“ნაციონალური მოძრაობის” მაჟორიტარი დეპუტატობის კანდიდატმა ჩოხატაურის მუნიციპალიტეტის ზემოსურების საარჩევნო უბანზე მამუკა ბარამიძემ კანდიდატურა მოხსნა _ ამის შესახებ ბარამიძემ G-News TV-ის ყოველდღიურ გადაცემაში “არჩევანი მე” ისაუბრა.
მისი თქმით, “ნაციონალური მოძრაობა” ხელისუფლებაში უმრავლესობით აპირებს მოსვლას და კანდიდატურის მოხსნაც ამან გამოიწვია:
_ როცა კონკრეტული სოფლის რჩეული ხარ, ყველაფერი უნდა გააკეთო იმ სოფლისთვის. ჩვენი გუნდი უმრავლესობით აპირებს ხელისუფლებაში მოსვლას და მე ვერ მივაქცევდი სათანადო ყურადღებას სოფელს. ამიტომ, მივიღე გადაწყვეტილება, რომ კანდიდატურა მომეხსნა, _ აღნიშნა მამუკა ბარამიძემ, რომელიც “ნაციონალური მოძრაობის” ჩოხატაურის ორგანიზაციის აღმასრულებელი მდივანია.
_ თქვენ შეგეშინდათ და იმიტომ მოხსენით. არც იოცნებოთ უმრავლესობაში მოსვლაზე. თქვენი დრო დამთავრდა. მაგას ლოცვებში თუ მოიხსენიებთ მხოლოდ. თქვენ ხართ მშიშარა ადამიანი და ამიტომ მოხსენით კანდიდატურა, _ შეეპასუხა ბარამიძეს სტუდიაში მყოფი ოპონენტი _ “ქართული ოცნების” ჩოხატაურის ორგანიზაციის აღმასრულებელი მდივანი ბექა გამდლიშვილი.
ბარამიძის თქმით, მას კანდიდატურა არავის სასარგებლოდ არ მოუხსნია:
_ არც შემშინებია და არც არავის სასარგებლოდ მომიხსნია კანდიდატურა, _ აღნიშნა ბარამიძემ.
ბარამიძის და გამდლიშვილის დებატები, რომელიც შეურაცხყოფის, დაპირისპირების და ურთიერთბრალდებების ფონზე მიმდინარეობდა, “გურია ნიუსის” ვებგვერდზე 5 საათზე გამოქვეყნდება.
