გაზეთ „ალიონის“ რედაქტორი, ნუგზარ ასათიანი ოზურგეთის მუნიციპალიტეტის საკრებულოს რიგგარეშე სხდომაზე სიტყვით გამოვიდა და ისაუბრა იმ პრობლემების შესახებ, რაც “ალიონის“ რედაქციას შეიძლება შეექმნას, თუ ადგილობრივი ხელისუფლება არ დაეხმარება.
_ყველამ იცით, რომ ქალაქის ისტორიას დიდი ზიანი მიაყენა 1918 წლის აპრილში თურქების შემოსევამ, რომლებმაც გადაწვეს ოზურგეთი, გაანადგურეს არაერთი მნიშვნელოვანი ისტორიული ღირებულების ნაგებობა. მხოლოდ რამდენიმე შენობა გადარჩა. საბედნიეროდ, გასული საუკუნის 20-იან, 30-იან წლებში ქალაქს რამდენიმე არქიტექტურული ღირებულების მქონე ნაგებობა შეემეტა. მათგან უპირველესად აღვნიშნავ ცნობილი არქიტექტორის, ალექსი შჩუსევის პროექტით აგებულ რკინიგზის სადგურს. შემდგომში ამ შენობაში გაზეთ „ალიონს“ მეორე სართულზე, უვადო უზურფრუქტით გადაცემული ჰქონდა 200 კვადრატული მეტრი სამუშაო ფართი. სამწუხაროდ, 2005 წლის 16 ივლისს, დღემდე დაუდგენელი მიზეზით ხანძარი გაჩნდა და შენობა განადგურდა. რედაქცია ქუჩაში აღმოჩნდა. ერთ–ერთი ვერსიით, მაშინაც ხანძარი შენობის სხვა უწყებაზე გადაცემას უკავშირდებოდა. ქალაქის იმჟამინდელი მერის, ლევან ურუშაძის კეთილი ნებით, რედაქციას მიეცა ოთახი ქალაქის მერიის შენობაში. ხოლო შემდგომ, 2014 წლის 30 აპრილს გაფორმებული სასყიდლიანი უზურფრუქტის ხელშეკრულების საფუძველზე ვფლობთ აღნიშნულ შენობაში 64 კვადრატულ მეტრ უძრავ ქონებას.
2024 წლის 12 თებერვალს, დღემდე დაუდგენელმა პირებმა რედაქციაში ე.წ.„მოლოტოვის კოქტეილები“ შემოყარეს, ცეცხლი გაჩნდა, მაგრამ არ გავრცელდა და რედაქცია და მთლიანად ქალაქის ცენტრი მასშტაბურ ხანძარს გადაურჩა. ოზურგეთის რაიონული პროკურატურის (# 13/10 -17529, 15.03.2024წ.) ცნობით გაზეთ „ალიონის“ რედაქცია დაზარალებულად ცნეს, _თქვა ნუგზარ ასათიანმა.
ნუგზარ ასათიანმა ასევე აღნიშნა: მუნიციპალიტეტის პოზიცია ჩვენდამი ასეთია, მედიისათვის ყოველწლიურად ბიუჯეტში გამოყოფილი 10 ათასი ლარიდან, (4 წელიწადში 40 ათასი ლარი), ერთი თეთრიც არ გამოუყვიათ „ალიონისთვის“ ფასიანი ინფორმაციის ან განცხადებების გამოსაქვეყნებლად. ეს მათი არჩევანია, მაგრამ ვფიქრობ, რედაქციის ბედისადმი ასეთი დამოკიდებულება არაა მიზანშეწონილი.
ნუგზარ ასათიანის გამოსვლის შემდეგ, ოზურგეთის მუნიციპალიტეტის საკრებულოს თავმჯდომარის პირველმა მოადგილემ, ლავრენტი ბიგვავამ აღნიშნა, რომ საკრებულოს რეგლამენტი არ ითვალისწინებს ამ საქმის სიღრმისეულად განხილვას, ეს არის ისეთი საკითხი, რომელიც უშუალოდ მუნიციპალიტეტის მერიის პრეროგატივაა.
_ ჩვენ ვთხოვთ საკრებულოს განათლების, კულტურის, სპორტის, ახალგაზრდულ საქმეთა, ჯანმრთელობისა და სოციალურ საკითხთა კომისიის თავმჯდომარე ქეთევან ხომერიკს, ჩაინიშნოს აქ წარმოთქმული საკითხები, საჭიროების შემთხვევაში შეხვდეს ნუგზარ ასათიანს და მისგანაც მიიღოს დამატებითი ინფორმაცია, _თქვა ლავრენტი ბიგვავამ.
ჩვენი მხრივ, მნიშვნერლოვნად მიგვაჩნია, საკითხის დაზუსტება: ხელისუფლებების დამოკიდებულება მედიისადმი არც ადრე ყოფილა კეთილგანწყობილი _ მაგალითად, ზემოთ აღნიშნულ “შჩუსევის სახლში“, სხვა მედიებთან და არასამთავრობო ორგანიზაციებთან ერთად, “გურია ნიუსის“ რედაქციაც იყო განთავსებული და მცირე ფართს ფლობდა, მაგრამ ხანძრის შედეგად მართლაც ქუჩაში დარჩენილი ორგანიზაციისთვის არც “კეთილი ნებით“, არც ფასიანი ან უფასო უზურფრუქტით არავის შეუთავაზებია ოფისი, არც უკითხავთ ზარალის შესახებ და შესაბამისად, არავის აუნაზღაურებია.
მრავალი წლის განმავლობაში ქირას, შემდეგ კი ოფისის ღირებულებას კერძო პირებს ვუხდიდით.
რაც შეეხება “საბიუჯეტო მედიის ხარჯებს“, მიუხედავად ძალიან ფართო აუდიტორიის ყოლისა სხვადასხვა პლატფორმაზე, “გურია ნიუსს“ ამ ხარჯებიდან არაფერი რგებია; ამიტომ, უმჯობესია, კონკრეტული ინფორმაცია გამოქვეყნდეს, თუ რაში იხარჯება “მედიახარჯები“ მერიის, საკრებულოს, გუბერნიის ადმინისტრაციის და სხვა ოფიციალური ორგნოების მიერ.
