ოზურგეთის მუნიციპლიტეტის ერთ-ერთი სოფლიდან „გურია ნიუსს“ სანდო წყარომ აცნობა, რომ მათ სოფელში და ასევე, მუნიციპალიტეტის კიდევ ექვსი სოფლის (ლაითურის, მთისპირის, ასკანის და კიდევ ოთხი სოფლის) საბავშვო ბაღები სეს-ის რეგიონულმა სამსახურმა 400-400 ლარით დააჯარიმა. წყარომ გვითხრა ისიც, რომ მისი სოფლის ბაღის გამგემ თანამშრომლები გააფრთხილა, ეს ამბავი არ გახმაურებულიყო. წყაროს თქმით, ანალოგიურად გააფრთხილეს სხვა სოფლების საბავშვო ბაღების გამგეებმა თავიანთი თანამშრომლები.
ინფორმაციის გადასამოწმებლად ოზურგეთის მუნიციპალიტეტის სკოლამდელი აღზრდის ცენტრის დირექტორს მაკა ჭყონიას მივმართეთ და ვკითხეთ, მართლა დააჯარიმეს თუ არა ოზურგეთის მუნიციპალიტეტის სოფლების საბავშვო ბაღები და ანალოგიური რამ ხომ არ მომხდარა ქალაქის ბაღებშიც.
მაკა ჭყონიამ დაადასტურა, რომ სოფლის ბაღები მართლაც დაჯარიმდა, ქალაქის კი _ არა.
_ კი, მოხდა დაჯარიმება, თუმცა, ეს არ არის საიდუმლო და არც გასაიდუმლოებულა. ჩვენ სურსათის ეროვნული საგენტოს რეგიონული სამსახურიდან მოგვცეს რეკომენდაცია, რომ 15 სექტემბრამდე უნდა ჩატარებულიყო სხვადასხვა სახის სარემონტო სამუშაოები. გაკეთდა უმეტესი _ დამონტაჟდა და გაკეთდა წყლის ელექტროგამათბობლები, გაზის გამწოვები, შეიცვალა ინვენტარი. ასევე, შევიძინეთ ახალი ჭურჭელი, განახლდა დეზობარიერები, თუმცა, ყველაფერი არ მოესწრო.
_ კონკრეტულად რა ვერ გააკეთეთ?
_ მაგალითად, ვერ მოესწრო ბაღებში პერსონალური ტუალეტის გაკეთება. სხვადასხვა სახის სარემონტო სამუშაოები. ამიტომ მოხდა თითოეული ბაღის 400 ლარით დაჯარიმება.
_ რამდენი ლარის სამუშაო დარჩა შესასრულებელი და როცა ვერ ასწრებდით, თუ მიმართეთ მერიას გადავადების მოთხოვნით, რომ მერე ჯარიმა არ დაეკისრებინათ?
_ სულ 116 ათასი ლარის სამუშაოებია შესასრულებელი. მივმართეთ, როგორ არა. გონივრულ ვადას ვითხოვდით, თუმცა, არ გადაგვიწიეს, ვერ მოვასწარით, დროში ვერ ჩავეტიეთ, _ გვითხრა მაკა ჭყონიამ.
მისივე თქმით, ამჯერად სამი თვის ვადით, რეკომენდაცია ისევ დატოვეს ძალაში, შედგა სადეფეტქო აქტები და ახლა ეცდებიან, ახლა მაინც ჩაეტიონ რეკომენდირებულ ვადებში.
_ ქალბატონო მაკა, რადგან სამი თვით გადავადება დაჯარიმების შემდეგ შესაძლებელი გახდა, ხომ არ ეჭვობთ, რომ ეს თქვენი თანამდებობის მიმართ გარკვეული ინტერესის გამო ხდება? მით უმეტეს, ამბობთ, რომ მერიას მიმართეთ განცხადებით, რომ ვერ ასწრებდით სამუშაოების შესრულებას..
_ ვერ დაგიდასტურებთ, რომ ჩემი ინტერესით ხდება. ამის თქმის საფუძველი არ მაქვს, _ გვითხრა მაკა ჭყონიამ, თუმცა, არც იმაზე გვიპასუხა, მაშინ რატომ არ შეიძლებოდა ჯარიმის გარეშე ვადის გადაწევა.
„გურია ნიუსი“ იმავე კითხვებით სეს-ის გურიის რეგიონული სამსახურის უფროსს, მანანა ერქომაიშვილს დაუკავშირდა. მან დაადასტურა დაჯარიმების ფაქტი და გვითხრა, რომ რეკომენდაციების შეუსრულებლობის გამო გატარდა ეს ღონისძიება:
_ მითითებული იყო დრო, როდის, რა ვადებში უნდა შესრულებულიყო რეკომენდაციები. ივნისში ჩატარდა სახელმწიფო კონტროლი, მიეცათ ვადა 15 სექტემბრამდე. რაკი ვერ მოასწრეს, დაჯარიმდა ის ბაღები, სადაც სამუშაოები არ დასრულდა. რაც შეეხება დანარჩენს, უფრო დეტალურად ამის შესახებ, სეს-ის ეროვნულ სააგენტოს პრესსამსახურში გეტყვიან, _ გვითხრა მანანა ერქომაიშვილმა.
სურსათის ეროვნული სააგენტოს პრესსამსახურის უფროსმა თეა შველიძემ გვითხრა, რომ პასუხს 28 ოქტომბერს, ორშაბათს მოგვწერდნენ (საუბარი 25 ოქტომბერს, პარასკევს შედგა. ავტ.).
სურსათის ეროვნული სააგენტოს პრესსამსახურიდან მიღებული პასუხის შემდეგ „გურია ნიუსი“ ისევ მიუბრუნდება აღნიშნულ საკითხს.
