„ვინ გაწვდით ინფორმაციას? რატომ არ იციან ჩვენი კარანტინში ყოფნის შესახებ? ძალიან ცუდი, რომ არასწორ ინფორმაციას გაწვდიან!“ _ ასეთი შინაარსის წერილი „გურია ნიუსმა“ ფეისბუქის ოფიციალურ გვერდზე გუშინ მიიღო.
პიროვნებამ, რომელიც ბათუმის საკარანტინო ზონიდან, სასტუმრო „თანამგზავრიდან“ დაგვიკავშირდა, თავად გვთხოვა მისი სახელის და გვარის იდენტიფიცირება მოგვეხდინა _ ის ჩოხატაურის მუნიციპალიტეტის სოფელ გუთურში მცხოვრები ნათია ბოლქვაძეა.
როგორც ნათიამ მოგვწერა, ბათუმის საკარანტინო ზონაში ოჯახის წევრებთან ერთად იმყოფება.
„ამ წუთას სამი ადამიანი ვიმყოფებით ბათუმში, სასტუმრო „თანამგზავრში“ კარანტინში. აქ დასამალი არაფერია. ერთი ჩოხატაურელი, თუ არ ვცდები, კიდევ უნდა იყოს. რომ წერთ ერთი ჩოხატაურელიო, სამნი ვართ ერთად, ერთი ოჯახის წევრები“, _ გვწერს ნათია.
მისივე თქმით, ისინი ჰოლანდიიდან ჩამოფრინდნენ და მაშინვე ბათუმში გადაიყვანეს.
„ჩვენ 17 მარტს ჰოლანდიიდან ჩამოვედით. კოპიტნარში როგორც კი დაეშვა თვითმფრინავი, მაშინვე ბორტზე ამოვიდა სასაზღვრო პოლიცია, იქ მყოფ ყველა ადამიანს ჩამოგვართვეს პასპორტები და სათითაოდ გადმოგვიყვანეს. ჩაგვსვეს ავტობუსებში, სულ ოთხი ავტობუსი იყო. აქედან 1 ავტობუსი მახინჯაურში დარჩა. დანარჩენი ბათუმში წამოვიდა. პატრულების ჯარი მოგვაცილებდა“.
როგორც ნათია გვიყვება, მათ ჯანმრთელობასთან დაკავშირებული პრობლემები არ აქვთ. მას აინტერესებს, რატომ არ ფლობენ გურიის რეგიონის ჯანდაცვის ცენტრში ინფორმაციას მათი კარანტინში ყოფნის შესახებ.
„ჩვენ კარგად ვართ. არც სიცხე გვაქვს, არც სხვა რაიმე სიმპტომი, უბრალოდ, თავის დაცვისა და უსაფრთხოების მიზნით გადმოგვიყვანეს. არანაირი პრობლემა არ გვაქვს, უბრალოდ, საინტერესოა, რატომ არ იცის რაიონმა ჩვენი არსებობის შესახებ?! ეს ძალიან მაინტერესებს! ზოგი მალავს. დასამალი არაფერია. მთავარია, რომ ჯანმრთელად ვართ და არანაირი პრობლემა არ გვაქვს. ჩემთან ერთად ჩემი შვილი და მეუღლის ბიცოლა იმყოფება.
წითელმა ჯვარმა დაგვირეკა და მოგვიკითხა, ტურისტულმა სააგენტომაც, ვთვლი, რომ რაიონიდან და რეგიონიდანაც უნდა მოვეკითხეთ ვინმეს, მარტო ჩვენი სოფლის, გუთურის დეპუტატი ლაშა თოლორდავა მეხმიანება ყოველდღე და კითხულობს, რამე ხომ არ მჭირდება, მადლობა ამისთვის მას, მაგრამ აქ მართლა არაჩვეულებრივ პირობებში გვამყოფებს სასტუმროს ადმინისტრაცია. გულწრფელ მადლობას ვუხდი „თანამგზავრის“ მთელ კოლექტივს არაჩვეულებრივი მასპინძლობისთვის, _ გვწერს ნათია ბოლქვაძე, რომელიც კიდევ ერთხელ გვთხოვს, რომ არ მოვერიდოთ მისი ვინაობის იდენტიფიცირებას.
იმის გასაგებად, ფლობენ თუ არა ინფორმაციას გურიის რეგიონული ჯანდაცვის ცენტრში ნათია ბოლქვაძისა და მისი ოჯახის წევრების ბათუმის საკარანტინო ზონაში ყოფნის შესახებ, გურიის რეგიონის საზოგადოებრივი ჯანდაცვის ცენტრის დირექტორს არჩილ მჟავიას დავუკავშირდით (საუბარი ჩაწერილია 20 მარტს. ავტ).
მჟავიას თქმით, საკარანტინო ზონაში ჩოხატაურიდან მხოლოდ 1 ადამიანი იმყოფება, რომლის სახელსა და გვარს ვერ გვეტყოდა.
“დღეს შემოვიდა თბილისის აეროპორტიდან 2 პიროვნება ჩოხატაურში და სარფის საბაჟო პუნქტიდან შემოვიდა 1 ქალბატონი. ამ ქალბატონზეა საუბარი? მე სამწუხაროდ, ვერ გეტყვით სახელს და გვარს. ესენი შემოვიდნენ ჩოხატაურში და თვითიზოლაციაში იმყოფებიან საკუთარ სახლში. კარანტინში ყოფნასა და თვითიზოლაციას შორის სხვაობაა. ამ ადამიანებთან პროცედურული კონტაქტი აქვს ჩოხატაურის ჯანდაცვის ცენტრი დირექტორს ნატო ჯიბუტს და თუ რაიმე საეჭვო გახდება მიიღება შესაბამისი ზომები“, _ გვეუბნება არჩილ მჟავია.
„გურია ნიუსის“ კითხვაზე, ამ ეტაპზე რამდენი ადამიანი იმყოფება ჩოხატაურიდან კარანტინში, მჟავია გვპასუხობს, რომ 1 ადამიანი იმყოფება, რაც იმას ნიშნავს, რომ ნათიასა და მისი ოჯახის წევრების ბათუმში, სასტუმრო „თანამგზავრის“ საკარანტინო ზონაში ნათიასა და მისი ოჯახის წევრების ყოფნის შესახებ ცენტრში არაფერია ცნობილი.
