ჩოხატაურის მუნიციპალიტეტის საკრებულოს სხდომაზე შესყიდვების სამსახურის უფროსის ანგარიშის მოსმენას ხმაური მოჰყვა.
„პატრიოტთა ალიანსის“ დეპუტატი ირაკლი ახობაძე დაინტერესდა, რატომ არ წერია ანგარიშში, თუ რაში დაიხარჯა 37 934 ლარი, რომელიც სოფლის მხარდამჭერი პროგრამების განხორციელების შედეგად ეკონომიის სახით დარჩა.
შესყიდვების სამსახურის უფროსის თქმით, ეს თანხა ხელოვნების სასახლისთვის როიალის შეძენას მოხმარდა და ამის საშუალებას კანონი იძლეოდა.
„50 000 ლარად შევიძინეთ როიალი და მაშინ თქვით რომ სხვა თანხა დახარჯოთ. ახლა გაირკვა რომ სოფლის პროგრამებზე მორჩენილი ფულიც ამაზე დაგიხარჯავთ. ეს კანონის დარღვევაა, რადგან თანხა რეგფონდიდან იყო წამოსული და წლის დასაწყისში არსად არ გქონდათ მითითებული, რომ მორჩენილი თანხით როიალს შეიძენდით“, _ აღნიშნა ახობაძემ.
ვლადიმერ გოგიბერიძის თქმით ამით კანონი ნამდვილად არ დარღვეულა, რასაც გამგეობის იურისტებიც დაეთანხმნენ.
აღსანიშნავია რომ 50 000 ლარად ნაყიდი როიალი უკვე დაზიანებულა. ჩვენი ინფორმაციით გერმანიიდან ჩამოტანილო ინსტრუმენტი ჩამოტანის დღესვე, სცენაზე დადგმის დროს გაებზარათ მუშებს.
