მუნიციპალური ტრანსპორტის თემა ის თემაა, რომელიც ერთიანად აწუხებს, როგორც მოსახლეობას, ასევე, ადგილობრივ ხელისუფლებას და ოპოზიციას. ლანჩხუთის დღევანდელი მოწვევის საკრებულოში ამ საკითხთან დაკავშირებით ბევრჯერ იმსჯელეს. საკანონმდებლო ორგანოს ორი ოპოზიციური ფრაქცია _ “ლანჩხუთი საქართველოსთვის” და ერთიანი ნაციონალური მოძრაობა” დიდი ხანია, აპელირებს ამ თემაზე და სხდომა არ გადიოდა, ტრანსპორტის პრობლემებზე რომ არ ყოფილიყო პოლემიკა.
“საზოგადოებრივმა ტრანსპორტმა საათობრივი გრაფიკით უნდა მოიცვას მთლიანი მუნიციპალიტეტი, მალთაყვისა და წყალწმინდის ჩათვლით. წლების წინ იყო, ე.წ. მწვანე ავტობუსები, რომელიც ჩადიოდა წყალწმინდასა და მალთაყვაში, ურეკშიც კი მიდიოდა. დღეს რამდენი ადამიანია დასაქმებული ამ ზონიდან მერიაში, საბავშვო ბაღსა თუ სკოლაში და მაშინ, როცა ექვსზე მთავრდება სამუშაო საათი, რა უნდა ქნან ამ ადამიანებმა?! აუცილებლად მოსაგვარებელია ტრანსპორტის პოლიტიკა.
ახლა ნახევარ მილიონ ლარს რომ ვრიცხავთ ბიუჯეტიდან ბავშვების ტრანსპორტით მომსახურებაში, ამას არ ჯობს, ხალხის არჩეულმა მერმა დააყენოს მთავრობის წინაშე საკითხი _ ამდენი ფულის ნაწილ-ნაწილ ხარჯვას, ერთხელ დიდი ფული მოგვეცით გამართული ავტობუსის საყიდლადო?! სხვებიც და მათ შორის, ჩემი შვილიც სიამოვნებით ისარგებლებს იმ ავტობუსით და დროულად წავა-წამოვა სკოლაში”, _ ამბობდა საკრებულოს სხდომებზე მუნიციპალური ტრანსპორტის თემაზე საუბრისას ოპოზიცია.
მალე მათ მხარი აუბეს მმართველი ძალის დეპუტატებმაც და საკითხმა უფრო მეტი აქტუალობა შეიძინა.
ამის შედეგი კი, ის იყო, რომ რამდენიმე პრობლემური მარშრუტი მწყობრში ჩადგა, გამოსწორდა გრაფიკიც, ამას დაემატა თბილისისთვის ჩამოწერილი, მაგრამ რეგიონებისთვის მაინც ასე თუ ისე საჭირო ძველი, ყვითელი ავტობუსების გამოჩენა. სამი ერთეული ასეთი ავტობუსი შეემატა ლანჩხუთის ავტოპარკს და მდგომარეობაც ცოტა გაუმჯობესდა.
და მაინც, საკრებულოს ოპოზიცია დაჟინებით ითხოვდა ახალ ავტობუსებს.
“ლანჩხუთის მუნიციპალიტეტს მდებარეობიდან გამომდინარე, გზებზე უამრავი ტურისტი მოძრაობს და არაა სახარბიელო მათ ასეთი მოძველებული ტექნიკით შეექმნათ ჩვენზე გარკვეული დამოკიდებულება”, _ ამბობდნენ ისინი..
თუმცა, გასული წლის ბოლოსკენ ამ საკითხის დადებითად გადაწყვეტას დიდი პერსპექტივა არ უჩანდა, რამეთუ მუნიციპალიტეტის მერმა, ალექსანდრე სარიშვილმა პირდაპირ განაცხადა საკრებულოს ერთ-ერთ სხდომაზე, რომ მუნიციპალიტეტს ახალი ავტობუსების შეძენის ფუფუნება არ გააჩნია. ტრანსპორტის თემაზე საუბრისას სარიშვილი აღნიშნავდა, რომ, ზოგადად, კერძო საკუთრების გაძლიერების მომხრეა.
“ზოგადად, ჩვენი მიდგომაა, რაც შეიძლება კერძო საკუთრება ავამუშაოთ და სახელმწიფო დაფინანსებიდან ჩაიხსნას ეს სექტორი”, _ თქვა მერმა საკრებულოს ერთ-ერთ სხდომაზე ტრანსპორტის თემაზე საუბრისას.
მაგრამ მოგვიანებით, როცა 2023 წლის ბიუჯეტის ფორმირება ხდებოდა, მაინც გამოინახა თანხები ხუთი ახალი ავტობუსის შესაძენად.
ლანჩხუთის ბიუჯეტში გასახორციელებელი ცვლილების მიხედვით ირკვევა, რომ მუნიციპალიტეტის საჭიროებისთვის ხუთი ავტობუსის შესაძენად 1717,5 ათასი ლარი გაიხარჯება. აქედან, ორი ავტობუსის შესაძენად 687 ათას ლარს ფინანსთა სამინისტრო გაიღებს, ხოლო სამი ავტობუსის შეძენა მუნიციპალიტეტმა უნდა განახორციელოს და საამისოდ ადგილობრივ ბიუჯეტს 1030,5 ათასი ლარის გაღება მართებს, რომლის 40% -იც მიმწოდებელს ავანსის სახით წინასწარ უნდა ჩაერიცხოს.
როგორც ამბობენ, ორი ავტობუსი რვა-რვა მეტრიანი იქნება, ხოლო დანარჩენი სამი _ შედარებით მომცრო.
ავტორი
