთან.
პომპეომ მაინც გამოთქვა შეშფოთება ანაკლიის გარშემო მიმდინარე გეოპოლიტიკურ მოვლენების გამო. გასულ წელს მან განაცხადა, რომ ეს პროექტი „გააღრმავებს საქართველოს ურთიერთობებს თავისუფალ ეკონომიკებთან და გადაარჩენს ქვეყანას რუსეთსა თუ ჩინეთზე ეკონომიკური დამოკიდებულებისგან“.
კანონმდებლები აგრეთვე ირწმუნებიან ირანულ საქმიანობას საქართველოში, სავარაუდოდ, პომპეოს ინტერესის მოსაპოვებლად, რომელიც ირანზე კიდევ უფრო გაბოროტებულია, ვიდრე ის რუსეთზე.
ყველაზე მძიმე ბრალდებები მაინც რუსეთს ეხება. წერილის ავტორები მოუწოდებენ ადმინისტრაციას, წარუდგინოს კონგრესს ინფორმაცია იმის შესახებ, თუ რამდენადაა „ჩართული „ქართული ოცნება“ ლეგიტიმური ამერიკული ბიზნესის გაძევების მცდელობებში“, ასევე „რუსეთის მთავრობასთან „ქართული ოცნების“ თავმჯდომარის, ბიძინა ივანიშვილის კავშირების შესახებ“ და „ამერიკული კომპანიების მიზანმიმართული გარიყვის შესახებ პორტის მშენებლობის პროცესიდან, რომელიც მიზნად ისახავს საქართველოს რუსეთზე დამოკიდებულებისგან გათავისუფლებას“.
ჯერ არ არის ცნობილი, როგორ იმოქმედებენ პომპეო და მნუჩინი თხოვნაზე.
ბრალდებები დიდი სანდოობით არ გამოირჩევა. მეორეც, აშშ-ს მთავრობა ცდილობდა შეენარჩუნებინა სამართლიანი შუამავლის როლი საქართველოს მძიმედ გაყოფილ შიდა პოლიტიკაში და ამ გამოძიების ხაზის გატარება შეაფერხებდა ამ ძალისხმევას. შესაბამისად, ამის ალბათობა ამერიკის სტანდარტებით მცირე კომპანიის გამო, ძალიან დაბალია“, – წერს გამოცემა.
