ლანჩხუთისა და ჩოხატაურის მუნიციპალიტეტების გაერთიანებული საარჩევნო ოლქის მაჟორიტარი დეპუტატი ნინო წილოსანი, 23 იანვარს, 5 საათზე ლანჩხუთში, ერთწლიანი საქმიანობის ანგარიშს წარადგენს.
ანგარიშის წარდგენის შესახებ ინფორმაცია წილოსანმა ფეისბუქის ოფიციალურ გვერდზე გაავრცელა და ყველას პრეზენტაციაზე დასწრებისკენ მოუწოდა.
ლანჩხუთის მუნიციპალიტეტის საკრებულოს დეპუტატი, „ნაციონალური მოძრაობის“ წევრი კახა ასკურავა ამბობს, რომ შეხვედრა 5 საათზე მიზანმიმართულად დაიგეგმა:
„ლანჩხუთი-ჩოხატაურის მაჟორიტარ დეპუტატს ქ-ნ ნინო წილოსანს, ხვალ, 5 საათისთვის დაუგეგმავს საჯარო შეხვედრა ამომრჩეველებთან და სხვა დაინტერესებულ პირებთან. ეტყობა, ლანჩხუთის მუნიციპალიტეტის სპეციფიკაში და მის გეოგრაფიულ მდებარეობაში საერთოდ ვერ ერკვევა დეპუტატი ან/და უარესი _ სპეცილურადაა შერჩეული მსგავსი არაგონივრული დრო და დამსწრე საზოგადოებაც წინასწარ ყავთ შერჩეული, რათა რიგითმა ამომრჩევლებმა ვერ მოახერხოს აღნიშნულ შეხვედრაზე მისვლა (რომც მივიდნენ, უკან რითი დაბრუნდნენ?!). სხვა ახსნა საღამოს 5 საათზე ჩანიშნულ შეხვედრას, უბრალოდ, არ აქვს!“ _ წერს ასკურავა ფეისბუქის საკუთარ გვერდზე.
ასკურავას დეპუტატი წილოსანი „გურია ნიუსთან“ პასუხობს და აღნიშნავს, რომ შეხვედრისთვის ნეიტრალური დრო შეარჩია:
_ არ მინახავს პოსტი. ასკურავას პოსტები სრულად მიკერძოებულია ხოლმე. მაქსიმალურად ნეიტრალური დრო ავიღე, რომ არც ძალიან გვიანი ყოფილიყო ამომრჩევლის სახლში გამგზავრებისთვის და ასევე დასრულებული ყოფილიყო ძირითადი სამსახურის სამუშაო დღე.
ასკურავას კი ვურჩევ, ობიექტურობა არ დაკარგოს და სათანადოდ შეაფასოს ჩემი ინიციატივა საჯაროდ და უშუალოდ განმეხილა გასული წელი, _ გვითხრა წილოსანმა.
_ ქალბატონო ნინო, ფიქრობთ, რომ 5 საათი გვიანი არ არის? ჩოხატაურიდან, ან აცანიდან მოსული ამომრჩეველი უკან რით უნდა დაბრუნდეს? ამ ამომრჩეველში იმათ ვგულისხმობთ, ვისაც ჯიპი არ ჰყავს…
_ ინფორმაცია როდესაც გავავრცელეთ, მითითებული იყო, რომ დაკავშირებოდნენ ჩემი ბიუროს უფროს, რომელიც დაინტერესებული პირის ტრასპორტირებას მოახდენდა…
_ მსგავსი ინფორმაცია თქვენი ფეისბუქის გვერდზე არ არის.
_ იქ წერია, რომ ბიუროს უფროს უნდა დაკავშირებოდნენ და დეტალებს ის გაარკვევდა. რეალურად, მაკა აწარმოებს აღრიცხვას. როდესაც ინფორმაცია გავავრცელეთ, იმ მომენტისთვის ისიც არ ვიცოდით, სად ჩატარდებოდა შეხვედრა და ამიტომ მივუთითეთ, რომ ბიუროს უფროსს დაკონტაქტებოდნენ. მსურველებს უნდა დაერეკათ და წინასწარ ჩაწერილიყვნენ.
_ ჩოხატაურელმა ამომრჩეველმა რა ქნას? ალბათ, ბევრი ჩოხატაურელი ვერ მოახერხებს დასწრებას სურვილის მიუხედავად…
_ სამწუხაროდ, ლანჩხუთის და ჩოხატაურის საარჩევნო ოლქი გაერთიანებულია.
_ ეს სამწუხაროა თქვენთვის?
_ არა. სამწუხაროდ, მოსახერხებლად რთულია ორი რაიონის გაერთიანების პირობებში ისეთი ადგილი შეირჩეს, რომლიც ორივესთან ახლოს იქნება. ნეიტრალურ ტერიტორიაზე ხომ არ გავაკეთებდი? ტერიტორიული მოწყობიდან გამომდინარე გამოვიდა ასე და შეირჩა ლანჩხუთი, _ გვითხრა წილოსანმა.
აღსანიშნავია, რომ წილოსანის მიერ გამოქვეყნებულ პოსტს, რომელიც შეხვედრის გამართვას ეხებოდა ამომრჩეველიც გამოეხმაურა. ბევრმა ინიციატივა მოუწონა, ბევრმა გააკრიტიკა. იყვნენ ისეთებიც, რომლებმაც წილოსანს საარჩევნო დაპირებების შეუსრულებლობაშიც დადეს ბრალი.
რა პრეტენზიები აქვს ამომრჩეველს წილოსანის მიმართ და ვის და რას პასუხობს დეპუტატი იხილეთ ამ ლინკზე.
