ეკონომიკის მინისტრი ნათია თურნავა, 9 ივლისს, ოზურგეთის მუნიციპალიტეტის სოფელ შრომას ეწვია და ადგილობრივ მცხოვრებლებს შეხვდა. შეხვედრის მთავარი მიზანი გაზიფიცირების საკითხი იყო, რასაც სოფელი დიდი ხანია ითხოვს.
_ ურეკიდან რომ შემოდიხარ, იქამდე მოიყვანეს გაზი და შეაჩერეს; კონჭკათიდან რომ შემოდიხარ, იქამდეც მოიყვანეს და შეაჩერეს. სანამდე ვიყოთ ასე?! გარდა ამისა, ხალხი უკიდურესად გაჭირვებულია. მიშას დროს თხილის ფასი საუკეთესო იყო. მერე ბიძინა მოვიდა, ვიფიქრეთ, მილიარდერია, ქვეყანაზე იფიქრებს, ფული არ აქვს საძებარიო და ესაა საქმე?! 400 ლარია საჭირო, ერთი ჰექტარი ყანა რომ დათესო, რაც გლეხს არ აქვს. ადგებიან და ფერმერებს გვეძახიან _ სადაა ან ვინაა ფერმერი? გაკოტრებული კაცი ფერმერია? საყანე ნახევარი საუკუნეა, ფართობებში შესასვლელ გზას ვითხოვთ. ჩავიდეთ, ვნახოთ _ ერთ კილომეტრ გზაზეა საუბარი, _ უთხრა მინისტრს შრომაში მცხოვრებმა ოტია ხომერიკმა.
საუბარში ოზურგეთის მუნიციპალიტეტის მერი კოტე შარაშენიძე ჩაერთო.
_ ეტყობა, თქვენ ვერ იგებთ. ეს საკითხი მელიორაციის მოსაგვარებელია.
_ მაცალე შენ, კი გიცნობ, დიდი ხანია _ კომუნისტების დროიდან მოყოლებული ვიცი, ვინც ხარ! _ მიუბრუნდა მერს ხომერიკი.
_ ჩვენი მერი გვერდით გვიდგას, არ ძინავს, აქ ათენ-აღამებს, _ ხომერიკის საპირისპიროდ შარაშენიძეს ადგილობრივი შოთა გურგენიძე გამოექომაგა.
_ ყველაფერს აქვს თავისი რიგი. ახლა სახელმწიფო 200 მილიონს ხარჯავს მთელ საქართველოში. მე გპირდებით, რომ გაზი 12 თვეში იქნება, თუ რაიმე გეოლოგიური პრობლემა და ლაფსუსი არ იქნა. თქვენმა დეპუტატმა, არჩილ თალაკვაძემ შემარცხვინა, გურული ხარო და ეს უნდა გააკეთოო. რეალობა ის არის, უფრო დამაჯერებელი რომ ყოფილიყო დაპირება, პირადად ჩამოვედი და გითხარით, _ უთხრა მინისტრმა ადგილობრივებს.
შრომის მკვიდრმა ნოდარ ნაკაიძემ მინისტრს ხელწერილის დატოვება მას შემდეგ მოსთხოვა, რაც ოზურგეთის მერს გაცემული დაპირება შეახსენა და ისიც უთხრა, რომ მსგავსი დაპირებები ხმების სანაცვლოდ ხშირად მიუღიათ და მათ შორის, შარაშენიძისგან, თუმცა, არც ერთი არ შესრულებულა:
_ თქვენსავით ბევრი მოვიდა და შეგვპირდა. 2018-შიც უნდა ყოფილიყო აქ გაზი, ახლა 2019 წელია და პროექტიც კი არ გაქვთ, _ მიმართა მინისტრს ნაკაიძემ.
_ მე პირველად გპირდებით, – უპასუხა თურნავამ.
_ ასე „პირველად“ დაგვპირდა ყველა _ არავის ვენდობით ჩვენ და ხელწერილი დაგვიტოვეთ, _ უთხრა ნაკაიძემ.
ამის საპასუხოდ ეკონომიკის მინისტრმა შრომელებს „გურია ნიუსის“ კამერისკენ მიუთითა:
_ ყველაზე კარგი ხელწერილი ის ვიდეოკადრებია, რომელსაც „გურია ნიუსი“ გამოაქვეყნებს. შესაბამისად, მე ჩემი სიტყვების შესრულებაზე ვიზრუნებ, _ აღნიშნა ნათია თურნავამ და იმედი გამოთქვა, რომ მომავალ წელს ისევ ეკონომიკის მინისტრის რანგში ესტუმრება და შრომას და პირველ ალს მიულოცავს სოფელს.
