გუშინ, ახლო წარსულში ცნობილმა იტალიელმა მოთამაშემ, ამჟამად მწვრთნელმა ანდრეი პირლომ „ნაპოლის“ შესახებ ისაუბრა და აღნიშნა, რომ ნეაპოლური კლუბი და ინგლისური „მანჩესტერ სიტი“ ჩემპიონთა ლიგის მიმდინარე გათამაშების უპირობო ფავორიტები არიან.
„მანჩესტერ სიტი“ და „ნაპოლი“ – ეს გუნდები ჩემპიონთა ლიგის მოგების მთავარი კანდიდატები არიან. სპალეტის გუნდი საოცრად თამაშობს. თუ რამდენიმე თვეში ისევ ამ დონეზე იქნებიან, მათი შეჩერება რთული იქნება“, – განაცხადა ანდრეი პირლომ.
გუშინ იტალიურ მედიას „ნაპოლის“ მთავარი მწვრთნელი ლუჩანო სპალეტი ესაუბრა და განაცხადა, რომ მისი გუნდისთვის მსოფლიოს ჩემპიონატის პაუზა კარგია, რადგან უსასრულოდ დადებითი შედეგების სერია ვერ გაგრძელდებოდა.
„მსოფლიოს ჩემპიონატს არ ვუყურებ და არც სეზონის განახლებაზე ვფიქრობ, რადგან დროს ოჯახთან ერთად ვატარებ, რომელიც მენატრებოდა. ეს პერიოდი ყველასთვის სასარგებლოა იმისათვის, რომ ყველაფერი დალაგდეს და გუნდი უფრო ძლიერი გახდეს.
დარწმუნებული ვარ, ამ პაუზას კარგად გამოვიყენებთ, რადგან შეკრებაზე მივდივართ და სერიოზულად ვიმუშავებთ. კარგი პერიოდი გვქონდა, მაგრამ უსასრულოდ ასე თამაში შეუძლებელი იქნებოდა, ამიტომ ასეთ დროს პაუზა და გათიშვა, შეიძლება კარგი იყოს და კიდევ ერთი კარგი პერიოდი დაგვიდგეს“, – განაცხადა ლუჩანო სპალეტიმ.
გუშინ ესპანურ სპორტულ მედიაში ქართველებისათვის საინტერესო ინფორმაცია გავრცელდა. აღმოჩნდა რომ საკალათბურთო კლუბი „მურსია“ საქართველოს ნაკრების მცველ რატი ანდრონიკაშვილით არის დაინტერესებული.
მიმდინარე სეზონის დაწყების წინ რატი ანდრონიკაშვილმა საკუთარი ნებით უარი თქვა აშშ–ის სტუდენტურ ჩემპიონატში კარიერის გაგრძელებაზე. ის ერთ–ერთ ძლიერ გუნდში, „კრეიტონში“ თამაშობდა, თუმცა კარიერის პროფესიულ დონეზე გაგრძელება გადაწყვიტა. ბოლო თვეების განმავლობაში 21 წლის მცველი უგუნდოდ გახლდათ.
„მურსიაში“ საქართველოს ნაკრების გამთამაშებელი თად მაკფადენი ასპარეზობს.
ორი დღის წინ, გორის სპორტის სასახლეში ჩატარებულ ევროპის ჩემპიონთა ლიგის მორიგ გათამაშებაში არაერთმა სახელოვანმა ძიუდოისტმა მიიღო მონაწილეობა. მათ შორის უკრაინელი დარია ბილოდიდიც იყო, რომელიც ესპანური „ვალენსიას“ ღირსებას იცავდა.
დარიამ ტურნირის დასრულების შემდეგ ინსტაგრამში ფოტო გამოაქვეყნა და საქართველოს მადლობა გადაუხადა.
„მადლობა საქართველოს მასპინძლობისთვის. ყოველთვის დიდი პატივია აქ ჩამოსვლა. მადლობა ყველა ქომაგს ასეთი ძლიერი მხარდაჭერისთვის. თქვენ განსაკუთრებულები ხართ“, – დაწერა დარია ბილოდიდმა.
დარია ბილოდიდი მსოფლიოსა და ევროპის ორგზის ჩემპიონია, მას 2020 წლის ტოკიოს ოლიმპიურ თამაშებზე ბრინჯაოს მედალი აქვს მოგებული.
გუშინ ცნობილი გახდა, რომ ბრაზილიურ „ფლამენგოს“ პორტუგალიელი შემტევი კრიშტიანო რონალდოს დამატება სურს.
სამხრეთ ამერიკელთა მიზანია, სპონსორები მოძებნოს და ფეხბურთელი სამი თვით გადაიბიროს, რათა მსოფლიოს საკლუბო ჩემპიონატზე დაეხმაროს.
გუშინ პორტუგალიელთან დაკავშირებით კიდევ ერთი ინფორმაცია გავრცელდა. „CBS Sports“-ის მტკიცებით, საუდის არაბეთის კლუბმა „ალ ნასრმა“ კრიშტიანუ რონალდუს სამწლიანი კონტრაქტი შესთავაზა იმისთვის, რომ მათ გუნდში ითამაშოს, რა დროშიც პორტუგალიელი ვარსკვლავი 225 მილიონ დოლარს მიიღებს. „ალ ნასრი“ აზიის ერთ–ერთი ყველაზე ტიტულოვანი კლუბია. მათ ანგარიშზე ლიგის 9 ტიტულია.
რამდენიმე დღის წინ, 37 წლის რონალდო თავისუფალი აგენტი გახდა. მან „მანჩესტერ იუნაიტედთან“ ხელშეკრულება ორმხრივი შეთანხმების საფუძველზე გაწყვიტა. რონალდოს მომავალში არაერთ ცნობილ კლუბს უკავშირებენ, მათ შორის ერთ–ერთი ხვიჩა კვარაცხელიას „ნაპოლია“.
ესპანური გამოცემა „Marca“-ს მტკიცებით, კატალონიურ “ბარსელონას“ სურს, რომ კლუბის მცველ ჟორდი ალბასთან კონტრაქტი გაწყვიტოს.
„ბარსას“ დირექტორატმა ეს გადაწყვეტილება იმიტომ მიიღო, რომ სახელფასო ჭრილი შეამციროს.
ჟორდი ალბას საკითხი საბოლოოდ ზამთარში გადაწყდება, მას შემდეგ რაც მუნდიალი დასრულდება. ალბას „ბარსელონასთან“ კონტრაქტი 2024 წლამდე აკავშირებს და მას ამ კლუბის მაისური 441 შეხვედრაში მოუგია.
თავის მხრივ, „ბარსელონას“ ბრაზილიური „პალმეირასის“ ამომავალი ვარსკვლავის, 16 წლის ენდრიკის გადაბირება სურს. ინფორმაცია კატალონიელთა მთავარმა მწვრთნელმა ჩავიმ ოფიციალურად დაადასტურა.
„ვესაუბრეთ მამამისს და ასევე მას, ავუხსენით ჩვენი პროექტი ბარსელონაში. ვეძებთ ნიჭიერ ფეხბურთელებს და ის ტალანტია, რომელსაც შეუძლია თამაშში განსხვავების შექმნა. გოლებს იტანს, დრიბლინგებს აკეთებს და არის მოთამაშე, როგორც აწმყოსთვის, ისე მომავლისთვის.
ისეთი ფეხბურთელია, როგორიც გვჭირდება. იცის ჩვენი პროექტი და ამაზე უკვე ვსაუბრობთ. იმედი მაქვს, რომ ჩვენი ფეხბურთელი გახდება, მაგრამ ეს მასზეა დამოკიდებული. ეს ყოველთვის ასეა, როგორც წესი, ფეხბურთელი მიდის იქ, სადაც თამაში სურს“, – განაცხადა ჩავიმ.
ენდრიკი ბრაზილიაში მთავარ ტალანტად მიიჩნევა, ბრაზილიის „სერია A“–ს გასულ სეზონში მან 7 მატჩში 3 გოლის გატანა მოახერხა, მიუხედავად იმისა, რომ ჯერ მხოლოდ 16 წლისაა.
ავტორი
