მიმდინარე წლის ზაფხულში იყო მოლოდინი, რომ ყაზანის “რუბინისა” და საქართველოს ეროვნული გუნდის თავდამსხმელი ხვიჩა კვარაცხელია კარიერას რომელიმე სახელოვან ევროპულ კლუბში გააგრძელებდა. “აიაქსი”, “დორტმუნდი”, “ნაპოლი”, “იუვენტუსი”, “მილანი”, “ლიდსი” _ აი არასრული ჩამონათვალი იმ გუნდებისა, რომლებიც ქართველი შემტევით დაინტერესებულები იყვნენ.
სამწუხაროდ, გარიგება არ შედგა და კვარაცხელია კვლავ რუსულ პრემიერლიგაში ასპარეზობს. რუსეთში მისი დარჩენის ერთ-ერთ უმთავრეს მიზეზად ყაზანელების მიერ მასში მოთხოვნილი დიდი თანხა გახლდათ.
რამდენიმე დღის წინ ფეხბურთელის პირადმა მენეჯერმა მამუკა ჯუღელმა ხვიჩას “იუვენტუსში” ჩაშლილი ტრანსფერის მიზეზზე ისაუბრა.
“დღეს კლუბებს რომ უთხრა, მოდი და 5-10 მილიონად კვარაცხელიას მოგყიდიო, უარს არავინ იტყვის, მაგრამ “რუბინი” თავის ვარსკვლავს ამ თანხად ნამდვილად არ შეელევა. პირდაპირ გეტყვით, რომ აპრილში სერიოზული მოლაპარაკება მქონდა “იუვენტუსთან” და ტურინში კლუბის სპორტულ დირექტორ ფაბიო პარატიჩისთან სალაპარაკოდ ჩავფრინდი. გიყვებით 16-17 აპრილის ამბებს და ჩვენ გვქონდა წინასწარი მოლაპარაკება ტრანსფერზე. შემდეგ, იცით, რა მოხდა? – “იუვენტუსი”, გუნდი, რომელიც მუდმივად ჩემპიონი ხდებოდა, ოთხეულში ძლივს შევიდა, რის გამოც მთავარი მწვრთნელი და პარატიჩიც გაუშვეს”.
რუსეთის პრემიერლიგის უკანასკნელ რამდენიმე თამაშში ქართველი თავდამსხმელი საკუთარ თავს აღარ ჰგავს და ადრინდელი ხვიჩა კვარაცხელიას მხოლოდ აჩრდილიღაა დარჩენილი. ფეხბურთის სპეციალისტების მტკიცებით, ზაფხულის იმედგაცრუების შემდეგ მას გარკვეული დრო სჭირდება, რომ კვლავ ჩვეულ სპორტულ ფორმაში ჩადგეს.
ორი დღის წინ, მოსკოვის “დინამოსთან” მატჩისას ქართველი 65-ე წუთზე შეცვალეს, “რუბინმა” კი მორიგი მარცხი იგემა _ 0:2. შეხვედრის დასრულების შემდეგ ხვიჩა კვარაცხელიას თემას რუსული გამოცემა “სპორტ ექსპრესი” გამოეხმაურა:
“ფეხბურთელისგან, რომელშიც კლუბი 20-25 მილიონ ევროს ითხოვს, სულ სხვა დონეს ელიან. მის მიმართ სრულიად სხვა მოთხოვნაა და სწორედ ასეთ მატჩებში, როდესაც გუნდს ბევრი არაფერი გამოსდის, ელოდებიან შედეგიან მოქმედებას და იმას, რომ სწორედ ის შეიტანს გარდატეხას. თუმცა, ეს უკვე მერამდენედ არ ხდება _ “დინამოსთან” ის ბაკაევმა შეცვალა, რომელიც მისთვის გამოყოფილ 26 წუთში უფრო მწვავედ გამოიყურებოდა.
დღეს კომპლექსში ქართველის ასეთ თამაშსა და ფორმაზე გავლენას ახდენს: ტრავმის შემდეგ არასაუკეთესო ფიზიკური მდგომარეობა, სატრანსფერო ფანჯრის გამო ფსიქოლოგიური ვარდნა და აგრეთვე, ის, რომ დიდი ვარსკვლავის სტატუსისადმი სრულად მზად არ არის. ხვიჩა ტალანტია, ლიგის ერთ-ერთი საუკეთესო დრიბლიორი, მაგრამ ჯერ ნამდვილად არაა ის მოთამაშე, რომელსაც შეუძლია სხვაობა შექმნას და მატჩები მარტომ მოიგოს. ამიტომ თამაშობს ჯერ რუსეთში და არა ინგლისში ან იტალიაში”.
ხვიჩა კვარაცხელიას დროებითი კრიზისის დრო დაუდგა, ბელგიის “გენტში” მოასპარეზე გიორგი ჩაკვეტაძეს კი მეორე სუნთქვა გაეხსნა და საკუთარი კლუბის ძირითად შემადგენლობას კვლავ გაუშინაურდა.
ბელგიის ჟუპილერ ლიგის ბოლო ტურში “გენტმა” “სერკლ ბრიუგეს” უმასპინძლა და იმარჯვა _ 2:1. ქართველი მინდორზე თავიდანვე იმყოფებოდა, აქტიური გახლდათ და მეორე გოლიც მისი გადაცემით გავიდა.
შეხვედრის დასრულების შემდეგ “გენტის” მთავარმა მწვრთნელმა ჰეინ ვანჰაზებრუკმა მისი გუნდის წარმატებაში ჩაკვეტაძის წვლილი განსაკუთრებით გამოყო:
“ჩაკვეტაძე გამოირჩეოდა. ეს ნაკლებად დასაჯერებელია ფეხბურთელისგან, რომელსაც ტრავმის გამო ორი წელი გაუცდა და მხოლოდ მეორე მატჩი ჩაატარა ძირითად შემადგენლობაში“.
პორტუგალიის პირველობაზე კიდევ ერთი ქართველი იასპარეზებს _ თბილისის “დინამოს” 18 წლის მცველი გიორგი ჩხეტიანი ერთწლიანი იჯარით პორტუგალიურ “ბრაგაში” ითამაშებს. როგორც პორტუგალიური გუნდის საიტი წერს, ჩვენებური თავდაპირველად “ბრაგას” 23-წლამდელთა რიგებში გაირჯება. ჩხეტიანი “დინამოს” აკადემიის აღზრდილია და მან მიმდინარე სეზონში 1 მატჩში მიიღო მონაწილეობა.
ამასობაში პრობლემები მოეძალა ფრანგულ “პარი სენ ჟერმენს”. ალბათ, სხვანაირად არც შეიძლებოდა ყოფილიყო_ ამ გუნდში ხომ ლიდერობას ჩვეული არაერთი ფეხბურთის ვარსკვლავი ერთად ასპარეზობს.
“RMC Sport”-ის ინფორმაციით, “პარი სენ ჟერმენში” ლიონელ მესის მისვლის შემდეგ ბრაზილიელი ნეიმარისა და ფრანგი კილიან მბაპეს ურთიერთობა საგრძნობლად გაუარესდა. გამოცემის მიხედვით, მბაპე ნეიმარის მოქმედებებით “მონპელიესთან” (2:0) მოგებულ მატჩში უკმაყოფილო დარჩა. ფრანგი 88-ე წუთზე შეცვალეს, სათადარიგოთა სკამზე დამჯდარმა კი ნეიმარისკენ ხელი გაიშვირა და იდრისა გეიეს უთხრა:
“ეს მათხოვარი პასებს არ მაძლევდა!” _ ეს მას შემდეგ, რაც ბრაზილიელმა იულიან დრაქსლერს საგოლე გადაცემა გაუკეთა.
გუშინვე ცნობილი გახდა რომ კილიან მბაპეს შეძენა “მანჩესტერ სიტიმ” მოისურვა. არაბი შეიხების მიერ დაფინანსებული კლუბი თანახმაა “პსჟ”-ს მბაპეს სანაცვლოდ მადრიდის “რეალზე” მეტი თანხა შესთავაზოს. მოლაპარაკებები მომავალი წლის იანვრის სატრანსფერო ფანჯრის დღეებში დაიწყება.
[sexy_author_bio]
