გასულ ოთხშაბათს, ლანჩხუთის მუნიციპალიტეტის სოფელ ნინოშვილში, გულიანის, ჩოჩხათისა და ნინოშვილის ადმინისტრაციული ერთეულების მოსახლეობამ მორიგი აქცია გამართა და ოზურგეთი-ლესის ავტობანზე მომუშავე მძიმეწონიანი მანქანების გადაადგილება კიდევ ერთხელ გააპროტესტა.
საქმე ისაა, რომ ავტობანის გრიგოლეთის 12-კილომეტრიან მონაკვეთზე მომუშავე კომპანიის _ “ბორანის” კუთვნილი მძიმეწონიანი მანქანები, რომლებიც ინერტულ მასალას ოზურგეთის მუნიციპალიტეტის სოფელ სილაურიდან ეზიდებიან, ტრანსპორტირებისთვის ოზურგეთი-ლესის გზას იყენებენ. ნინოშვილისა და მიმდებარე სოფლების მოსახლეობა სწორედ ამ მძიმეწონიანი მანქანების ხშირ მოძრაობას აპროტესტებენ და მათთვის ალტერნატიული გზის მოძებნას ან მათი ტვირთმზიდაობის შეზღუდვას ითხოვენ.
აქციის მონაწილეთა განმარტებით, ინერტული მასალით დატვირთული მანქანების მოძრაობა საცხოვრებელ სახლებს აზიანებს და მათ უსაფრთხოებას საფრთხეს უქმნის.
“ეს ისედაც დიდი მოცულობის მანქანები დამატებით ზედმეტი ტვირთით დადიან, რის გამოც გზაც ზიანდება და ჩვენი საცხოვრებელი სახლებიც, მით უმეტეს, რომ ისედაც მეწყრული ზონაში ვცხოვრობთ. თანდათან უფრო გაუსაძლისი ხდება ჩვენი ყოფა, დღე კი არა, არც ღამის საათებში გვაქვს მოსვენება. კომპანია კი ამბობს, რომ თითქოს საღამოს ექვსი საათის შემდეგ აღარ მუშაობენ, მაგრამ ფაქტია, რომ 24-საათიან რეჟიმში გადაადგილდებიან ეს მანქანები.
ჩვენი მოთხოვნაა, თუ ალტერნატიული გზის მოძებნა არ მოხერხდება, ნორმაზე მეტი ტვირთით მაინც ნუ დატვირთავენ ამ მანქანებს. გასაგებია, რომ ავტობანი კეთდება და ძალიან მნიშვნელოვანია, მაგრამ ამის გამო გაკეთებული ინფრასტრუქტურაც არ უნდა გავაფუჭოთ და მოსახლეობაც არ უნდა დავაზარალოთ.
მარტო ცენტრალური გზა კი არაა გაფუჭებული, არამედ სოფლის შიდა გზებიც გამოსულია ამ მანქანების გამო მწყობრიდან. ყველა კარგად ხედავს, რომ ეს გზა ვერ უძლებს ამ მძიმეწონიანი მანქანების გადაადგილებას, მაგრამ რატომღაც მაინც მისცეს უფლება კომპანიას აღნიშნული გზით ესარგებლა. ჩვენ ხელთ გვაქვს გეოლოგების დასაბუთებული დასკვნა, სადაც ნათლად ჩანს, რა მდგომარეობაშია ჩვენი სახლები და გზა. ახლა, ვისაც ევალება, კეთილი ინებოს და დაადგინოს, რეალურად რა ტევადობის ტვირთის მქონე მანქანებს შეუძლიათ იარონ აქ. მერე დადგან სასწორი და გააკონტროლონ კომპანიის კუთვნილი მანქანების ტვირთმზიდაობა. სანამ ჩვენს მოთხოვნებს არ გაითვალისწინებენ, მანამ ავტობანზე მომუშავე ვერც ერთი მანქანა ვერ გაივლის აქ”, _ ამბობდნენ აქციაზე შეკრებილები.
ნინოშვილში მოსახლეობასთან შესახვედრად ლანჩხუთის მუნიციპალიტეტის მერი, ალექსანდრე სარიშვილი და კომპანია “ბორანის” წარმომადგენლებიც იმყოფებოდნენ. საბოლოოდ, შეთანხმება შედგა და გადაწყდა, რომ სანამ არ დაიდგმება სასწორები და არ გაკონტროლდება ინერტული მასალით დატვირთული მანქანების რეალური წონა, მანამ ავტობანზე მომუშავე მანქანები ამ გზით ვერ ისარგებლებენ. პირობის არშესრულების შემთხვევაში კი, ნინოშვილისა და მიმდებარე სოფლების მოსახლეობა აქციის განახლებისა და გზის გადაკეტვის პირობას ძალაში ტოვებს.
აღნიშნულ აქციას, რამდენიმე დღით წინ უსწრებდა სოფლის მოსახლეობის შეხვედრა მხარის გუბერნატორთან, მერაბ ჭანუყვაძესთან, რომელზეც მუნიციპალიტეტის მერი, ალექსანდრე სარიშვილი და საკრებულოს თავმჯდომარე, ბესიკ ტაბიძეც იმყოფებოდნენ. ამ შეხვედრას გზების მოვლა-შენახვის კონტრაქტორი და კომპანია “ბორანის” წარმომადგენლებიც ესწრებოდნენ. როგორც ლანჩხუთის მერიის ოფიციალური გვერდიდან გახდა ცნობილი, ორმხრივი შეთანხმება ხელისუფლების წარმომადგენლებსა და მოსახლეობას შორის მაშინაც შედგა.
“მოსახლეობასთან ერთად საბოლოოდ შევთანხმდით, რომ ორივე მხარის ინტერესი აუცილებლად იქნება დაცული. ჩვენ, ამ საკითხზე უკვე დავიწყეთ მუშაობა, მოვიწვევთ გეოლოგებს და არსებული პრობლემები ეტაპობრივად მოგვარდება”, _ ამბობდა ნინოშვილელებთან შეხვედრის შემდეგ მერაბ ჭანუყვაძე, თუმცა, მიუხედავად ამისა, აღმოჩნდა, რომ სოფლის მოსახლეობა მხარის გუბერნატორთან დადებული შეთანხმებით ვერ დაკმაყოფილდა და შეხვედრიდან რამდენიმე დღეში აქციაც გამართა.
