რა რაოდენობის წყალი უნდა მიიღოს ორგანიზმმა, რათა კანს ახალგაზრდობა შეუნარჩუნოს – “დილა მშვიდობისა საქართველოს” ეთერში წყლის მნიშვნელობაზე ცნობილი დერმატოლოგი ზაზა თელია საუბრობს.
როგორც დერმატოლოგი განმარტავს, წყლის მიღების აუცილებელი რაოდენობა დამოკიდებულია მეტაბოლიზმზე. სწრაფი მეტაბოლიზმის მქონე ადამიანები დეჰიტრატაციას სწრაფად განიცდიან, შესაბამისად მათ ორგანიზმს მეტი რაოდენობის წყალი სჭირდება. ზაზა თელიას თქმით, წყლის მიღების დღიური ნორმა არ არის დადგენილი და ნებისმიერი ორგანიზმისთვის ის ინდივიდუალურია.
“არ უნდა დაგვავიწყდეს წყალი – წყლის მიღება და ჰიდრატაცია უმნიშვნელოვანესია კანისთვის. რეკომენდებული დღიური ნორმა სეზონთან მიმართებაში, რა თქმა უნდა განსხვავდება.
არ არის დადგენილი დღიური ნორმა, რომ აუცილებლად მანდატორულია მაგალითად ადამიანისთვის, რომ მან მიიღოს 2-დან 3 ლიტრამდე წყალი დღეში. ეს დამოკიდებულია მის ფიზიკურ დამოკიდებულებაზე, ანუ როგორი ტიპის ფიზიკური აქტივობა და მეტაბოლიზმი აქვს. არსებობენ ადამიანები, რომლებსაც უფრო ნელი მეტაბოლიზმი აქვთ, არსებობენ რომლებსაც უფრო ნაკლები მეტაბოლიზმი აქვთ. სწრაფი მეტაბოლიზმი ვისაც აქვს, ის უფრო სწრაფად განიცდის დეჰიტრატაციას და მას უფრო მეტი წყლის მიღება სჭირდება,” – ამბობს ზაზა თელია.
აქვს თუ არა რაიმე კავშირი ყავის/კოფეინის მიღებას კანის დაბერებასთან?
რეკომენდებულ ნორმებს რაც შეეხება, დერმატოლოგის განცხადებით, ყავასთან დაკავშირებით საქმე უფრო მარტივად გვაქვს – ყავის დღიური ნორმა შეადგენს 3-4 ჭიქას. ზაზა თელიას თქმითვე, ყავის მიღებას კანის დაბერებასთან არანაირი კავშირი არ აქვს, თუმცა გულსისხლძარღვთა ჯანმრთელობის კუთხით კოფეინის/ყავის დღიური ნორმის მიღება გულსისხლძარღვთა სისტემის ჯანმრთელობას ხელს უწყობს.
“არსებობს რეკომენდებული დღიური ნორმები ყავასთან დაკავშირებით. ყავა, მოგეხსენებათ, შეიცავს კოფეინს. დღეში დაახლოებით 3-4 ჭიქა ყავის მოხმარება მიზანშეწონილია, შეიძლება მივიღოთ. 3-4 ჭიქაზე მეტი არ არის რეკომენდებული. ყავას დაბერების პროცესთან დაკავშირებით არ აქვს გავლენა, ყავას უფრო აქვს გულსისხლძარღვთა ჯანმრთელობის კუთხით და დადგენილია კვლევებით, რომ კოფეინის/ყავის მიღების დღიური ნორმა კარგია და ეხმარება გულსისხლძარღვთა სისტემას ჯანმრთელად ყოფნაში,” – განაცხადა ზაზა თელიამ.
წყარო: რუსთავი2
