13 ნოემბერს ოზურგეთის მუნიციპალიტეტის მერიაში ჩატარდა სხდომა, სადაც მოხდა შიდა აუდიტის და ინსპექტირების სამსახურის მიერ ზეპირი მოსმენა. ზეპირი მოსმენის შინაარსი მდგომარეობდა შემდეგში _ მანამდე შიდა აუდიტის და ინსპექტირების სამსახურს, ოზურგეთს მუნიციპალიტეტის მერიის მიერ ბრძანებით დაევალა, სოციალური და ჯანდაცვის სამსახურის თანამშრომლებზე დისციპლინური წარმოების დაწყება. თემა იყო ბენეფიციარების ბინის ქირით უზრუნველყოფის საკითხები. კერძოდ, სამართლებრივად იყო თუ არა გაცემული დახმარებები. აუდიტის ზეპირ მოსმენას ესწრებოდნენ ოზურგეთის მუნიციპალიტეტის მერის მოადგილე ირაკლი სირაძე, რომელიც სოციალურ მიმართულებას კურირებს, ჯანდაცვისა და სოციალური სამსახურის უფროსი თამარ დუმბაძე, განყოფილების უფროსი ნათია ვაშალომიძე და თანამშრომლები ქეთევან სანიკიძე და მარიამ პაპაშვილი, იურიდიული სამსახურის უფროსი, ლაშა თავაძე, შიდა აუდიტის სამსახურის ინსპექტირების განყოფილების უფროსი, მარიკა ნაცვალაძე, შიდა აუდიტის და ინსპექტირების სამსახურის უფროსის მოვალეობის შემსრულებელი გერასიმე ბოლქვაძე და თამილა კიღურაძე.
აღნიშნულ ზეპირ მოსმენაზე არ დაუშვეს ჟურნალისტები, კარებთან იდგა დაცვის პოლიცია და კითხვაზე, თუ რატომ არ გვიშვებდნენ სხდომაზე, გვიპასუხეს, რომ: „ ვერ შეგიშვებთ, ასე გვიბრძანესო“.
გასაკვირი ის იყო, რომ დაცვის სამსახურის გამოძახების მიზეზი ან საჭიროება იქ არ იყო, რადგან არავის უთქვამს რაიმე ხმამაღლა და არც არავის მოუნდომებია სხდომაზე ძალით შესვლა.
კითხვაზე, თუ რატომ არ დაუშვეს სხდომაზე ჟურნალისტები, ოზურგეთს მუნიციპალიტეტის მერიის იურიდიული სამსახურის უფროსი ლაშა თავაძე განმარტავს, რომ ეს იყო დახურული სხდომა და ამიტომ არ დაუშვეს მედიის წარმომადგენლები. კვლავ კითხვაზე, თუ რომელი კანონის რა მუხლით ან რეგულაციებით მოხდა ეს, თავაძემ განაცხადა:
_ ეს ხდება ზოგად ადმინისტრაციული კოდექსის 110-ე, 111-ე და 112-ე მუხლების თანახმად. მოსმენის დროს საუბარი იყო პერსონალურ მონაცემებზე. ამიტომ, როცა განიხილება პერსონალური მონაცემები, ეს არ უნდა გასაჯაროვდეს, _ გვითხრა თავაძემ.
„გურია ნიუსმა“ კომენტარი სთხოვა ასევე შიდა აუდიტის და ინსპექტირების სამსახურის უფროსის მოვალეობის შემსრულებელს, გერასიმე ბოლქვაძეს. თუმცა, მან გვითხრა, რომ ეს დახურული სხდომა იყო და ვერაფერს ვერ გვეტყოდა.
ახალგაზრდა იურისტთა ასოციაციის თავმჯდომარე, თამაზ ტრაპაიძე კი ასეთ კომენტარს აკეთებს:
_როგორც კითხვიდან გამომდინარე მივხვდი და გავიგე, ეს იყო ადმნისტრაციული წარმოების პროცესი, შიდა მუშაობა და არა საჯარო შეხვედრა. როცა საქმე ეხება პერსონალურ მონაცემებს, ის არ აუნდა გამჟღავნდეს. თუ საჯარო იყო და დაიხურა, მაშინ მოითხოვეთ ოფიციალური წერილით, რა მიზნით დაიხურა, რა სახის სხდომა იყო და უფრო კონკრეტულად ამის შემდეგ გიპასუხებთ, _ გვითხრა მან.
საზოგადოებისთვის ცნობილია ოზურგეთის მუნიციპალიტეტის მერიის სოციალური და ჯანდაცვის სამსახურის უფროსის თამარ დუმბაძის გახმაურებული საქმე. როგორც თავად ქალბატონი თამარი აცხადებს და სახალხო დამცველსაც მიმართა, ოზურგეთის მუნიციპალიტეტის მერი, კოტე შარაშენიძე მასზე გამუდმებით ახდენს ზეწოლას და სურს დაითხოვოს სამსახურიდან. ყოველივე კი ეს ხდება პოლიტიკური ნიშნით.
როგორც ცნობილია, შიდა აუდიტის ინსპეტქირების სამსახური როცა ახდენს ზეპირ მოსმენას ასეთ საკითხზე, არსებობს რისკი, საჯარო მოხელე გაუშვან სამსახურიდან, რადგან მას ერთხელ უკვე მისცა მუნიციპალიტეტის მერმა გაფრთხილება. მეორე გაფრთხილების შემთხვევაში კი მერს აქვს უფლება, კანონიდან გამომდინარე, სამსახურის უფროსი გაათავისუფლოს თანამდებობიდან. მით უფრო, თამარ დუმბაძემ არაერთგზის განაცხადა, რომ მერი მასზე ზეწოლას ახდენს. ამაზე საუბრობდა შიდა აუდიტის სამსახურის ყოფილი უფროსი კობა ხაბალაშვილი, რომელსაც მერმა უკვე შეუჩერა უფლებამოსილება და ახლა მოვალეობას გერასიმე ბოლქვაძე ასრულებს.
ზოგად ადმინისტრაციული კანონის თანახმად, ისიც შესაძლებელია, რომ 50 ადამიანზე მეტს თუ აქვს სურვილი, დაესწროს მოსმენას, პროცესი უნდა გახდეს საჯარო. თუმცა, თამარ დუმბაძე აცხადებს, რომ მოსი გულშემატკივები, 50 კაცზე მეტი მოსული იყო, თ უმცა მერიაში განუცხადეს, რომ სხდომა უნდა ყოფილიყო დახურული.
ზეპირი მოსმენის დასრულების შემდეგ, თამარ დუმბაძემ, მიუხედავად ჩვენი თხოვნისა, „გურია ნიუსთან“ კომენტარი არ გააკეთა. მან აღნიშნა, რომ თხუთმეთ ნოემბერს ოზურგეთში უნდა ჩამოვიდნენ სახალხო დამცველის აპარატის წარმომადგენლები და საზოგადოებისთვის უფრო ბევრი რამ გახდება ცნობილი.
როგორც „გურია ნიუსმა“ გაარკვია, სახალხო დამცველის წარმომადგენელთა შეხვედრა დუმბაძესთან და მერიის წარმომადგენლებთან საჯარო ხასიათის არაა.
ჩვენ კვლავ კითხვით მივმართეთ თამარ დუმბაძეს, დაზუსტებით იცის თუ არა სად და რა სახის შეხვედრა შედგება თხუთმეტ ნოემბერს მისსავე საქმესთან დაკავშირებით.
თავდაპირველად მან გვითხრა, რომ თუ შეხვედრა დახურული იქნება, ის არ დაესწრებოდა, თუმცა, მერე გადაიფიქრა და თანახმაა, შემოთავაზებისამებრ, თავადაც და მერიის წარმომადგენელიც ცალ-ცალკე შეხვდნენ სახალხო დამცველის აპარატის წარმომადგენლებს.
