საქართველოს მთავრობამ მერებისა და საჯარო სექტორში დასაქმებულთათის მომავალი წლიდან სახელფასო ანაზღაურების ზრდა დაანონსა.
პრემიერ-მინისტრმა ირაკლი ღარიბაშვილმა თქვა, რომ წარმოუდგენელია, მერის ხელფასი თვეში 2 000 ლარს შეადგენდეს.
“გავზრდით ჩვენ მერების ხელფასებს, პრაქტიკულად გაორმაგება გვაქვს გადაწყვეტილი. წარმოუდგენელია მართლაც, მერმა იმუშაოს 2 000 ლარად და ემსახუროს, მაგალითად, ქუთაისს ან ბათუმს, რომლებიც უზარმაზარი ქალაქებია”, _ თქვა ღარიბაშვილმა.
გარდა მერების სახელფასო ანაზღაურებისა, პრემიერი 2022 წლის იანვრიდან საჯარო მოხელეებსაც დაპირდა ხელფასების ზრდას _ ღარიბაშვილის თქმით, საჯარო მოხელეების ხელფასები წლების განმავლობაში არ გაზრდილა, სამინისტროების დონეზე ცალკეული ლოკალური გადაწყვეტილებების გარდა.
როგორც მთავრობის ადმინისტრაციაში დღეს გამართულ ბრიფინგზე განმარტეს, ბოლო რამდენიმე წლის განმავლობაში „საჯარო მოხელეების ხელფასი იყო გაყინული“, რამაც საჯარო სამსახურის კონკურენტუნარიანობა შეამცირა.
“2022 წლის იანვრიდან დავიწყებთ საჯარო მოსამსახურეების ხელფასების ზრდას. ეს არის აუცილებელი, რადგანაც სახელმწიფო სამსახურში დასაქმებულები ვეღარ ხედავენ მოტივაციას, ვერ ვუძლებთ კონკურენციას კერძო სექტორთან, ამიტომ აუცილებელია ამ საკითხის გადაწყვეტა”, _ განმარტა ქვეყნის პრემიერმა.
„ნაკლებკონკურენტუნარიანი გახდა საჯარო სექტორი… კონკრეტიკაზე შემდეგ იქნება მსჯელობა, უნდა გაიზარდოს ჩვენთან დასაქმებულების მოტივაცია. ეს არის ჩვენი გუნდის მიდგომა. გაიზარდა პოლიციელების, პედაგოგების ხელფასები, დადგა დროს საჯარო მოხელეების“, _ აღნიშნა ეკონომიკის მინისტრმა ნათია თურნავამ.
მთავრობის წევრებს ჯერ არ დაუკონკრეტებიათ, რა ოდენობით გაიზრდება საჯარო მოხელეების ხელფასი და შესაბამისად, უცნობია თუ რამდენი მილიონი ლარი დაუჯდებათ გადასახადის გადამხდელებს ქვეყნის ბიუროკრატიული აპარატისთვის ხელფასების მომატება. თუმცა, ფაქტია, რომ საჯარო მოხელეებს, რომლებიც საარჩევნოდ მთავარ ადმინისტრაციულ რესურსად ითვლება, მთავრობა მოლოდინს უჩენს, რომ არჩევნების შემდეგ, მომავალი წლის ბიუჯეტში მათი ხელფასი გაიზრდება.
რატომ იზრდება საჯარო მოხელეების ხელფასი ახლა, წინასაარჩევნოდ? ჟურნალისტების ამ კითხვის პასუხად მთავრობის ადმინისტრაციის წარმომადგენელმა განმარტა, რომ „ახლა იწყება ბიუჯეტის პროექტზე მუშაობა, საბოლოო გადაწყვეტილება იქნება წლის ბოლომდე“.
საქართველოს მთავრობის ადმინისტრაციაში აღნიშნავენ, რომ საჯარო მოხელეების ხელფასი არ უნდა იყოს პოლიტიკურ სპეკულაციაზე დამოკიდებული და „ეს უნდა გახორციელდეს გარკვეული წესებით და ფორმულებით“. განმარტეს, რომ საჯარო მოხელეების ხელფასი გარკვეული პერიოდულობით შეფასდება და მოიმატებს სპეციალური ფორმულით, რომელსაც შეიმუშავებენ.
„გურია ნიუსმა“ გადაამოწმა, რეალურად რამდენია მერების ხელფასი დღეს _ მაგალითად, ლანჩხუთის მერის დარიცხული სახელფასო ანაზღაურება 2 650 ლარია; ბათუმის მერს ხელფასი 2018 წლის იანვარში გაეზარდა და 4 500 ლარი შეადგინა. ქუთაისის მერის ხელფასი, რომელიც 2018 წლამდე 2 100 ლარი იყო, 3 700 ლარამდე გაიზარდა; 4 500 ლარი აქვს ხელფასი რუსთავის მერსაც.
[sexy_author_bio]
