ირკვევა, რომ ლანჩხუთში „ევროპული საქართველოს“ ადგილობრივი ორგანიზაციის თავმჯდომარემ პარტიიდან წასვლის გადაწყვეტილება მიიღო, _ ამის თაობაზე განცხადებას ირაკლი მარშანიშვილი ფეისბუქზე ავრცელებს და განმარტავს, რომ დაგეგმილი თვითმმართველობის არჩევნებზე დამოუკიდებელ კადიდატად იყრის კენჭს.
„2010 წლიდან ვარ ქართულ პოლიტიკაში, 2017 წლიდან ვიყავი „ევროპული საქართველოს“ ლანჩხუთის ორგანიზაციის თავმჯდომარე. დღეის მდგომარეობით ვარ საკრებულოს წევრი და წარმოვადგენ ამ პარტიას. მივიღე გადაწყვეტილება, დავტოვე აღნიშნული თანამდებობა არა პოლიტიკური შეხედულებების და ღირებულებების, არამედ სხვა სუბიექტური თუ ობიექტური მიზეზების გამო“, _ განმარტავს მარშანიშვილი.
მისივე ინფორმაციით, აღნიშნულ გადაწყვეტილებას არაერთი ჭორი მოჰყვა.
„ჩემს გადაწყვეტილებას მოჰყვა უსაფუძლო ჭორები, რის გამოც მინდა მკაფიოდ დავაფიქსირო, რომ მივიღე საბოლოო და მყარი გადაწყვეტილება, კენჭი ვიყარო დამოუკიდებელი (უპარტიო) მაჟორიტარის რანგში ჩოჩხათში. მიმაჩნია, ჩემს შემთხვევაში ეს ყველაზე სწორი და სამართლიანი გადაწყვეტილებაა, რომ ვიყო თითოეული ჩოჩხათელის დეპუტატი მიუხედავად მათი პოლიტიკური შეხედულებებისა“, _ წერს მარშანიშვილი საკუთარ განცხადებაში და პროდასავლური ოპოზიციური პარტიების მხარდაჭერის იმედს გამოთქვამს.
