რესპუბლიკელი კანონმდებლები მხარს უჭერენ პრეზიდენტ დონალდ ტრამპის მტკიცე მოთხოვნას, რომ უკრაინაში არჩევნები ჩატარდეს, მიუხედავად იმისა, რომ ისინი არ იზიარებენ მის შეხედულებას, თითქოს პრეზიდენტი ვოლოდიმირ ზელენსკი „დიქტატორია“, _ ამ თემაზე წერილს Foxnews აქვეყნებს.
„ვფიქრობ, მათ უნდა მივცეთ ცოტა დრო… მოლაპარაკებები მიმდინარეობს“, _ განაცხადა სენატის უმრავლესობის ლიდერმა, რესპუბლიკელმა სამხრეთ დაკოტიდან. ჯონ თიუნმა,
სამშაბათს საღამოს ტრამპმა განაცხადა, რომ უკრაინამ „არასდროს უნდა დაეწყო“ ეს ომი და კიდევ ერთხელ გაიმეორა, რომ ზელენსკი „დიქტატორია“, რადგან 2022 წელს რუსეთის შეჭრის შემდეგ ქვეყანაში არჩევნები არ ჩატარებულა.
„აშკარაა, რომ უკრაინას არ დაუწყია ეს ომი, _ დაწერა რესპუბლიკელმა სენატორმა ნებრასკიდან პიტ რიკეტსმა, სოციალურ ქსელ X-ზე, _ ფაქტი ისაა, რომ რუსეთი შეიჭრა უკრაინაში და მას პასუხი უნდა აგოს. წინააღმდეგ შემთხვევაში, აგრესორები წახალისდებიან თავიანთი ცუდი ქმედებების გასაგრძელებლად“.
თუმცა, ნებრასკელი სენატორი ტრამპის მცდელობას, დაასრულოს ომი, დადებითად აფასებს.
სენატორი ჯოშ ჰოულიც, რესპუბლიკელი მისურიდან, მხარს უჭერს ტრამპის მოთხოვნას არჩევნების ჩატარების შესახებ: “მათ უნდა ჩაატარონ არჩევნები. ვფიქრობ, ეს რთული არ არის“, _ განაცხადა მან ჟურნალისტებთან საუბარში ხუთშაბათს.
„[ზელენსკი] არის ქვეყნის არჩეული ლიდერი,“ _ განაცხადა ჰოულიმ, _ მაგრამ გარკვეულ მომენტში არჩევნები მაინც უნდა ჩატარდეს.“
„ჩვენ უნდა ჩავატაროთ არჩევნები“, – განაცხადა სენატორმა ლინზი გრემმა, რესპუბლიკელმა სამხრეთ კაროლინიდან, როდესაც მას აღნიშნულ კომენტარებზე ჰკითხეს:
„რაც შეეხება რუსეთის უკრაინაში შეჭრის პასუხისმგებლობას, უპირველეს ყოვლისა, პუტინს ვადანაშაულებ“, _ განაცხადა გრემმა X-ზე და დაამატა, რომ პრეზიდენტები _ ბარაკ ობამა და ჯო ბაიდენი „სუსტად მოიქცნენ პუტინის წინააღმდეგ და ვერ შეძლეს უკრაინის დაცვა ოკუპაციისგან“.
„არანაირი შეცდომა არ უნდა დავუშვათ _ ამ ოკუპაციის პასუხისმგებლობა ეკისრება მხოლოდ ერთ ადამიანს ამ პლანეტაზე _ ვლადიმირ პუტინს”, _ განუცხადა ჟურნალისტებს სენატორმა ტომ ტილისმა, რესპუბლიკელმა ჩრდილოეთ კაროლინიდან.
ტილისმა აღნიშნა, რომ მისი აზრით, პუტინს გეგმაში ჰქონდა ბალტიისპირეთის ქვეყნების დაპყრობა და „სიგნალის მიწოდება ჩინეთისთვის, რომ დრო დადგა, მათ ტაივანი ჩაიგდონ ხელში.“
სენატორმა ჯონ კენედიმ, რესპუბლიკელმა ლუიზიანიდან, მიანიშნა, რომ არ ეთანხმება ტრამპის კომენტარებს ზელენსკიზე და პუტინს „ბანდიტი“ და „ბოროტი ადამიანი“ უწოდა.
სენატორმა მაიკ რაუნდსმა, რესპუბლიკელმა სამხრეთ დაკოტიდან, ზელენსკის „უკრაინის კანონიერად არჩეული პრეზიდენტი” უწოდა, თუმცა აღნიშნა, რომ არ სჯერა, თითქოს აშშ-ის პოლიტიკა სრულად შეესაბამება უკრაინის ინტერესებს, _ ნათქვამია foxnews-ის წერილში.
